សម្តេចធិបតី ចាត់ទុកព្រឹត្តិការណ៍សំណេរអង្គរ​ ជាការជំរុញទឹកចិត្តយុវជនឱ្យកាន់តែស្រឡាញ់អក្សរសាស្ត្រខ្មែរ

បន្ទាប់ពីរកឃើញម្ចាស់ជ័យលាភីនៃកម្មវិធីប្រឡងសរសេរតាមអានថ្នាក់ជាតិជាសាធារណៈក្នុងព្រឹត្តិការណ៍សំណេរអង្គរ ដែលបានប្រព្រឹត្តឡើងនៅថ្ងៃទី២១ ខែមករា ឆ្នាំ២០២៤ សម្តេចធិបតី ហ៊ុន ម៉ាណែត បានសម្ដែងការអបអរសាទរដល់ ម្ចាស់ជ័យលាភីទាំង៣រូប។ សម្តេចធិបតី ចាត់ទុកព្រឹត្តិការណ៍សំណេរអង្គរនេះ ជាការជំរុញទឹកចិត្តឱ្យយុវជនកាន់តែស្រឡាញ់អក្សរសាស្ត្រជាតិខ្មែរ។

ម្ចាស់ជ័យលាភីទាំង៣រូប នៃកម្មវិធីប្រឡងសរសេរតាមអានថ្នាក់ជាតិជាសាធារណៈក្នុងព្រឹត្តិការណ៍សំណេរអង្គរ រួមមាន ជ័យលាភីលេខ១ គឺបេក្ខជន ចេង រតនា ជ័យលាភីលេខ២ បេក្ខជន វ៉ន វីដា និងជ័យលាភីលេខ៣ គឺបេក្ខនារី យ៉ោប សុឃាក់។

សម្តេចធិបតី ហ៊ុន ម៉ាណែត បញ្ជាក់ថា ព្រឹត្តិការណ៍នេះ បានរំលេចនូវទិដ្ឋភាពក្នុងការលើកកម្ពស់ និងជំរុញទឹកចិត្តឱ្យកូនខ្មែរកាន់តែស្រឡាញ់អក្សរសាស្ត្រខ្មែរ ព្រមទាំងផ្សព្វផ្សាយបន្ថែមនូវរមណីយដ្ឋានដ៏មហស្ចារ្យក្នុងពិភពលោក ដែលផ្សារភ្ជាប់នឹងតថភាពវប្បធម៌ដ៏ល្អល្អះរបស់ព្រះរាជាណាចក្រកម្ពុជា។ សម្តេចធិបតី ថា ព្រឹត្តិការណ៍នេះ ក៏បានផ្សារភ្ជាប់ទៅនឹងយុទ្ធសាស្ត្របញ្ចកោណ-ដំណាក់កាលទី១ នៃរាជរដ្ឋាភិបាល នីតិកាលទី៧ ដោយផ្តោតសំខាន់លើការអភិវឌ្ឍនូវមូលធនមនុស្ស ដែលជាកាតាលីករមិនអាចខ្វះបាន ក្នុងការធ្វើពិពិធកម្មសេដ្ឋកិច្ច ដើម្បីឈានឆ្ពោះ និងសម្រេចបាននូវចក្ខុវិស័យកម្ពុជា២០៣០ និងមហិច្ចតាក្លាយជាប្រទេសមានចំណូលខ្ពស់ក្នុង ឆ្នាំ២០៥០ របស់កម្ពុជា។ ជាពិសេស នៅក្នុងមុំទី១ នៃបញ្ចកោណទី១ រដ្ឋាភិបាលបានផ្តោតសំខាន់ទៅលើការពង្រឹងគុណភាពវិស័យអប់រំ ដោយបន្តពង្រឹងគុណភាពអប់រំ និងការបណ្តុះបណ្តាលគ្រប់កម្រិត ព្រមទាំងបង្កើតបរិយាកាសល្អសម្រាប់ការសិក្សាពេញមួយជីវិត។

ទន្ទឹមនេះ ប្រមុខរាជរដ្ឋាភិបាល ក៏បានកោតសរសើរ និងវាយតម្លៃខ្ពស់ដល់ក្រុមស្ថាបនិកនៃព្រឹត្តិការណ៍សំណេរអង្គរ តំណាងដោយលោក លីម ប៊ុនហុក ក៏ដូចជាការគាំទ្ររបស់ក្រសួងអប់រំ យុវជន និងកីឡា, ក្រសួងវប្បធម៌ និងវិចិត្រសិល្បៈ, ក្រសួងទេសចរណ៍, អាជ្ញាធរ, សាកលវិទ្យាល័យអង្គរ, សហការី និងភាគីពាក់ព័ន្ធក្នុងការរៀបចំទាំងអស់ ដែលបានសហការបង្កើតកម្មវិធីសំណេរអង្គរ នាពេលនេះឡើង នៅលើស្ពានហាលខាងលិចប្រាសាទអង្គរវត្ត ប្រកបដោយស្មារតីក្នុងការពង្រឹងបន្ថែមនូវចំណេះដឹងទូទៅ អត្តសញ្ញាណជាតិ សាមគ្គីភាព ក៏ដូចជាលើកតម្កើងអក្សរសាស្ត្រឱ្យកាន់ផុលផុសបន្ថែមទៀត។

គួររម្លឹកថា សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងឱកាសសំណេះសំណាលជាមួយសិស្សជយលាភីនិទ្ទេស A ចំនួន១ ៦៩១នាក់ និងសិស្សចំនួន ១៨នាក់ ដែលប្រឡងសញ្ញាបត្របច្ចេកទេស និងវិជ្ជាជីវៈកម្រិត៣ បានផ្តាំផ្ញើឱ្យកូនខ្មែរ ត្រូវចេះភាសាខ្មែរ៕