សម្ដេចធិបតី ហ៊ុន ម៉ាណែត ៖ កម្រិតនយោបាយ ត្រូវតែនិយាយបង្ហាញអំពីគោលនយោបាយ  

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានឆ្លើយតបទៅកាន់អ្នកលើកឡើងមួយចំនួនថា ក្នុងរយៈពេល ២ខែមកនេះ សម្ដេចឃើញតែនិយាយ។ សម្ដេចធិបតី ហ៊ុន ម៉ាណែត បានបញ្ជាក់ថា កម្រិតនយោបាយ ត្រូវតែនិយាយបង្ហាញអំពីគោលនយោបាយ ឲ្យប្រជាពលរដ្ឋបានយល់ដឹង។

ការឆ្លើយតបនេះ ធ្វើឡើងក្នុងពិធីជួបសំណេះសំណាលជាមួយកម្មករ-និយោជិត នៅតាមបណ្តារោងចក្រ សហគ្រាសដែលមានមូលដ្ឋាន ក្នុងស្រុកកណ្តាលស្ទឹង និងក្រុងតាខ្មៅ ខេត្តកណ្តាល នាព្រឹកថ្ងៃទី ២ ខែវិច្ឆិកា ឆ្នាំ ២០២៣នេះ។

សម្ដេចធិបតី ហ៊ុន ម៉ាណែត មានប្រសាសន៍ថា ការចុះជួបកម្មករ-និយោជិត ជាបន្តបន្ទាប់មកនេះ គឺដើម្បីសួរសុខទុក្ខផង និងដើម្បីផ្សព្វផ្សាយនូវ​គោលនយោបាយ របស់រាជរដ្ឋាភិបាលមួយចំនួនផង។ មានអ្នកលើកឡើងមួយចំនួនថា ក្នុងរយៈពេល ២ខែកន្លងមកនេះ នាយករដ្ឋមន្ត្រី ឃើញតែនិយាយសុទ្ធ។ ត្រង់ចំណុចនេះ សម្ដេចធិបតី ហ៊ុន ម៉ាណែត បានបញ្ជាក់ថា កម្រិតនយោបាយ ត្រូវតែនិយាយបង្ហាញអំពីគោលនយោបាយ។

សម្ដេចធិបតី ហ៊ុន ម៉ាណែត ថ្លែងបែបនេះថា «ខ្ញុំឃើញមានការលើកឡើងមួយចំនួនថា នាយករដ្ឋមន្ត្រី ២ខែនេះ ឃើញ​តែនិយាយសុទ្ធ ហ្អាកកម្រិតនយោបាយ ត្រូវតែនិយាយដាក់ចេញនូវគោលនយោបាយ បើមិនឲ្យយើងប្រាប់ប្រជាពលរដ្ឋ ម្ចាស់ប្រទេសថា រដ្ឋាភិបាលត្រូវធ្វើអីជូនឲ្យបងប្អូនត្រូវធ្វើម៉េច»។

សម្ដេចនាយករដ្ឋមន្ត្រី បានបញ្ជាក់ថា ការងារអ្វីមួយ ត្រូវធ្វើតាមជំហាន តាមកម្រិត ដែលត្រូវរៀបចំផែនការ និងរៀបចំ​គោលនយោបាយជាដើម ដោយមិនមែនចេះតែធ្វើនោះទេ៕