ព័ត៌មានជាតិ

ហាមមិនស្ដាប់ សមត្ថកិច្ចចុះរុះរើ តូបលក់តាមដងផ្លូវ ដើម្បីសណ្តាប់ធ្នាប់សាធារណៈ

បានផុស

៥ years មុន

នៅ

ថ្ងៃព្រហស្បតិ៍ ៤ កុម្ភៈ ២០២១

ដោយ

តូបលក់ដូរតាមចិញ្ចើមផ្លូវជាតិលេខ៣ ចំណុចផ្សារថ្នល់បត់ ត្រូវបានគណៈបញ្ជាការឯកភាពស្រុកសំរោងចុះរុះរើចេញ ក្រោយការហាមឃាត់ច្រើនដងមិនស្តាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចុះរៀបចំសណ្តាប់តាមដងផ្លូវនេះ ធ្វើឡើងកាលពីរសៀលថ្ងៃទី០៣ ខែកុម្ភៈ ឆ្នាំ២០២១ ដែលដឹកនាំផ្ទាល់ដោយលោក កេត ម៉ៅ អភិបាលស្រុកសំរោង រួមដំណើរដោយលោកអភិបាលរងស្រុក លោកនាយករងរដ្ឋបាលស្រុក កងកម្លាំងទាំងប្រអាវុធទាំង៣ អនុវត្តិចំពោះតូបដែលបងប្អូនប្រជាពលរដ្ឋសង់លក់ដូរ ដោយរំលោភលើដីចំណីផ្លូវសាធារណៈតាមបណ្តោយផ្លូវជាតិលេខ៣ ត្រង់ចំណុចផ្សារថ្នល់បត់ នៅភូមិពេជចង្វា ឃុំបឹងត្រាញ់ខាងជើង ស្រុកសំរោង ខេត្តតាកែវ។

លោកអភិបាលស្រុកបានបញ្ជាក់ថា នេះដើម្បី ធ្វើយ៉ាងណាឲ្យមានរបៀបរៀបរយ និងសោភ័ណភាពល្អ សម្រាប់ការធ្វើចរាចរណ៍ ក្នុងគោលបំណងកាត់បន្ថយគ្រោះថ្នាក់ចរាចរណ៍ ស្របតាមគោលនយោបាយភូមិ- ឃុំមានសុវត្ថិភាព ដែលរាជរដ្ឋាភិបាលបានដាក់ចេញ។ ជាពិសេស ដើម្បីជួយសម្រួលដល់ក្រុមការងារស្ថាបនាផ្លូវជាតិលេខ៣ ក្នុងការស្ថាបនាផ្លូវឲ្យមានគុណភាព និងទាន់ពេលវេលា ក្នុងភូមិសាស្ត្រស្មុគស្មាញនេះ។

ចុងក្រោយក្នុងនាមលោកជាប្រធានគណៈបញ្ជាការឯកភាពស្រុកសូមអំពាវនាវ និងសុំការយោគយល់ពីបងប្អូនអាជីវករទាំងអស់នៅទីតាំងនេះ មេត្តាសហការជាមួយអាជ្ញាធរ ក្នុងការរៀបចំសណ្តាប់ធ្នាប់សាធារណៈនៅទីតាំងផ្សារនេះ ឲ្យមានរបៀបរៀបរយនិងសណ្តាប់ធ្នាប់ល្អ ក្នុងការធ្វើចរាចរណ៍ជៀសវាងគ្រោះថ្នាក់ចរាចរណ៍ ដែលនឹងអាចកើតឡើងជាយថាហេតុ៕

អត្ថបទ៖ វីរៈ

សូមចុចអាន៖ កម្មកររត់ចែកជើងគ្នា ក្រោយប្រទះឃើញគ្រាប់រ៉ុកកែត នៅក្រោមអគារចាស់

Related Topics:ការរៀបចំសណ្ដាប់ធ្នាប់