ក្នុងចំណោមវ៉ាក់សាំង៣០ម៉ឺន​ដូស សម្រាប់ ១៥ម៉ឺននាក់ គឺអាចចាក់បានប្រហែល ១៤៩,៥០០នាក់

ក្នុងចំណោមវ៉ាក់សាំង៦០ម៉ឺនដូស ដែលជាជំនួយរបស់សាធារណរដ្ឋចិននឹងបែងចែកជាពីរជូនក្រសួងការពារជាតិចំនួន​៣០ម៉ឺនដូសសម្រាប់ចាក់ជូនកងទ័ព និងប៉ូលីសនៅតាមព្រំដែន និងវ៉ាក់សាំង៣០ម៉ឺនដូសទៀតជូនដល់ក្រសួងសុខាភិបាល​សម្រាប់ចាក់មន្ត្រីសុខាភិបាល និងដល់ពលរដ្ឋជាអាទិភាព។ មនុស្សម្នាក់ត្រូវការចាក់វ៉ាក់សាំង២ដង ប៉ុន្តែក្រសួងសុខាភិបាលត្រៀមសម្រាប់ក្រុមអាទិភាពតែជាង ១៤៩,៥០០នាក់សិនទេ។

លោកស្រី ឱវណ្ណ ឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលបានលើកឡើងក្នុងសន្និសីទកាសែតនារសៀលថ្ងៃទី៨ ខែកម្ភៈ ឆ្នាំ២០២១នេះ ថាដោយសារមនុស្សម្នាក់ត្រូវចាក់វ៉ាក់សាំង២ដូស។ ប៉ុន្តែតាមរយៈបទពិសោធន៍ចាក់វ៉ាក់សាំងជំងឺនានារបស់កម្ពុជាកន្លងមក បានសន្និដ្ឋានថា ក្នុងចំណោមវ៉ាក់សាំង៣០ម៉ឺនដូស សម្រាប់ ១៥ម៉ឺននាក់ គឺអាចចាក់បានប្រហែល ១៤៩,៥០០នាក់ ទេ។

លោកស្រី ឱ វ៉ាន់ឌីន បានពន្យល់ថា ការចាក់វ៉ាក់សាំងបានតែមនុស្ស១៤៩,៥០០នាកនេះ ដោយសារគិតពីការខូចខាតពី១៥ ទៅ២០ភាគរយ ពេលដឹកជញ្ជួន និងពេលកំពុងចាក់ ដែលអាចមានការបែកខ្លះៗជាយថាហេតុ។

ក្រសួងសុខាភិបាល បានប្រកាសចាក់វ៉ាក់សាំងបង្ការជំងឺកូវីដ-១៩ ជូនឥស្សរជនជាន់ខ្ពស់ចាប់តាំងពីទេសរដ្ឋមន្ត្រី រហូតដល់អ្នកសារព័ត៌មានចាប់ពីថ្ងៃទី១០ ខែកម្ភៈ ឆ្នាំ២០២១នេះតទៅនៅតាមមន្ទីរពេទ្យចំនួន៤ក្នុងរាជធានីភ្នំពេញ។

លោក សាស្ត្រាចារ្យ  ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ-១៩ បានបញ្ជាក់នៅថ្ងៃនេះថា គណៈកម្មការ នឹងរៀបចំកម្មវិធីការចាក់វ៉ាក់សាំង Sinopharm បង្ការជំងឺកូវីដ-១៩ ជូនឥស្សរជនជាន់ខ្ពស់ ដែលមានអាយុចាប់ពី១៨ឆ្នាំ ដល់ ៥៩ឆ្នាំ ដោយស្ម័គ្រចិត្ត ចាប់ពីថ្ងៃទី១០ ខែកុម្ភៈ ឆ្នាំ២០២១តទៅ។

ការចាក់វ៉ាក់សាំងនេះនឹងប្រពឹត្តទៅនៅ៤ទីតាំងគឺ៖

១. នៅមន្ទីរពេទ្យកាល់ម៉ែត សម្រាប់ឥស្សរជនជាទេសរដ្ឋមន្ត្រី រដ្ឋមន្ត្រី រដ្ឋលេខាធិការ ឬមានឋានៈស្មើ។

២. មន្ទីរពេទ្យព្រះអង្គឌួង សម្រាប់ឥស្សរជន ជាអនុរដ្ឋលេខាធិការ ឬមានឋានៈស្មើ។

៣. មន្ទីរពេទ្យមិត្តភាពខ្មែរ-សូវៀត សម្រាប់ឥស្សរជនជាអភិបាលនៃគណៈអភិបាលរាជធានី-ខេត្ត និងទី៤. នៅមន្ទីរពេទ្យកុមារជាតិ សម្រាប់អ្នកសារព័ត៌មាន។

សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ធ្លាប់មានប្រសាសន៍ថា អ្នកដែលមានសិទ្ធិអាទិភាពក្នុងការទទួលវ៉ាក់សាំងកូវីដ-១៩មុនគេមានជាង៤២ម៉ឺននាក់ ក្នុងនោះសុទ្ធសឹងជាអ្នកធ្វើការមានហានិភ័យខ្ពស់រាប់ចាប់ពី អ្នកប្រមូលសំរាម អនាម័យទីក្រុង អ្នកបើកបរ ព្រះសង្ឃ កីឡាករ កងទ័ព មន្ត្រីសុខាភិបាល មន្ត្រីអប់រំ មន្រ្តីរាជការស៊ីវិល មន្ត្រីតុលា មន្ត្រីពន្ធនាគារ រដ្ឋបាលព្រៃឈើ ជលផល មន្ត្រីអគ្គីសនី ក្រុមប្រឹក្សាខេត្តក្រុម រដ្ឋបាលជលផល​និងមន្រ្តីផ្សេងៗទៀតដែលធ្វើការនៅកន្លែងដែលមានហានិភ័យខ្ពស់៕

អត្ថបទ៖ សំអឿន

សូមចូលអានអត្ថបទទាក់ទង៖ ការ​ចាក់វ៉ាក់សាំងកូវីដ១៩ មា​ន៤​ទីតាំង​​នៅ​​ភ្នំពេញ

នាយករដ្ឋមន្ត្រីប្រកាសឱ្យ សមាជិករដ្ឋាភិបាល ទៅចាក់វ៉ាក់សាំងដើម្បីជាគំរូដល់ប្រជាពលរដ្ឋ