មេពន្ធនាគារ បញ្ជាមន្ត្រីឱ្យឆែកឆេរឱ្យបានហ្មត់ ចត់ ពេលមានអ្នកចូលសួរសុខទុក្ខអ្នកជាប់ឃុំ

នៅព្រឹកថ្ងៃទី២៦ ខែតុលា ឆ្នាំ២០២៣នេះ លោកឧត្ដមអគ្គានុរក្សលេខ១ ឈន សាណាត អគ្គនាយកនៃអគ្គនាយកដ្ឋានពន្ធនាគារ បានបញ្ជាឱ្យមន្ដ្រីពន្ធនាគាររាជធានី-ខេត្តទាំងអស់ ត្រូវឆែកឆេរឱ្យហ្មត់ចត់ និងជាប់ជាប្រចាំចំពោះអ្នកចូលសួរសុខទុក្ខអ្នកជាប់ឃុំក្នុងពន្ធនាគារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងកិច្ចប្រជុំត្រួតពិនិត្យការងារគ្រប់គ្រងមណ្ឌលអប់រំកែប្រែ និងពន្ធនាគាររាជធានី-ខេត្ត នៅព្រឹកថ្ងៃនេះ លោកឧត្ដមអគ្គានុរក្សលេខ១ ឈន សាណាត បានណែនាំដល់មន្ដ្រីពន្ធនាគារទាំងអស់ ត្រូវអនុវត្តនូវវិធានាការនានាឱ្យបានម៉ឺងមាត់ក្នុងការគ្រប់គ្រងពន្ធនាគារឱ្យកាន់តែមានប្រសិទ្ធភាព។ នៅក្នុងនោះ ឧត្ដមអគ្គានុរក្សលេខ១រូបនេះ បានណែនាំឱ្យមន្ដ្រីពន្ធនាគាររាជធានី-ខេត្តទាំងអស់ ត្រូវឆែកឆេរឱ្យបានជាប់ជាប្រចាំចំពោះអ្នកចូលសួរសុខទុក្ខអ្នកជាប់ពន្ធនាគារ។

លោកអគ្គនាយកពន្ធនាគារ បានជំរុញឱ្យមន្ដ្រីពន្ធនាគារទាំងអស់ ត្រូវសហការឱ្យបានជាប់ជាប្រចាំជាមួយស្នងការដ្ឋាននគរបាលរាជធានី-ខេត្ត និងកម្លាំងកងរាជអាវុធហត្ថឱ្យបានជិតស្និទ្ធិ ដើម្បីធានាថា នៅពេលបញ្ជូនជនជាប់ឃុំ ទៅមន្ទីរពេទ្យ ឬទៅកាន់តុលាការ ប្រកបដោយសុវត្ថិភាព ដោយជៀសវាងកុំឱ្យមានការកើតឡើងករណីណាមួយជាយថាហេតុ។ ទន្ទឹមនឹងការពង្រឹងវិធានការទាំងនេះ ឧត្ដមអគ្គានុរក្សលេខ១ ឈន សាណាត ក៏បានផ្ដាំផ្ញើដល់មន្ដ្រីពន្ធនាគារ ត្រូវត្រួតពិនិត្យប្រព័ន្ធទឹក-ភ្លើង នៅជុំវិញអគារពន្ធនាគារឱ្យបានត្រឹមត្រូវ ជាពិសេសមន្ដ្រីពន្ធនាគារ ត្រូវធ្វើអនាម័យសម្អាតជាប្រចាំនៅបន្ទប់ឃុំ អគារឃុំ និងបរិវេនពន្ធនាគារ។

តែយ៉ាងណាមិញ លោកឧត្ដមអគ្គានុរក្សលេខ១ ឈន សាណាត ក៏បានថ្លែងអំណរគុណចំពោះមន្ដ្រីពន្ធនាគាររាជធានី-ខេត្ត និងអ្នកពាក់ព័ន្ធទាំងអស់ ដែលបានខិតខំប្រឹងប្រែងបំពេញការងារគ្រប់គ្រងនៅតាមពន្ធនាគារនីមួយៗ ក្នុងរយៈពេលកន្លងមក៕