ព័ត៌មានជាតិ

មន្ត្រីជំនាញ ណែនាំពលរដ្ឋ កុំព្រួយបារម្ភ មូសអង្កាម មិនមែនជាភ្នាក់ងារចម្លងជំងឺដូច មូសខ្លា និងមូសដែកគោល នោះទេ

បានផុស

២ years មុន

នៅ

ថ្ងៃសុក្រ ១ មីនា ២០២៤

ដោយ

មន្ត្រីជំនាញសុខភាព បានណែនាំប្រជាពលរដ្ឋ កុំមានការព្រួយបារម្ភចំពោះមូសអង្កាម ព្រោះវាមិនមែនជាភ្នាក់ងារចម្លងជំងឺសកម្មដូចមូសខ្លា និងមូសដែកគោល នោះទេ ពោលពេលវាខាំគ្រាន់តែរំខានដល់ការរស់នៅប្រចាំថ្ងៃប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ បានមានប្រសាសន៍ថា មូលអង្កាមច្រើនរស់នៅតាមទឹកលូ និងទឹកសម្អុយនានា ហើយយើងអាចសម្គាល់មូសប្រភេទនេះបានតាមរយៈពណ៌សម្បុររបស់វា ក្រមៅ ហើយមិនមានក្រឡាបង្កង់ឆ្នូតសខ្មៅដូចជាមូសខ្លានោះទេ។ មូសប្រភេទនេះ បើវាខាំ គ្រាន់តែធ្វើឱ្យយើងរមាស់ រំខានដល់ជីវិតរស់នៅប្រចាំថ្ងៃ ពិសេសរំខានដំណេក មិនបង្កការឆ្លងជំងឺផ្សេងៗ ដូចមូសខ្លា ធ្វើឱ្យកើតជំងឺគ្រុនឈាម និងមូសដែកគោលធ្វើឱ្យកើតជំងឺគ្រុនចាញ់នោះទេ។

លោកវេជ្ជបណ្ឌិត បានពន្យល់ថា មូលហេតុដែលនាំឱ្យកើតមានមូសអង្កាមនេះ អាចពាក់ព័ន្ធទៅនឹងកត្តាបោះចោលសំរាមក្នុងលូទឹកស្អុយ ធ្វើឱ្យកកស្ទះ មិនអាចឱ្យទឹកហូរចេញបាន ឬ ទឹកដក់ក្នុងវត្ថុផ្សេងៗ បង្កើតជាដង្កូវទឹក វិវឌ្ឍន៍ទៅរកកំណើតមូសនេះ។ មិនអនាម័យផ្ទះសម្បែង ដោយទុកសម្បកកង់ សម្បកដូងចោល។ មិនបានកាយសំរាមនៅក្នុងប្រព័ន្ធបង្ហូរទឹក ឬ កាយដីលុបថ្លុកដែលអាចដក់ទឹកបាន។ ទាំងអស់នេះសុទ្ធតែជាជម្រកបង្កកំណើតឱ្យមូសយ៉ាងងាយស្រួល។

លោកវេជ្ជបណ្ឌិត បានបន្តថា ដើម្បីទប់ស្កាត់កុំឱ្យកើតមូសអង្កាមទាំងនេះ ដោយរៀបចំផ្ទះសម្បែងឱ្យបានស្អាត មិនត្រូវយកសំរាមទៅចាក់ចោលនៅតាមប្រឡាយទឹក ឬ លូ នោះទេ សំអាតនៅតាមប្រឡាយ ឬ លូ ធ្វើយ៉ាងណាឱ្យទឹកហូរមានចរន្តផ្លាស់ប្ដូរ។

លោកវេជ្ជបណ្ឌិត ហ៊ុយ រ៉េកុល បានបញ្ជាក់ថា មូសអង្កាម ច្រើនតែកើតមាននៅរដូវប្រាំង ហើយរដូវធ្លាក់ខ្យល់មិនសូវជាមាននោះទេ។ បើផុតពីរដូវធ្លាក់ខ្យល់ មូសអង្កាម អាចកើតមានកាន់តែច្រើនឡើង មិនមែនតែក្នុងរាជធានីភ្នំពេញទេ ដែលសម្បូរមូសអង្កាម ទោះជានៅតាមបណ្តាខេត្តនានា ក៏មានច្រើនណាស់ដែរ ហើយពេលដល់រដូវភ្លៀងធ្លាក់ទឹកលូលែងស្អុយមានចរន្តទឹកហូរក្នុងលូ មូសអង្កាម ក៏លែងសូវមានទៀតដែរ៕

អត្ថបទ ៖ សំអឿន