នាវាយក្សដឹកទេសចរជាង ៥០០ នាក់ចូលចត​នៅកំពង់ផែ​ក្រុងព្រះសីហនុ

នាវាទេសចរណ៍មួយគ្រឿងបានចូលចតប្រកបដោយសុវត្ថិភាពនៅព្រឹកថ្ងៃទី ២២ ​ខែកុម្ភៈ ឆ្នាំ២០២៤​នេះដោយនាំភ្ញៀវទេសចរ និងកងនាវិកជិត១ពាន់នាក់ចូលចតនៅកំពង់ផែស្វយ័តក្រុងព្រះសីហនុ។

តាមការគ្រោងទុកនាវាដែលធ្វើដំណើរមកពីប្រទេសថៃ ចូលមកប្រទេសកម្ពុជានឹងចាកចេញពីកំពង់ផែក្រុងព្រះសីហនុឆ្ពោះទៅប្រទេសវៀតណាមនៅម៉ោង ២០ យប់ថ្ងៃដដែលនេះ។

មន្ត្រីនគរបាលអន្តោប្រវេសច្រកទ្វាកំពង់អន្តរជាតិក្រុងព្រះសីហនុបានប្រាប់ថា បន្ទាប់នាវាចូលចតដោយសុវត្ថិភាព ក្រុមភ្ញៀវទេសចរខ្លះនាំគ្នាដើរ និងភ្ញៀវចំនួនច្រើនបានឡើងជិះរថយន្តក្រុងធ្វើដំណើរទេសចរនៅតាមទីប្រជុំជនមាន ផ្សារលើ តំបន់ទំនប់រលក តាមរមណីយដ្ឋានសំខាន់ៗ​ និងនៅតាមទីវត្តអារាម​ក្នុងក្រុងព្រះសីហនុ។

មន្ត្រីដដែលបានប្រាប់ថា នាវានេះ Sea Bourn Encure សញ្ជាតិ Ba HaMas មានបណ្តោង២១០.៥ម៉ែត្រ មានទទឹង​២៨ម៉ែត្រ ជំរៅទឹក៦ម៉ែត្រ។

នាវានេះបានធ្វើដំណើរមកពីប្រទេសថៃ នាំភ្ញៀវទេសចរ ៥៦១នាក់  ស្រី២៨៦នាក់ មាន២៦ សញ្ជាតិ និងមានក្រុមនាវិកចំនួន៤២០នាក់ ស្រី៩៩នាក់ មាន៤៧ សញ្ជាតិ៕

អត្ថបទ៖ ស៊ុយ ចាន់ធា