លោក ឡុង ឌីម៉ង់ ទាក់ទាញអាមេរិក​ឱ្យចូលវិនិយោគ​ខេត្តព្រះសីហនុលើកកម្ពស់​ពាណិជ្ជកម្មទ្វេភាគី

លោក ឡុង ឌីម៉ង់ អភិបាលរងខេត្តព្រះសីហនុ បានតំណាងរដ្ឋបាលខេត្ត បានចូលរួមជាវាគ្មិនធ្វើបទបង្ហាញ​ស្តីអំពី​សក្តានុពល និងកាលានុវត្តភាព នៃការវិនិយោគក្នុងខេត្តព្រះសីហនុ ទៅដល់គណៈប្រតិភូជាតិ និងអន្តរជាតិ ក្នុងដំណើរ​ទស្សនកិច្ចការងារ ដែលរៀបចំដោយសភាពាណិជ្ជកម្មអាមេរិចប្រចាំកម្ពុជា (Amcham) នៅតំបន់អភិវឌ្ឍន៍ Bay of Lights កាលពីចុងសប្តាហ៍កន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈបទបង្ហាញនេះ ធ្វើឡើងក្នុងគោលបំណងបង្កើនពិពិធកម្មវិនិយោគិន ចូលរួមជំរុញនិងលើកកម្ពស់ទំហំ​ពាណិជ្ជកម្ម​ទ្វេរភាគីរវាងកម្ពុជា និងអាមេរិច។

ក្នុងបទបង្ហាញជូនដល់គណៈប្រតិភូធុរកិច្ចប្រធាន អគ្គនាយក និងតំណាងក្រុមហ៊ុនប្រមាណជាង២០ក្រុមហ៊ុន លោក ឡុង ឌីម៉ង់ បានលើកឡើងអំពីស្ថានភាពទូទៅនៃខេត្ត ហេដ្ឋារចនាសម្ព័ន្ធ និងឱកាសនៃការវិនិយោគ លើវិស័យអាទិភាព​សំខាន់ៗ ដែលមានសក្តានុពល តែនៅមិនទាន់ទទួលបានការវិនិយោគគ្រប់គ្រាន់សាកសមនៅឡើយ។

លើសពីនេះទៀត លោកអភិបាលរង ក៏បានពន្យល់អំពីស្ថានភាពបច្ចុប្បន្ន វិធានការនានាក្នុងការដោះស្រាយ​គម្រោងវិនិ​យោគ​ជាប់គាំងដែលបានដាក់ចេញដោយរាជរដ្ឋាភិបាលកម្ពុជា និងបានស្នើឱ្យវិនិយោគិនងាកមកចាប់អារម្មណ៍​វិនិ​យោគ​បន្តនូវអគារដែលមិនទាន់រួចរាល់ជាស្ថាពរក្នុងខេត្តព្រះសីហនុផងដែរ។

លោក ឡុង ឌីម៉ង់ បានថ្លែងបន្ថែមថា តាមទិន្នន័យដែលទទួលបានពីកំពង់ផែស្វយ័តក្រុងព្រះសីហនុ សហរដ្ឋអាមេរិក គឺជាគោលដៅនាំចេញទំនិញធំជាងគេបំផុត ដែលមានបរិមាណប្រមាណ ៣៤%នៃទំនិញនាំចេញសរុបរបស់កម្ពុជា។

បើតាមលោក ឡុង ឌីម៉ង់ ខេត្តព្រះសីហនុបានត្រៀមខ្លួនរួចជាស្រេចសម្រាប់ទទួល​ស្វាគមន៍វិនិយោគិនបរទេស​បន្ថែម​ទៀត ជាពិសេសគណៈប្រតិភូពាណិជ្ជករ អាមេរិកតែម្តង។

សូមបញ្ជាក់ថា តាមរយៈការសម្របសម្រួលពីរដ្ឋបាលខេត្តព្រះសីហនុ ប្រតិភូ Amcham បានធ្វើទស្សនកិច្ចទៅ កាន់ទី​តាំង​សំខាន់ៗរបស់ខេត្ត មានដូចជា៖ កំពង់ផែស្វយ័តក្រុងព្រះសីហនុ, តំបន់ភណ្ឌាគារគយ, តំបន់អភិវឌ្ឍ Bay of lights, តំបន់សេដ្ឋកិច្ចពិសេសក្រុងព្រះសីហនុ និងរោងចក្រផលិតក្តារកម្រាល AHF ជាដើម៕