សម្ដេចធិបតី ហ៊ុន ម៉ាណែត ណែនាំឲ្យពន្លឿនការសម្រួលតួនាទីភារកិច្ច របស់គណៈកម្មាធិការជាតិប្រយុទ្ធប្រឆាំងផលិតផលក្លែងក្លាយ

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ណែនាំឲ្យពន្លឿនការសម្រួលតួនាទីភារកិច្ច របស់គណៈ កម្មាធិការជាតិប្រយុទ្ធប្រឆាំងផលិតផលក្លែងក្លាយ សំដៅលុបបំបាត់ចំណុចអវិជ្ជមាន លើប្រសិទ្ធភាពការងារ ក្រោយពីមានការលើកឡើងពីវិស័យឯកជន នាពេលកន្លងមក។ ការលើកឡើងនេះ ធ្វើឡើងក្នុងវេទិការាជរដ្ឋាភិបាល និងផ្នែកឯកជនលើកទី ១៩ នាព្រឹកថ្ងៃទី ១៣ ខែវិច្ឆិកា​ ឆ្នាំ ២០២៣ នេះ។

សម្ដេចធិបតី ហ៊ុន ម៉ាណែត មានប្រសាសន៍ថា ចំពោះការលើកកម្ពស់តម្លាភាពនៃការស្រាវជ្រាវ ស៊ើបអង្កេត និងការបង្ក្រាបផលិតផលក្លែងក្លាយ គឺវិស័យឯកជនបានលើកឡើងអំពីការអនុវត្តការងារ របស់គណៈកម្មាធិការជាតិប្រយុទ្ធប្រឆាំងផលិតផលក្លែងក្លាយ បានក្លាយជាបន្ទុកមួយ។

ឆ្លើយតបនឹងបញ្ហានេះ សម្ដេចនាយករដ្ឋមន្ត្រី បានបញ្ជាក់ថា ក្រសួងមហាផ្ទៃ បានដាក់ចេញនូវសេចក្ដីសម្រេចចុះថ្ងៃទី ១៥ ខែកញ្ញា ឆ្នាំ ២០២៣ ដើម្បីផ្អាកជាបណ្ដោះអាសន្ននូវការស្រាវជ្រាវ ស៊ើបអង្កេត និងការបង្រ្កាបផលិតផលក្លែងក្លាយ​ របស់លេខាធិការដ្ឋាន នៃគណៈកម្មាធិការប្រយុទ្ធប្រឆាំងផលិត​ផលក្លែងក្លាយរួចរាល់ហើយ ដើម្បីកែសម្រួលតួនាទីភារកិច្ច សំដៅលុបបំបាត់ចំណុចអវិជ្ជមាន លើប្រសិទ្ធភាពការងារ។

សម្ដេចធិបតី ហ៊ុន ម៉ាណែត បានថ្លែងថា «ហើយកិច្ចការងារនេះ យើងត្រូវធ្វើ ហើយជាពិសេសបទដ្ឋានការងារ ត្រូវឲ្យមានភាពច្បាស់លាស់ ភាពសាមញ្ញ ហើយសំខាន់បំផុតការអនុវត្តឲ្យចំគោលដៅ កុំអនុវត្តលើស អញ្ចឹងកិច្ចការងារនេះ គឺទាមទារនូវការគ្រប់គ្រង និងពង្រឹងនូវស្ថាប័នខ្លួនឯង ដែលអាទិភាពមួយ​សំខាន់របស់រដ្ឋាភិបាល គឺកំណែទម្រង់ និងពង្រឹងរដ្ឋបាលសាធារណៈ»។

ពាក់ព័ន្ធបញ្ហានេះ សម្ដេចធិបតី ហ៊ុន ម៉ាណែត បានណែនាំដល់លោក ស សុខា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ត្រូវបន្តពន្លឿនទៅលើកិច្ចការកែសម្រួលតួនាទីភារកិច្ច របស់គណៈកម្មាធិការជាតិប្រយុទ្ធប្រឆាំងផលិតផលក្លែងក្លាយ ពិសេសទៅលើយន្ដការអនុវត្តតែម្ដង៕