ព័ត៌មានជាតិ

៥ ខែ រន្ទះបាញ់កើតឡើងជិត ៦០ លើក បណ្ដាលឱ្យមនុស្សស្លាប់ និងរបួសជាង ៦០ នាក់

បានផុស

២ years មុន

នៅ

ថ្ងៃអង្គារ ១១ មិថុនា ២០២៤

ដោយ

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍នៅព្រឹកថ្ងៃទី ១១ មិថុនា នេះថា ក្នុងរយៈពេល ៥ ខែ ឆ្នាំ ២០២៤ នេះ បាតុភូតរន្ទះបាញ់ បានកើតឡើងចំនួន ៥៨ លើក បណ្តាលឱ្យខូចខាតផ្ទះ ១៤ ខ្នង ស្លាប់មនុស្ស ៣៣ នាក់ របួស ២៨ នាក់ និងងាប់គោក្របី ២០ ក្បាល។

លោកបានបន្តថា ក្នុងចំណោម ៥៨ ករណី ក្នុងនោះខេត្តសៀមរាបកើតឡើងច្រើនជាងគេមានរហូតដល់ ១១ ករណី បណ្តាលឱ្យស្លាប់ ៦ នាក់ បន្ទាប់មកខេត្តព្រៃវែងមានស្លាប់ ៤ នាក់ ខេត្តបន្ទាយមានជ័យស្លាប់ ៤ នាក់ ខេត្តបាត់ដំបងស្លាប់ ៣ នាក់ ខេត្តត្បូងឃ្មុំស្លាប់ ៣ នាក់ និងខេត្តឧត្តរមានជ័យស្លាប់ ៣ នាក់។ ក្រៅពីនេះខេត្តតាកែវស្លាប់ ២ នាក់ ខេត្តក្រចេះ ២ នាក់ និងខេត្តស្វាយរៀង មណ្ឌលគីរី កំពង់ធំ ព្រះសីហនុ កោះកុង និងខេត្តប៉ៃលិនស្លាប់ ១ នាក់។

លោកបានបន្តទៀតថា តួលេខនេះបើប្រៀបធៀបទៅនឹងរយៈពេល ៥ ខែដូចគ្នា ឆ្នាំ ២០២៣ កន្លងទៅ ឃើញថា មានករណីប្រហាក់ប្រហែលគ្នា តែករណីស្លាប់មានការកើនឡើងបន្តិច ដោយ ៥ ខែឆ្នាំមុន បាតុភូតរន្ទះបាញ់បានកើតឡើងចំនួន ៦០ លើក បណ្ដាលឱ្យខូចខាតផ្ទះចំនួន ៣ ខ្នង ,ស្លាប់មនុស្ស ៣១ នាក់ ,រងរបួស ២៩ នាក់ និង ងាប់គោក្របី ៥៩ ក្បាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្ថែមថា បច្ចុប្បន្នបាតុភូតរន្ទះបាញ់នេះគឺជាបញ្ហាមួយកំពុងគំរាមកំហែងធ្ងន់ធ្ងរដល់អាយុជីវិតមនុស្ស និងសត្វ គួរឱ្យព្រួយបារម្ភ។ ដូចនេះ សូមប្រជាពលរដ្ឋយកចិត្តទុកដាក់ និងប្រុងប្រយ័ត្នឲ្យបានខ្ពស់ជាទីបំផុត។ ចំណែកអាជ្ញាធរ និងភាគីពាក់ព័ន្ធ ត្រូវបន្តផ្សព្វផ្សាយពីវិធីការពារខ្លួនពីករណីបាតុភូតរន្ទះបាញ់នេះដល់ប្រជាពលរដ្ឋឲ្យបានយល់ដឹង ដើម្បីឲ្យពួកគាត់ចេះការពារខ្លួនចៀសផុតពីគ្រោះថ្នាក់ សំដៅកាត់បន្ថយអត្រាគ្រោះថ្នាក់ដោយរន្ទះបាញ់នេះកាន់តែប្រសើរ។

យោងតាមក្រសួងធនធានទឹក និងឧតុនិយម បានឱ្យដឹងថា ចាប់ពីថ្ងៃទី ១០ ដល់ថ្ងៃទី ១២ ខែមិថុនា ឆ្នាំ ២០២៤ កម្ពុជា អាចមានភ្លៀងផ្គររន្ទះ និងខ្យល់កន្ត្រាក់ គ្រប់ដណ្ដប់លើផ្ទៃដីតំបន់វាលទំនាប១៥០% តំបន់ខ្ពង់រាប ២០% និងតំបន់មាត់សមុទ្រ ២៥%៕

អត្ថបទ ៖ សំអឿន