គម្រោងមជ្ឈមណ្ឌលព្រះពុទ្ធសាសនាសម្ដេចសង្ឃរាជ ទេព វង្ស នឹងត្រូវដំណើរការឡើងវិញឆាប់ៗនេះ

គម្រោងសាងសង់មជ្ឈមណ្ឌលព្រះពុទ្ធសាសនា វប្បធម៌ សន្តិភាព របស់សម្ដេចសង្ឃរាជ ទេព វង្ស ត្រូវបានអាជ្ញាធរពាក់ព័ន្ធបើកកិច្ចប្រជុំគិតគូរសាងសង់ឡើងវិញ បន្ទាប់ពីអាក់ខានជិត៣ឆ្នាំមកហើយ ដោយសារតែវិបត្តិកូវីដ-១៩។ កិច្ចប្រជុំនេះធ្វើឡើងកាលពីថ្ងៃទី២៥ ខែកញ្ញា ឆ្នាំ២០២៣ នៅខេត្តសៀមរាប។

លោក ជេម វណ្ណ នាយកប្រតិបត្តិនៃគម្រោងសាងសង់មជ្ឈមណ្ឌល ព្រះពុទ្ធសាសនា វប្បធម៌ សន្តិភាព របស់សម្ដេចសង្ឃរាជ ទេព វង្ស បានឲ្យដឹង នៅព្រឹកថ្ងៃទី២៦ ខែកញ្ញា នេះថា ដោយមានការអនុញ្ញាតពីសំណាក់លោក ប្រាក់ សោភ័ណ អភិបាលខេត្តសៀមរាប លោក និងក្រុមការងារបានចូលទៅគោរពគារវកិច្ច និងជូនពរលោកអភិបាលខេត្ត ព្រមទាំងរាយការណ៍ពីគម្រោងសាងសង់មជ្ឈមណ្ឌលព្រះពុទ្ធសាសនា វប្បធម៌ សន្តិភាព របស់សម្ដេចសង្ឃរាជ ទេព វង្ស ជូនលោកអភិបាលខេត្តជ្រាបពីគម្រោងនេះ។ 

លោកបន្តថា ការបង្កើតគម្រោងសាងសង់មជ្ឈមណ្ឌលព្រះពុទ្ធសាសនា វប្បធម៌ សន្តិភាព របស់សម្ដេចសង្ឃរាជ ទេព វង្ស គឺផ្ដោតសំខាន់លើការចូលរួម និងនាំមកនូវទេសចរណ៍បែបព្រះពុទ្ធសាសនា និងវប្បធម៌ធម្មជាតិ ហើយក៏ធ្វើឡើងដើម្បីថ្វាយសម្ដេចសង្ឃទេព វង្ស ទុកជាអនុស្សវរីយ៍ក្នុងទឹកដីស្រុកកំណើតរបស់ព្រះអង្គផងដែរ។ លោកបន្ថែមថា នៅក្នុងជំនួបនោះ លោកអភិបាលខេត្ត បានគាំទ្រនូវគម្រោងនេះ ហើយថា បើមានការខ្វះខាតផ្លូវច្បាប់យ៉ាងណានោះ លោកនឹងជួយសម្រួលថែមទៀត។

នៅពេលដឹងដំណឹងនេះ ពលរដ្ឋនៅក្នុងមូលដ្ឋាននៃសង្កាត់ជ្រាវ ក្រុងសៀមរាប បានសាទរ និងមានសង្ឃឹមយ៉ាងមុតមាំថា ពួកគាត់នឹងមានជីវភាពធូរធារគ្រាន់ជាងមុន បន្ទាប់ពីអាជ្ញាធរពាក់ព័ន្ធបានអនុញាតឲ្យសាងសង់គម្រោងនេះឡើងវិញ។

សូមរំឮកថា គម្រោងអភិវឌ្ឍន៍លើផ្ទៃដីទំហំ ២៨៨ ៦០៣ហិកតា តាមរយៈលិខិតលេខ ៩៤៩ សជណ ចុះថ្ងៃទី២០ ខែសីហា ឆ្នាំ២០១៥ របស់ទីស្តីការគណៈរដ្ឋមន្ត្រី គឺរាជរដ្ឋាភិបាល បានអនុញ្ញាតថ្វាយចំពោះសម្តេចព្រះអគ្គមហាសង្ឃរាជធិបតីកិត្តិឧទ្ទេសបណ្ឌិត ទេព វង្ស ដើមី្បធ្វើការអភិវឌ្ឍន៍សាងសង់មជ្ឈមណ្ឌលព្រះពុទ្ធសាសនា វប្បធម៌ សន្តិភាពនៅក្នុងភូមិសាស្ត្រសង្កាត់ជ្រាវ ក្រុងសៀមរាប។ បន្ទាប់ពីខកខាន អាជ្ញាធរខេត្តសៀមរាប បានអះអាងថា គម្រោងនេះ នឹងត្រូវសាងសង់រួចរាល់ជាស្ថាពរក្នុងរយៈពេល ៣ឆ្នាំ។

អត្ថបទ៖ កុសល