ធនាគារជាតិ និង UNESCAP ទស្សនកិច្ចសិក្សាស្តីពីការដាក់បញ្ចូល​បរិយាបន្នហិរញ្ញវត្ថុ

ធនាគារជាតិនៃកម្ពុជា សហការជាមួយអង្គការUNESCAP រៀបចំកម្មវិធីទស្សនកិច្ចសិក្សាស្តីពីបរិយាបន្នហិរញ្ញវត្ថុ នៅព្រឹកថ្ងៃទី២៩ ខែវិច្ឆិកា ឆ្នាំ២០២៣ ចូលរួមដោយប្រតិភូនិងសហការីមកពីប្រទេសកូឡុំប៊ី ហ្វីជី ម៉ាឡេស៊ី ប៊ូតង់ និងនេប៉ាល់។

ថ្លែងបើកកម្មវិធីទស្សនកិច្ចសិក្សាស្តីពីបរិយាបន្នហិរញ្ញវត្ថុ លោក យឹម លាត ទេសាភិបាលរង ធនាគារជាតិនៃកម្ពុជា បានលើកឡើងថា កម្មវិធីទស្សនកិច្ចសិក្សាអនុវត្តសហគមន៍លើកដំបូងរបស់អង្គការ UNESCAP ស្តីពីការដាក់​បញ្ចូលហិរញ្ញវត្ថុនាពេលនេះគឺជាឱកាស និងជាវេទិកាបណ្តាញដ៏ល្អសម្រាប់អ្នកជំនាញទាំងអស់ នៅទូទាំងសហគមន៍កា​រ​ដាក់បញ្ចូលហិរញ្ញវត្ថុសកល ចែករំលែកទស្សនៈ និងបទពិសោធន៍ជាក់ស្តែង ដើម្បីកែលម្អបន្ថែមទៀត នូវការរួមបញ្ចូល​ផ្នែក​ហិរញ្ញវត្ថុ។

លោកបានបន្តថា ដំណើរទស្សនកិច្ចសិក្សានេះ ក៏ជាឱកាសមួយសម្រាប់បុគ្គលិកធនាគារជាតិ ដើម្បីស្វែងយល់​ពីសហការីមកពីប្រទេសផ្សេងៗទៀតផងដែរ។

លោកបានបន្តទៀតថា«ការដាក់បញ្ចូលហិរញ្ញវត្ថុ គឺជាដំណើរមួយ ទោះបីជាបានធ្វើច្រើនក៏ដោយ បើគ្មានកិច្ចសហការ និងការសម្របសម្រួលពីគ្រប់ភាគីពាក់ព័ន្ធ នឹងមិនអាចសម្រេចបានច្រើននោះទេ។ ដូចសុភាសិតមួយពោលថា “បើយើង​ចង់ទៅឆ្ងាយ ត្រូវទៅជាមួយគ្នា”»។

លើសពីនពេះទៀតការដាក់បញ្ចូលហិរញ្ញវត្ថុបាននិងកំពុងដើរតួនាទីយ៉ាងសំខាន់ក្នុងការទ្រទ្រង់កំណើនសេដ្ឋកិច្ច និងកាត់បន្ថយវិសមភាពប្រទេស និងភាពក្រីក្រនៅកម្ពុជា។

នៅក្នុងឱកាសនោះដែរ លោកបានលើកឡើងថា ដោយមានកិច្ចសហប្រតិបត្តិការពីភាគីពាក់ព័ន្ធនានា ធនាគារជាតិ បាននិងកំពុងអនុវត្តកម្មវិធីចំណេះដឹងផ្នែកហិរញ្ញវត្ថុ និងការដាក់បញ្ចូលហិរញ្ញវត្ថុជាច្រើន ដើម្បីលើកកម្ពស់ចំណេះ​ដឹងផ្នែកហិរញ្ញវត្ថុ និងឌីជីថលនៅកម្ពុជា។

លោក បានបញ្ជាក់ថា ធនាគារជាតិបានធ្វើទំនើបកម្ម និងហេដ្ឋារចនាសម្ព័ន្ធហិរញ្ញវត្ថុឌីជីថល ជាពិសេសប្រព័ន្ធទូទាត់ ដែលចាំបាច់សម្រាប់ជីវិតប្រចាំថ្ងៃរបស់ប្រជាជនកម្ពុជា ដូចជា ប្រព័ន្ធទូទាត់ជាតិ ការទូទាត់រហ័ស ការទូទាត់លក់រាយ និងប្រព័ន្ធបាគង ជាដើម។  KHQR មិនត្រឹមតែត្រូវបានគេប្រើយ៉ាងទូលំទូលាយសម្រាប់​ការទូទាត់នៅក្នុងប្រទេសកម្ពុជា​ប៉ុណ្ណោះទេ ប៉ុន្តែវាអនុញ្ញាតឱ្យធនាគារជាតិនៃកម្ពុជា បង្កើតប្រព័ន្ធទូទាត់ឆ្លងដែន​ក្នុងប្រទេសផ្សេងទៀត។ 

ការបង្កើតថ្មីនៃការទូទាត់ទាំងនេះ បានរួមបញ្ចូលចំនួនប្រជាជន ដែលមិនទាន់បានបម្រើ និងមិនបាន​បម្រើដល់​សេវាកម្មហិរញ្ញវត្ថុផ្លូវការ ដោយអនុញ្ញាតឱ្យពួកគេចូលប្រើសេវាកម្មទូទាត់ក្នុងតម្លៃទាបនៃប្រតិបត្តិការ ងាយស្រួល មានសុវត្ថិភាព និងទាក់ទាញ។

គួរបញ្ជាក់ថា ធនាគារជាតិនៃកម្ពុជា បានបង្កើតឱ្យមានគំនិតផ្តួចផ្តើមជាច្រើនក្នុងការរៀបចំយន្តការគាំទ្រហិរញ្ញប្បទាន​ប្រកបដោយចីរភាព ដែលក្នុងនោះរួមមាន ការរៀបចំឱ្យមានផែនទីចង្អុលផ្លូវសម្រាប់ការជំរុញហិរញ្ញប្បទាន​ប្រកបដោយ​ចីរភាព សម្រាប់គាំទ្រលំហូរមូលធន ការដាក់ចេញនូវក្របខណ្ឌនៃការរាយការណ៍ និងការកសាងសមត្ថភាព ជាដើម៕អត្ថបទ ៖ សំអឿន