សម្ដេច ហ៊ុន សែន ប្រាប់ជប៉ុនថា នៅអាស៊ាន កម្ពុជាបានយកចិត្តទុកដាក់លើស្ត្រីខ្លាំងជាងគេ

នៅក្នុងជំនួបនាព្រឹកថ្ងៃទី២៦ ខែកញ្ញា ឆ្នាំ២០២៤ សម្ដេចតេជោ ហ៊ុន សែន បានប្រាប់អតីតអនុរដ្ឋមន្ត្រីក្រសួងការបរទេសជប៉ុន ថា កម្ពុជា ជាប្រទេសក្នុងតំបន់អាស៊ានដែលបានយកចិត្តទុកដាក់លើស្ត្រីខ្លាំងជាងគេ ខណៈគោលនយោបាយជាតិគាំពារសង្គមរបស់កម្ពុជា បានកំណត់យកស្ត្រី ជាមូលដ្ឋានមុនគេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចតេជោ ហ៊ុន សែន ប្រធានព្រឹទ្ធសភា លើកឡើងថា ពាក់ព័ន្ធនឹងការវិនិយោគលើស្ត្រី​ គឺប្រទេសអាស៊ានទាំង១០ កម្ពុជាជាប់បានពិន្ទុល្អក្នុងការយកចិត្តទុកដាក់លើស្ត្រី​ ហើយជាក់ស្តែង កម្ពុជាមានគោលនយោបាយជាតិគាំពារសង្គមដែលយកស្ត្រីជាមូលដ្ឋាន ជាពិសេសការយកចិត្តទុកដាក់ទៅលើស្ត្រីមានផ្ទៃពោះ ដោយផ្តល់ការឧបត្ថម្ភចាប់តាំងពីមានផ្ទៃពោះរហូតដល់ពេលសម្រាលកូន ទាំងការពិនិត្យសុខភាពនៅមន្ទីរពេទ្យ រហូតដល់កុមារកើតមកអាយុ២ឆ្នាំ។

ការលើកឡើងរបស់សម្ដេចតេជោ ធ្វើឡើងក្នុងជំនួបសម្ដែងការគួរសមជាមួយលោកស្រីសាស្ត្រាចារ្យ YAMANAKA Akiko អតីតអនុរដ្ឋមន្ត្រីក្រសួងការបរទេសជប៉ុន និងជាអតីតឯកអគ្គរាជទូតពិសេសសម្រាប់ការកសាងសន្តិភាពនៃរដ្ឋាភិបាលជប៉ុន នាព្រឹកថ្ងៃទី២៦ ខែកញ្ញា ឆ្នាំ២០២៤ នៅវិមានព្រឹទ្ធសភា រាជធានីភ្នំពេញ។

លោកស្រីសាស្ត្រាចារ្យ YAMANAKA Akiko បានជម្រាបជូនសម្ដេចតេជោពីគោលបំណងរបស់លោកស្រីមកកាន់កម្ពុជានាពេលនេះ គឺដើម្បីចូលរួមក្នុងសិក្ខាសាលាមួយ ដែលរៀបចំឡើងដោយវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីខាងកើត ដែលប្រព្រឹត្តទៅនៅថ្ងៃទី២៧ ខែកញ្ញា ហើយលោកស្រី នឹងថ្លែងបាឋកថាមួយនៅសាកលវិទ្យាល័យភូមិន្ទភ្នំពេញ។ លោកស្រី បញ្ជាក់ថា សិក្ខាសាលានេះ មានគោលដៅ​​ជំរុញ និងលើកកម្ពស់របៀបវារៈស្តីពីស្ត្រី សន្តិភាព និងសន្តិសុខ និងស្ត្រីក្នុងសេដ្ឋកិច្ចឌីជីថល។ លោកស្រី បានបន្តជម្រាបជូនសម្ដេចតេជោ ថា អគ្គលេខាធិការអាស៊ាន លោក កៅ គឹមហួន គាំទ្រចំពោះគម្រោងនេះ និងលើកទឹកចិត្តឱ្យជប៉ុនតែងតាំងប្រេសិតពិសេសសម្រាប់ការកសាងសន្តិភាព។

លោកស្រី ក៏បានបញ្ជាក់អំពីការជួបពិភាក្សាជាមួយរដ្ឋមន្ត្រីក្រសួងវប្បធម៌ និងរដ្ឋមន្ត្រីក្រសួងកិច្ចការនារីរបស់កម្ពុជា ទាក់ទងទៅនឹងតួនាទីរបស់ស្ត្រី ក្នុងការរួមចំណែកថែរក្សាសុខសន្តិភាពនៅក្នុងសង្គមផងដែរ។

សម្ដេចតេជោ ហ៊ុន សែន ប្រាប់លោកស្រីសាស្ត្រាចារ្យ YAMANAKA Akiko ថា ក្នុងនាមជាអនុប្រធានកិត្តិយសក្រុមប្រឹក្សាជាតិកម្ពុជាដើម្បីស្ត្រី សម្តេចបានបន្តរួមចំណែក និងធ្វើការរួមគ្នាដើម្បីស្ត្រី តាមរយៈការទម្លាក់ថវិកាផ្ទាល់ ការបង្កើតក្រុមមេធាវី ស្វះស្វែងផ្តល់ឱកាសដល់ស្ត្រី​ ជាពិសេសគឺការដាក់ចេញនូវកូតាចំនួនស្ត្រីក្នុងគណៈអភិបាលរាជធានី ខេត្ត ស្រុក ក្រុង ខណ្ឌ និងក្នុងជួរថ្នាក់ដឹកនាំកំពូលរបស់ស្ថាប័ននានា។ តួយ៉ាង មានស្ត្រីជាប្រធានរដ្ឋសភាដំបូងក្នុងប្រវត្តិសាស្ត្រ និងរដ្ឋមន្ត្រីជាស្ត្រីជាច្រើនរូបថែមទៀត។

សម្តេចតេជោ ថា កម្ពុជា ជាប្រទេសមាតាធិបតេយ្យ ដូច្នេះត្រូវវិនិយោគលើស្ត្រីបន្ថែមទៀត ដែលសម្តេចមានពាក្យស្លោកមួយថា «ជួយស្ត្រី គឺជួយខ្លួនឯង» ហើយអ្វីដែលត្រូវយកចិត្តទុកដាក់បន្តគឺស្ត្រីត្រូវជួយស្ត្រីគ្នាឯង។ សម្តេច បន្តថា កម្ពុជាជាប់ចំណាត់ថ្នាក់លេខ១ ក្នុងអាស៊ាន ចំពោះចំនួននៃការបញ្ជូនកងទ័ព​ស្ត្រីនៅក្នុងប្រតិបត្តិការសន្តិភាពរបស់អង្គការសហប្រជាជាតិ។

បន្ថែមពីនេះ ស្ត្រីដែលជាកម្មការិនីក្នុងអំឡុងពេលសម្រាកមាតុភាព៣ខែ ​មានប្រាក់បៀវត្សចំនួន១២០% ដែលសម្តេចបានលើកឡើងថា ​ប្រហែលជាប្រទេសដទៃមិនទាន់មានគោលការណ៍នេះនៅឡើយទេ ហើយរាជរដ្ឋាភិបាលអាណត្តិថ្មី ក៏បានកំពុងតែខិតខំប្រឹងប្រែងដើម្បីអនុវត្តដូចគ្នានេះដែរចំពោះមន្ត្រីរាជការ៕