គ្រាប់មីនមិនទាន់ផ្ទុះ ៨៩គ្រាប់ សល់ពីសង្គ្រាមត្រូវបានរកឃើញ នៅភូមិអណ្តូងថ្មមាស

គ្រាប់យុទ្ធភ័ណ្ឌមិនទាន់ផ្ទុះបន្សល់ទុកទាំងពីសម័យសង្គ្រាម ៨៩គ្រាប់ ត្រូវបានអង្គភាពកម្ចាត់មីន (CMAX) បានរុករកឃើញហើយដោះបាននៅចំណុចដីព្រៃមួយកន្លែង ក្នុងភូមិអណ្តូងថ្មមាស កាលពីថ្ងៃទី២១ ខែឧសភា ឆ្នាំ ២០២៤។

គ្រាប់មីនទាំង ៨៩គ្រាប់នេះ នៅចំណុចដីមួយកន្លែងមានទំហំ៧ហិកតា ម្ចាស់មាន ឈ្មោះ កុក អាន ស្ថិតក្នុងភូមិ អណ្តូងថ្មមាស សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។ លោក កុក អាន បានប្រាប់ឲ្យដឹងថានៅថ្ងៃទី ២១នោះ មន្ត្រីអង្គភាពកំចាត់ម៉ីន(CMAX)១ក្រុមមានគ្នាច្រើននាក់ បានទៅដោះមីននៅចំណុចដីមួយកន្លែងរបស់គាត់ពេញ១ថ្ងៃ អង្គភាពកំចាត់ម៉ីន(CMAX)បានរុករកឃើញគ្រាប់យុទ្ធភ័ណ្ឌមិនទាន់ផ្ទុះ ដែលបន្សល់ទុកតាំងពីជនាន់សង្គ្រាម ចំនួន៤ប្រភេទសរុប៨៩គ្រាប់។

អង្គភាពកំចាត់មីន (CMAX) បានឲ្យដឹងថាគ្រាប់យុទ្ធភ័ណ្ឌមិនទាន់ផ្ទុះទាំងនោះមាន ១. គ្រាប់បែកដៃ M67 ចំនួន ៨០គ្រាប់ ផលិតនៅ USA ២. គ្រាប់ត្បាល់ ៨២ ម៉ម៉ ចំនួន ២គ្រាប់ ផលិតនៅប្រទេសចិន ៣. ក្បាលផ្ទុះចំនួន ០៦គ្រាប់ ផលិតនៅប្រទេសចិន និង ៤. មីន POMZ ចំនួន ១គ្រាប់ ផលិតនៅប្រទេសសូវៀត បញ្ជាក់គ្រាប់យុទ្ធភ័ណ្ឌទាំងនោះគុណភាពខូចទាំងស្រុង។

ក្រោយពីរកឃើញហើយត្រូវបានមន្ត្រីអង្គភាពកំចាត់មីន (CMAX) យកទៅកម្ចេចចោល នៅថ្ងៃទី ២២ ខែឧសភា ឆ្នាំ ២០២៤ អស់ហើយផងដែរ ដើម្បីបញ្ជាសនូវគ្រោះថ្នាក់ដល់ប្រជាពលរដ្ឋ ពេលយកទៅដំ ឬ ដុតលេងពេលមិនទាន់កម្ចេចចោល៕

អត្ថបទ៖ វ៉ាន់ ណាង