មាន​អ្នកជាប់ពាក់ព័ន្ធ​នឹងអ្នក​ឆ្លងកូវីដ១៩ ខ្ទង់រយនាក់នៅហង្សមាស

លោក មាស ឬទ្ធី អ្នក​អត្ថាធិប្បាយ​ព័ត៌មាន​របស់​ទូរទស្សន៍​ហង្ស​មាស បានប្រាប់កម្ពុជាថ្មីមុននេះបន្តិចថា មានអ្នកជាប់ពាក់ព័ទ្ធនឹង​អ្នក​ឆ្លងកូវីដ១៩ ដោយ​ផ្ទាល់ និងប្រយោលរាប់រយនាក់នៅទូរទស្សន៍ហង្សមាស។

ប៉ុន្តែលោកមិនទាន់អាចបញ្ជាក់ពីចំនួនពិតប្រាកដនោះទេ ដោយសារតែមានអ្នកជាប់ពាក់ព័ន្ធមួយចំនួន គឺគ្រាន់តែដាក់នៅដាច់ដោយឡែក ខណៈដែលអ្នកខ្លះទៀត ត្រូវធ្វើតេស្តយកសំណាកសម្រាប់អ្នកដែលមានអាការៈមិនប្រក្រតី។

បើតាមលោក មាស ឬទ្ធី អ្នកជាប់ពាក់ព័ន្ធផ្ទាល់ និងប្រយោល មិនមែនមានតែតារានោះទេ រួមមាន អ្នកភ្លេង អ្នកដឹកជញ្ជូន លោកថា អ្នកដែលមានសុខភាពមិនប្រក្រតី ត្រូវយកសំណាក និង​ដាក់ឱ្យនៅដាច់ដោយឡែក ប្រមាណជាង ១០០ នាក់។

ថ្ងៃនេះ លោក បានបញ្ជាក់ថា អ្នកនាងកែវ ច័ន្ទនិមល ពិធីការិនីល្បីឈ្មោះទូរទស្សន៍ហង្សមាស និងគ្រួសារដែលមានប្តីនិងកូន បានឆ្លងជំងឺកូវីដ១៩ ខណៈដែលតារាផ្សេងមួយចំនួនទៀត ក្រសួងសុខាភិបាល បានយកសំណាកទៅពិនិត្យមិនទាន់ចេញលទ្ធផល។

ភ្លាមៗក្រោយដឹងលទ្ធផលវិជ្ជមានរបស់គ្រួសារ អ្នកនាង កែវ ច័ន្ទនិមល អ្នកនាង សុគន្ធ នីសា តារាចម្រៀងស្រី ក្នុងផលិតកម្មហង្សមាស បានអះអាងថា នាងមិនបានជួបជាមួយអ្នកនាងនិមលនោះទេ ហើយក៏មិនបានដេីរទៅកន្លែងមុខសញ្ញាដែលមានកេីតកូវីដ១៩ ដែរ​ ប៉ុន្តែនាងថា នឹងបន្តតាមដានខ្លួនឯង ខណៈនាងមិនទាន់ធ្វើតេស្តនោះទេ។

ប៉ុន្មានម៉ោងមុននេះ លោក ណុប តារាចម្រៀង​ប្រចាំផលិតកម្មហង្សមាស បានប្រាប់ថាលោកបាន​ឆ្លង​ជំងឺ​កូវីដ-១៩ ក្រោយ​ជាប់​ពាក់ព័ន្ធ​ជាមួយពិធីការិនី អ្នក​នាង កែវ ច័ន្ទនិមល។

នេះបើតាមការ​បង្ហោះសារ​លើហ្វេសប៊ុុកផ្ទាល់​ខ្លួនរបស់លោក បាន​បញ្ជាក់ថា “មុននេះបន្តិចខ្ញុំបានទទួលលទ្ធផលហើយ គឺខ្ញុំមានវិជ្ជមានកូវីដ១៩ ខ្ញុំកំពុងរៀបចំសម្លៀកបំពាក់និងរង់ចាំរថយន្តខាងក្រសួងសុខាភិបាលមកទទួលអរគុណសម្រាប់ការព្រួយបារម្ភរបស់បងប្អូន ខ្ញុំត្រូវតែរឹងមាំ យកឈ្នះជំងឺនេះដោយការព្យាបាលពីគ្រូពេទ្យឲ្យបាន ខ្ញុំមិនតក់ស្លុតនិងការពិតនេះទេ ត្បិតខ្ញុំក្តី អ្នកដែលខ្ញុំឆ្លងពីគាត់ក្តី គ្មានអ្នកណារីករាយនឹងទទួលឡើយ មានតែពាក្យមួយប្រាប់ខ្លួនឯងគឺរឹងមាំ តស៊ូ”។

ផលិត​កម្ម​ធំ​លំដាប់​នៅ​កម្ពុជា ហង្សមាស មកដល់​ពេល​នេះ មាន​អ្នក​ឆ្លង​ជំងឺ​កូវីដ-១៩ ចំនួន៣នាក់ និង​ជាប់​សង្ស័យ​ជា​ច្រើននាក់ និងអ្នក​ខ្លះ​ទៀតកំពុង​តាម​ដាន​សុខភាព​ជា​បន្ដ៕