រដ្ឋាភិបាល បង្កើតក្រុមការងារដើម្បីគ្រប់គ្រងផ្សព្វផ្សាយពាណិជ្ជកម្មផលិតផលគ្រឿងស្រវឹង

រាជរដ្ឋាភិបាលកម្ពុជា សម្រេចបង្កើតក្រុមការងារគ្រប់គ្រងការផ្សាយពាណិជ្ជកម្មផលិតផលគ្រឿងស្រវឹង ដើម្បីដឹកនាំជាយុទ្ធសាស្ត្រលើការគ្រប់គ្រងការផ្សព្វផ្សាយពាណិជ្ជកម្មផលិតផលមានជាតិអាល់កុល សំដៅលើកកម្ពស់សោភណភាពនៅតាមទីសាធារណៈ និងសុវត្ថិភាពអ្នកប្រើ​ប្រាស់។

ក្រុមការងារគ្រប់គ្រងការផ្សាយពាណិជ្ជកម្មផលិតផលគ្រឿងស្រវឹង សរសេរជាអក្សរកាត់ថា ក.គ.ផ.ស ដែលមានរដ្ឋមន្រ្តីក្រសួងព័ត៌មានលោក នេត្រ ភក្រ្តា ជាប្រធាន ,​រដ្ឋមន្រ្តីក្រសួងពាណិជ្ជកម្មលោកស្រី ចម និម្មល រដ្ឋមន្រ្តីក្រសួងសុខាភិបាល លោក ឈាង រ៉ា និងរដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លោក ហែម វណ្ណឌី  ជាអនុប្រធាន។ បន្ថែមពីនេះក៏មានសមាសភាពចូលរួមជាសមាជិកមកពី ទីស្តីការគណៈរដ្ឋមន្ត្រី ក្រសួងមហាផ្ទៃ ក្រសួងវប្បធម៌និងវិចិត្រសិល្បៈ និងក្រសួងប្រៃសណីយ៍ និងទូរគមនាគមន៍ ជាដើម។

សេចក្តីសម្រេចរបស់នាយករដ្ឋមន្រ្តី សម្តេចធិបតី ហ៊ុន ម៉ាណែត ដែលត្រូវបានផ្សព្វផ្សាយជាសាធារណៈនៅថ្ងៃទី ២៩ ខែមេសា ឆ្នាំ ២០២៤ បានគូសបញ្ជាក់ថា ក.គ.ផ.ស មានភារកិច្ច ដឹកនាំជាយុទ្ធសាស្ត្រលើការគ្រប់គ្រងការផ្សព្វផ្សាយពាណិជ្ជកម្មផលិតផលគ្រឿងស្រវឹង, តម្រង់ទិសក្នុងការរៀបចំយន្តការអនុវត្ត និងបទដ្ឋានបច្ចេកទេសលើការគ្រប់គ្រងការផ្សព្វផ្សាយ ពាណិជ្ជកម្មផលិតផលគ្រឿងស្រវឹង។
ត្រូវកំណត់វិធានការបច្ចេកទេសសម្រាប់ការផ្សព្វផ្សាយពាណិជ្ជកម្មផលិតផលគ្រឿងស្រវឹង ធានាបានកិច្ចការពារអ្នកប្រើប្រាស់និងជំរុញការប្រកួតប្រជែងដោយសុចរិត និង រៀបចំសណ្តាប់ធ្នាប់នៃការផ្សព្វផ្សាយពាណិជ្ជកម្មផលិតផលគ្រឿងស្រវឹងតាមគ្រប់មធ្យោបាយប្រព័ន្ធ ផ្សព្វផ្សាយ និងការដាក់តាំងបង្ហាញជាសាធារណៈនៅគ្រប់ទីកន្លែង ដើម្បីលើកកម្ពស់សោភណភាព និងសុវត្ថិភាព។

បើតាមសេចក្តីសម្រេចនេះ៖«ក.គ.ផ.ស មានសិទ្ធអញ្ជើញតំណាងក្រសួង​ ស្ថាប័ន ដៃគូពាក់ព័ន្ធនានា វិស័យឯកជន និងសមាគមទូរទស្សន៍ វិទ្យុ និងសារព័ត៌មានចូលរួមពិគ្រោះយោបល់តាមការចាំបាច់ និងមានសិទ្ធិកៀរគរថវិកាពីប្រភពស្របច្បាប់ផ្សេងៗ ដើម្បីដំណើរការងាររបស់ខ្លួន»។

នៅសម័យប្រជុំពេញអង្គគណៈរដ្ឋមន្រ្តី កាលពីខែកុម្ភៈ ឆ្នាំ ២០២៤ សម្តេចធិបតី ហ៊ុន ម៉ាណែត បានបញ្ជាឱ្យអាជ្ញាធរពាក់ព័ន្ធនានាពិនិត្យមើលឡើងវិញអំពីការផ្សព្វ​ផ្សាយ​ពាណិជ្ជកម្មគ្រឿងស្រវឹង ជាពិសេសការផ្សព្វផ្សាយនៅលើផ្ទាំងប៉ាណូតាមទីសាធារណៈ ដោយត្រូវកម្រិតឱ្យបានសមរម្យ ដើម្បីរួមចំណែកក្នុងការកាត់បន្ថយគ្រោះថ្នាក់ចរាចរណ៍ដែលបង្កឡើងដោយ​សារ​ការបើកបរក្រោមឥទ្ធិពលគ្រឿងស្រវឹង។
ជុំវិញបញ្ហានេះ នាយក​អង្គការ​មូលនិធិ​បង្ការ​របួស​អាស៊ី​ប្រចាំ​កម្ពុជា​លោក គឹម បញ្ញា ធ្លាប់បានលើកឡើងថា គ្រោះថ្នាក់ចរាចរណ៍ដែលអាចកាត់បន្ថយបានត្រូវមានវិធានការចាំបាច់មួយចំនួនដូចជាការរឹតបន្តឹងច្បាប់ចរាចរណ៍ រឹតបន្តឹងការបើកបរក្រោមឥទ្ធិពលគ្រឿងស្រវឹង និងបើកបរលើសល្បឿនកំណត់។ លោកថ្លែងថា៖«ការអនុវត្តច្បាប់ជារឿងមួយ ប៉ុន្តែអ្វីដែលយើងត្រូវធ្វើ ត្រូវគិតពិចារណាឱ្យមានគោលនយោបាយ និងច្បាប់គ្រប់គ្រងគ្រឿងស្រវឹង ការតម្លើងពន្ធលើគ្រឿងស្រវឹង ដើម្បីធ្វើម៉េចកាត់បន្ថយលទ្ធភាពអ្នកប្រើប្រាស់គ្រឿងស្រវឹង»។

នៅក្នុង​ពិធី​បិទ​សន្និបាត​បូកសរុប​លទ្ធផល​ការងារ​ឆ្នាំ ​២០២៣ របស់​ក្រសួង​ព័ត៌មាន កាលខែមករា ឆ្នាំ ២០២៤​ សម្តេចធិបតី ហ៊ុន ម៉ា​ណែ​ត បាន​បញ្ជា​ឱ្យ​អាជ្ញាធរ​ពាក់ព័ន្ធ​ពង្រឹង​ការត្រួត​ពិនិត្យ​ជាតិ​អាល់កុល​លើ​អ្នកបើកបរ​ដោយ​​លើកឡើងថា គ្រោះថ្នាក់​ធំជាងគេ គឺ​គ្រោះថ្នាក់​ចរាចរណ៍​ដែល​មកពី​ការសេព​គ្រឿង​ស្រវឹង​។​ លោកបានថ្លែង​​ថា​៖«​ត្រូវធ្វើ​ម៉េច​ទប់​អាហ្នឹង​(​ជាតិ​អាល់កុល​)​កុំឱ្យ​វា​ចូលខ្លួន ហើយ​ត្រូវ​បើកបរ​ដោយ​ប្រយ័ត្ន ត្រូវពង្រឹង​ច្បាប់ ​និងពង្រឹង​ការត្រួតពិនិត្យ​ហើយ​មហាជន​ត្រូវ​ចូលរួម​»​៕