លោក នេត្រ ភក្រ្ដា ៖ ការជួបជុំរវាងប្រមុខរាជរដ្ឋាភិបាល ជាមួយអ្នកសារព័ត៌មាន លើកក្រោយ នឹងត្រូវធ្វើឡើងនៅថ្ងៃទី ៣ ឧសភា

រដ្ឋមន្រ្តីក្រសួងព័ត៌មាន បានឲ្យដឹងថា ការជួបជុំរវាងប្រមុខរាជរដ្ឋាភិបាល ជាមួយអ្នកសារព័ត៌មាន លើកក្រោយ នឹងត្រូវធ្វើឡើងនៅថ្ងៃទី ៣ ខែឧសភា ឆ្នាំ ២០២៤ ដែលចំនឹងថ្ងៃនៃទិវាសេរីភាពសារព័ត៌មានពិភពលោក​ តែម្ដង។ ការឲ្យដឹងនេះ បានធ្វើឡើងក្នុងកិច្ចប្រជុំមួយ នៅក្រសួង​ព័ត៌មាន កាលពីរសៀលថ្ងៃទី ២ ខែវិច្ឆិកា ឆ្នាំ ២០២៣។ នេះបើយោងតាមការចុះផ្សាយ នៅលើគេហទំព័រទូរទស្សន៍ជាតិកម្ពុជា។

គួររំលឹកថា សម្ដេចតេជោ ហ៊ុន សែន អតីតនាយករដ្ឋមន្ត្រី បានជួបជុំជាមួយអ្នកសារព័ត៌មានចំនួន ៥លើករួចមកហើយ ចាប់តាំងពីឆ្នាំ ២០១៧មក ដោយយកថ្ងៃទី ១៤ ខែមករា រៀងរាល់ឆ្នាំជាកាលបរិច្ឆេទនៃការជួបជុំ ហើយការជួបជុំនេះ គឺដើម្បីផ្ដល់ឱកាសដល់អ្នកសារព័ត៌មាន អាចលើកឡើងពីបញ្ហា សំណូមពរ ឬកង្វល់ផ្សេងៗ ដើម្បីដាក់ជូននាយករដ្ឋមន្ត្រី ពិនិត្យ និងជួយដោះស្រាយ។

លោក នេត្រ ភក្រ្ដា រដ្ឋមន្រ្តីក្រសួងព័ត៌មាន ប្រសាសន៍នៅក្នុងកិច្ចប្រជុំខាងលើនេះថា ការជួបជុំរវាងប្រមុខរាជរដ្ឋាភិបាល ជាមួយអ្នកសារព័ត៌មាន លើកក្រោយ នឹងត្រូវធ្វើឡើងនៅថ្ងៃទី ៣ ខែឧសភា ឆ្នាំ ២០២៤ ដែលចំថ្ងៃនៃទិវាសេរីភាពសារព័ត៌មានពិភពលោក។

លោករដ្ឋមន្រ្តីក្រសួងព័ត៌មាន បានបញ្ជាក់ថា ការសម្រេចជ្រើសរើសយកថ្ងៃទី ៣ ខែឧសភា ឆ្នាំ ២០២៤ សម្រាប់ជំនួបរវាងអ្នកសារព័ត៌មាន ជាមួយនឹងប្រមុខរាជរដ្ឋាភិបាល គឺជាការសម្រេចរបស់សម្ដេចធិបតីនាយករដ្ឋមន្រ្ដី ក៏ដូចជាការសម្រេចរបស់រាជរដ្ឋាភិបាលផងដែរ។

លោកថា ក្រសួងព័ត៌មាន នឹងរៀបចំជំនួបនេះ ហើយក៏នឹងប្រមូលនូវបញ្ហា និងកង្វល់ទាំងអស់ ដែលស្ថានីយវិទ្យុ ទូរទស្សន៍ និងអ្នកសារព័ត៌មាន បានលើកឡើងដាក់ជាសំណើក្នុងក្របខណ្ឌរួមមួយ ដើម្បីដាក់ជូនសម្ដេចធិបតីនាយករដ្ឋមន្រ្ដី ពិនិត្យ និងដោះស្រាយ។

បើតាមលោក នេត្រ ភក្រ្ដា ចាប់ពីពេលនេះរហូតដល់ពេលជំនួប រវាងអ្នកសារព័ត៌មាន ជាមួយប្រមុខរាជរដ្ឋាភិបាល គឺក្រសួងព័ត៌មាន នឹងធ្វើបច្ចុប្បន្នភាពអ្នកសារព័ត៌មាន ដែលស្របច្បាប់ និងអ្នកមានអាជ្ញាបណ្ណស្របតាមច្បាប់ត្រឹមត្រូវ គឺអាចចុះឈ្មោះចូលរួមក្នុងកម្មវិធីជំនួបនោះបាន។ ប៉ុន្ដែសម្រាប់អ្នកសារព័ត៌មាន ដែលមិនទាន់មានអាជ្ញាបណ្ណ ត្រូវទៅចុះបញ្ជីឲ្យបានត្រឹមត្រូវតាមច្បាប់ នៅក្រសួងព័ត៌មាន៕