សត្វប្រចៀវឆក់ទេសចរ​​បរទេស​ទៅ​ទស្សនា​​មិនចេះ​​ដាច់ ​​មួយខែៗ​មិន​ក្រោម​ ១ ពាន់នាក់

ហ្វូងសត្វប្រចៀវនៅល្អាងភ្នំសំពៅ បានក្លាយជាមេដែកឆក់យកភ្ញៀវទេសចរចម្រុះជាតិសាសន៍​មកទស្សនាមានកំណើនជា​រៀងរាល់ថ្ងៃ​។ ចលនានៃ​ការ​មក​​ទស្សនាហ្វូងសត្វប្រចៀវនៅ​ភ្នំសំពៅ​ក្នុង​ខេត្ត​បាត់ដំបង​ បានផ្តល់ជា​ប្រភព​ចំណូល​សេដ្ឋកិច្ចដល់​ពលរដ្ឋនៅក្នុង​តំបន់ តាមរយះការលក់ដូរនំចំណីអាហារផ្សេងៗទ្រង់ទ្រង់ដល់ជីវភាព​រស់នៅ​ដោយ​មិន​ចាំបាច់ធ្វើ​ចំណាកស្រុក​ទៅ​​ធ្វើការឆ្ងាយ​ពី​ផ្ទះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ក្រម រឿយ ជាអ្នកនាំភ្ញៀវអន្តរជាតិទស្សនាល្អាងប្រចៀវបានឲ្យដឹងថា នៅដើមឆ្នាំ ២០២៤ កំណើនភ្ញៀវអន្តរជាតិកាន់តែកើនឡើង ដោយសារតែពួកគេចង់ឃើញហ្វូងសត្វប្រចៀវហោះហើរដោយរបៀបណា? ពួកគេហើរទៅទីណា?។ អ្នកនាំភ្ញៀវរូបនេះបន្តថា នៅវេលាម៉ោង ៥:០០ នាទី ឬ ម៉ោង ៥:១៥ នាទីល្ងាច ហ្វូងប្រចៀវចាប់ផ្តើមហោះហើរចេញញពីល្អាង ពេលនោះភ្ញៀវអន្តរជាតិបាននាំគ្នាសម្លឹងមើលស្ទើរមិនប៉ព្រិចភ្នែក ហើយនាំគ្នាថតសកម្មភាពប្រចៀវកំពុងហោះហើរជាជូរ ដើម្បីយកទៅបង្ហាញសាច់ញាតិ ឬមិត្តភ័ក្តរបស់ពួកគេរៀងៗខ្លួននៅឯកស្រុកកំណើតដើម្បីឲ្យមកទស្សនា។

លោកបន្តថា “ពេលដល់ម៉ោងវាចេញហោះហើរ មិនបែកគ្នាឆ្វេចឆ្វាចទេ គឺវាហើរតាមជួររបស់វា មើលទៅហាក់ដូចជាហ្វូងកងទ័ពអ៊ីចឹង បើគិតពីល្អាងវាហោះហើរបានចម្ងាយចាប់ពី ១ ទៅ ២ គីឡូម៉ែត្រ ទើបវាបំបែកគ្នាជាក្រុមៗ ដោយក្រុមខ្លះទៅបឹងទន្លេសាប និងក្រុមខ្លះទៀតទៅសមុទ្រ”។

លោកបន្តថា នៅតំបន់ភ្នំសំពៅបានក្លាយជាតំបន់ដែលមានសក្តានុពលសម្រាប់រកចំណូលរបស់ប្រជាពលរដ្ឋ តាមរយះការលក់ដូរចំណីអាហារផ្សេងៗ និងរបស់របរអនុស្សាវរីជាដើម។ ក្រៅពីរកចំណូលបានពីការលក់ដូរពួកគាត់ក៏ទាញចំណូលពីបន្ទប់ទឹកឬបន្ទប់អនាម័យផងដែរ ហើយខ្ញុំក៏សប្បាយចិត្តជំនួសពួកគាត់”។

ក្រុមអាជីវករបានឲ្យដឹងប្រហាក់ប្រហែលគ្នាថា ពួកគាត់សប្បាយចិត្តដែលបានប្រកបរបរនៅជិតផ្ទះ ហើយចំណូលបានគ្រាន់បាន​ពីការលក់ដូរចំណីអាហារ ភេសជ្ជះ និងរបស់របរអនុស្សាវរីយ៍ផ្សេងទៀត។ ក្នុងសកម្មភាពយកដូងជូនភ្ញៀវ ដែលកំពុងអង្គុយដង្ហែរគ្នា រង់​ចាំហ្វូងប្រចៀវចេញសម្តែងឲ្យទស្សនា អ្នកស្រី ស្រី ពៅ បានឲ្យដឹងថា “ផ្លែដូងខ្ញុំលក់ដាច់ភ្ញៀវបរទេសគាត់ចូលចិត្តផឹកទឹកដូង ព្រោះដូងដែលខ្ញុំបានដាំប៉ុន្មានដើមនៅដីភូមិ ទឹកវាផ្អែមរស់ជាតិឆ្ងាញ់ទាំងសាច់​ដូង​ផង​ចឹង​ហើយទើបគាត់ចូលចិត្តផឹក”។

ស្រ្តី​រូបនេះ​បន្ត​ថា “ភ្ញៀវខ្លះផឹកម្នាក់ចាប់ពី ២ ទៅ ៣ ដូង ស្ទើរតែរកដូងលក់មិនទាន់។ ពេលខ្លះខ្ញុំទិញតពីអ្នកភូមិជាមួយគ្នា មកលក់បន្តគ្រាន់​បានចំណេញក្បាលកាក់ខ្លះ”។

ពាក់ព័ន្ធនិងកំណើនភ្ញៀវបរទេសមកទស្សនាកម្សាន្តនៅតំបន់ភ្នំសំពៅ ដើម្បីមើលហ្វូងសត្វប្រចៀវនេះ លោក ហម អរុណ អនុប្រធានមន្ទីរទេសចរណ៍ខេត្តបាត់ដំបងធ្លាប់បានឲ្យកម្ពុជាថ្មីដឹងថា ស្ថិតិទេសចរអន្តរជាតិទៅទស្សនានៅរមណីយដ្ឋានភ្នំសំពៅមានជាមធ្យមប្រមាណជាង ១,៥០០ នាក់ ក្នុងមួយខែ។ ចំពោះខែ High season (រដូវមានភ្ញៀវច្រើន) ចន្លោះ ខែមករា ដល់ ខែមីនា មានរហូតដល់ជាង ៣,០០០ នាក់ ក្នុងមួយខែ។

លោករំពឹងថា តំបន់នេះនឹងទាក់ទាញកំណើនជនបរទេសមកទស្សនាកាន់តែច្រើនឡើង ហើយលោកនឹងប្រឹងប្រែងរៀបចំជាបន្តបន្ទាប់ទៀតនៅតាមកន្លែងដែលជាគោលដៅនៅតំបន់មួយនេះ៕

អត្ថបទ៖ សៅ សារិទ្ធ