ព័ត៌មានជាតិ

គិតត្រឹមថ្ងៃទី ៣១ តុលា ប.ស.ស បានរៀបចំចុះបញ្ជីសមាជិកចល័ត តាមទីប្រជុំជន ក្រសួង ស្ថាប័ន និងផ្សារ ជាង ២១ ម៉ឺននាក់

បានផុស

២ years មុន

នៅ

ថ្ងៃសុក្រ ៨ វិច្ឆិកា ២០២៤

ដោយ

គិតត្រឹមថ្ងៃទី ៣១ ខែតុលា ឆ្នាំ ២០២៤ នេះ ប.ស.ស. បានសហការចុះបញ្ជីសមាជិកនៅតាមក្រសួង ស្ថាប័ន ផ្សារ និងសង្កាត់ ជាង ២១ ម៉ឺននាក់ ក្នុងនោះស្រីជាង ១០ ម៉ឺននាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស. តំណាង លោក ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស បានឱ្យដឹងនៅក្នុងកិច្ចប្រជុំពិនិត្យលើវឌ្ឍនភាព និងបញ្ហាប្រឈម នៃការអនុវត្តគម្រោងពង្រីកការចុះបញ្ជីសមាជិក ប.ស.ស. កាលពីថ្ងៃទី ០៧ វិច្ឆិកា ថា ពង្រីកការចុះបញ្ជីសមាជិក ប.ស.ស.មានរយៈពេល ចំនួន ៣ ខែ ៨ ថ្ងៃ ដោយគិតចាប់ពីថ្ងៃទី ២៨ ខែសីហា ដល់ថ្ងៃទី ៦ ខែធ្នូ ឆ្នាំ ២០២៤ ហើយសម្រាប់វឌ្ឍនភាព នៃការអនុវត្តគម្រោងគិតមកត្រឹមថ្ងៃទី ៣១ ខែតុលា ឆ្នាំ ២០២៤ ប.ស.ស. បានរៀបចំការចុះបញ្ជីចល័តនៅតាមទីប្រជុំជន នៃរាជធានី/ខេត្តគោលដៅ សរុបចំនួន ១៩ លើក ស្មើនឹង ២០ ទីតាំង ដែលបានចុះបញ្ជីសមាជិកថ្មីតាមរយៈស្តង់ចល័តចំនួន ៧ ០៥៥ នាក់។

ជាមួយគ្នានេះ ក្រុមការងារ ប.ស.ស. ក៏បានធ្វើការផ្សព្វផ្សាយតាមរយៈបណ្ដាញសង្គមនានា ព្រមទាំងបានចុះចែកខិត្តបណ្ណដោយផ្ទាល់នៅតាមទីតាំងគោលដៅ ដើម្បីកៀរគរប្រជាពលរដ្ឋមកធ្វើការចុះបញ្ជីក្នុងស្តង់ចល័តផងដែរ។

លោកបណ្ឌិតបានបន្តទៀតថា តាមរយៈការអនុវត្តគម្រោងនេះ បើសរុបជាទិន្នន័យរួម ត្រឹមថ្ងៃដូចគ្នាខាងលើនេះ ប.ស.ស. បានសហការចុះបញ្ជីសមាជិកនៅតាមក្រសួង ស្ថាប័ន ផ្សារ និងសង្កាត់ សរុបចំនួន ២១០ ២៥២ នាក់ ស្រី ១០៦ ៣៣២ នាក់ ដែលក្នុងនោះក៏មានកម្មករ-និយោជិតក្នុងរបបភាគទានជាកាតព្វកិច្ចមានចំនួន ៩០ ៣៧៤ នាក់ បុគ្គលស្វ័យនិយោជន៍ ៨៧ ៤៨២ នាក់ និងអ្នកក្នុងបន្ទុកសមាជិក ប.ស.ស. ចំនួន ៣២ ៣៩៦ នាក់។

លោកបណ្ឌិត បានបន្ថែមថា ការរៀបចំស្តង់ចុះបញ្ជីចល័តនេះ ដើម្បីសម្រួលដល់ប្រជាពលរដ្ឋជាអាជីវករ និងអ្នកប្រកបរបរផ្ទាល់ខ្លួនក្នុងការស្នើសុំប័ណ្ណសមាជិក ប.ស.ស ដោយមិនចាំបាច់ចំណាយពេលវេលាក្នុងការធ្វើដំណើរទៅមកដោយផ្ទាល់មកស្នើសុំប័ណ្ណ ប.ស.ស. នៅតាមទីស្នាក់ការ ប.ស.ស។ ដោយឡែកសម្រាប់ម្ចាស់អាជីវកម្ម ឬ ម្ចាស់ផ្ទះ ដែលមានប្រើប្រាស់កម្មករ-និយោជិត ឬបុគ្គលិកចាប់ពីម្នាក់ឡើងទៅ ក៏អាចមកប្រឹក្សា និងបំពេញព័ត៌មានចុះបញ្ជីសហគ្រាសនៅស្តង់ចល័តនេះបានផងដែរ៕

អត្ថបទ ៖ សំអឿន