អគ្គិភ័យឆេះផ្ទះមួយខ្នង​នៅច្បារអំពៅទាំងកណ្តាលថ្ងៃ

អគ្គិភ័យបានឆេះផ្ទះមួយខ្នងស្ថិតនៅក្រោយស្ថានីយ៍ទូរទស្សន៍ហង្សមាស នៅម៉ោង ១២៖៣០ ថ្ងៃទី ២៦ ខែកុម្ភៈនេះ បំផ្លាញផ្ទះមួយខ្នងទាំងស្រុង។

បើតាមសាក្សីនៅកន្លែងកើតហេតុបានឲ្យដឹងថា មូលហេតុនៃការឆេះនេះដោយសារទុស្សេខ្សែភ្លើង ស្ថិតត្រង់ចំណុច ក្រោយស្ថានីយ៍ទូរទស្សន៍ហង្សមាសភូមិរបោះអង្កាញ់សង្កាត់ព្រែកឯង ខណ្ឌច្បារអំពៅ រាជធានីភ្នំពេញ។

យោងតាមសេចក្តីរាយការណ៍ពីលោកវរសេនីយ៍ទោ ឯក សារ៉ន អធិការរងនគរបាលខណ្ឌច្បារអំពៅបានប្រាប់ថាអគ្គីភ័យនេះផ្តើមឡើងនៅចំវេលាថ្ងៃត្រង់។

លោកអធិការរងបន្តថាខណៈដែលអគ្គីភ័យកំពុងឆាបឆេះនេះគឺបងប្អូនប្រជាពលរដ្ឋដែលរស់នៅក្បែខាងបានយកបំពង់ពន្លត់អគ្គិភ័យទៅជួយបាញ់យ៉ាងស្រុះគ្នាដោយខ្លះតបំពង់ទឹកតាមផ្ទះទៅជួយរហូតដល់រថយន្តពន្លត់អគ្គិភ័យមួយគ្រឿងចុះទៅដល់ជួយអន្តរាគមន៍បន្ថែមទើបធ្វើឲ្យរលត់ទៅវិញតែរយះពេល៣០នាទីប៉ុណ្ណោះ។

ទោះជាយ៉ាងណាក៏ពេលនេះសមត្ថកិច្ចនិងអាជ្ញាធរកំពុងធ្វើការស្រាវជ្រាវរកមូលហេតុ៕

អត្ថបទ៖នរា