ព័ត៌មានជាតិ

កសិករខេត្តបាត់ដំបង សម្រុកធ្វើស្រែប្រាំងលើសផែនការ

បានផុស

២ years មុន

នៅ

ថ្ងៃសៅរ៍ ២៣ ធ្នូ ២០២៣

ដោយ

ប្រជាកសិករ នៅស្រុកមួយចំនួននៃខេត្តបាត់ដំបង បាននិងកំពុងសម្រុកធ្វើស្រែប្រាំងនៅចុងរដូវ ដើម្បីទទួលបានទិន្នផលបន្ថែមនៅចុងឆ្នាំ។

អ្នកស្រី សុផាត កសិករមួយរូប រស់នៅឃុំតាគ្រាម ស្រុកបាណន់ ខេត្តបាត់ដំបង បានឱ្យដឹងថា នៅក្នុងឆ្នាំ២០២៣នេះ ក៏មិនខុសពីឆ្នាំមុននោះទេរ អ្នកស្រី បានធ្វើស្រែប្រាំងកើនឡើងជាងឆ្នាំមុនចំនួន ២ហិកតាបន្ថែមទៀត ព្រោះដោយសារកត្តាអំណោយផលទឹកភ្លៀងចុងរដូវនៅសល់តាមអូរ និងបឹងច្រើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រី សុផាត បានលើកឡើងមកកាន់«កម្ពុជាថ្មី» ថា ជីវភាពរស់នៅប្រចាំថ្ងៃ ក៏ដូចជាការផ្គត់ផ្គង់ស្រូវអង្ករនៅក្នុងគ្រួសាររបស់អ្នកស្រីមិនមានអ្វីដែលជាបញ្ហាប្រឈមឡើយ។ នេះក៏ដោយសារតែ អ្នកស្រី បានធ្វើស្រែពីររដូវកាល គឺនៅស្រូវវស្សា និងស្រូវប្រាំង។

ស្របពេលជាមួយគ្នានេះ មន្ត្រីឃុំតាគ្រាម បានលើកឡើងថា «ឆ្នាំនេះមិនថាតែនៅឃុំតាគ្រាមនោះទេ សូម្បីតែប្រជាកសិកររស់តាមឃុំផ្សេងទៀតក្នុងស្រុកបាណន់ ក៏នាំគ្នាសម្រុកធ្វើស្រែប្រាំងដែរ ព្រោះទាន់នៅមានទឹកតាមតំបន់ច្រើនជាងឆ្នាំមុន។ ហើយឆ្នាំនេះ ប្រហែលជាស្រូវអង្កអាចបបូរជាងឆ្នាំមុន ដោយសារតែទឹកភ្លៀងនៅមានអំណោយផល ទាំងមិនទាន់ទាញយកទឹកពីប្រព័ន្ធធារាសាស្ត្រអាងកំពីងពួយមកប្រើ»។

មន្ទីរកសិកម្មខេត្តបាត់ដំបង បានឲ្យដឹងថា ឆ្នាំនេះប្រជាកសិករនៅតាមបណ្ដាស្រុក ដែលជាភូមិសាស្ត្រធ្វើស្រែប្រាំង អាចនឹងធ្វើលើសពីផែនការកំណត់ ដោយសារការអំណោយផលពីប្រភពទឹកភ្លៀងបានបន្សល់ច្រើននៅតាមប្រឡាយក្នុងតំបន់ឃុំស្រុកមួយចំនួន។

បើតាមមន្ទីរកសិកម្មខេត្ត ការដាំដុះស្រូវស្រែប្រាំងរបស់ប្រជាកសិករឆ្នាំនេះ មានចំនួនជាង ៥ម៉ឺនហិកតា ដោយក្នុងនោះ ស្រូវប្រាំងឆ្នាំនេះ មានការកើនឡើងជាងឆ្នាំកន្លងទៅ និងលើសពីផែនការរបស់មន្ទីរជំនាញដែលបានកំណត់។

យោងតាមរបាយការណ៍របស់មន្ទីរធនធានទឹក និងឧតុនិយមខេត្ត បានបង្ហាញថា ការដាំដុះស្រូវប្រាំងឆ្នាំ២០២៣-២០២៤ ខាងមុខ មន្ទីរធនធានទឹក អនុញ្ញាតឲ្យប្រជាកសិករទូទាំងខេត្ត ធ្វើស្រែប្រាំងត្រឹម ២១.០០០ហិកតាប៉ុណ្ណោះ ដើម្បីតម្រូវការតាមទំហំទឹកដែលមានស្ដុកត្រៀមបម្រុងទុកតាមបណ្ដាប្រព័ន្ធធារាសាស្ត្រក្នុងខេត្ត។ ប៉ុន្តែការកើនឡើងនេះ ដោយសារតែប្រជាកសិករបានអនុវត្តជាក់ស្ដែងជាមួយនឹងប្រភពទឹកដែលអំណោយផលពីទឹកភ្លៀងចុងរដូវ នៅសេសសល់ច្រើនតាមប្រឡាយក្នុងតំបន់ផ្សេងៗគ្នា៕

អត្ថបទ៖ សៅ សារិទ្ធ