ទីតាំងលំហែកាយដ៏ស្រស់ត្រកាល​ លាក់ខ្លួនកណ្តាល​​ជ្រលងបុព្វតា កំពុងទាក់ទាញទេសចរ​ទៅ​កម្សាន្ត

តំបន់ទេសចរណ៍បែបធម្មជាតិមួយកន្លែង ដែលបានលាក់ខ្លួនជាយូរមកហើយនៅក្នុងព្រៃភ្នំជ្រលងបុព្វតា ឥឡូវកំពុងបង្ហាញខ្លួននិងចាប់ផ្ដើមទាក់ទាញក្រសែភ្នែកភ្ញៀវទេសចរណ៍ ឱ្យទៅ​កម្សាន្ត​ដោយសារតែសម្រស់ធម្មជាតិ ជ្រលងទឹកហូរកាត់ថ្មដា និងខ្យល់អាកាសដ៏បរិសុទ្ធនៅក្នុងតំបន់ព្រៃភ្នំ។

បើយើងធ្វើដំណើរតាមផ្លូវជាតិលេខ ៥៧ ចេញពីទីរួមខេត្តបាត់ដំបង ឆ្ពោះទៅទិសខាងលិច ហើយបត់ឆ្វេងត្រង់រង្វង់មូលភ្ជាវ ទៅកាន់ទឹកដីស្រុកសំឡូត ហើយបត់ចូលតាមច្រកវត្តស្វាយ បើគិតជាចម្ងាយមានប្រវែងប្រមាណ ៨០ គីឡូម៉ែត្រ ពីក្រុង​បាត់ដំបងនោះ គេនឹងទៅដល់តំបន់រមណីយដ្ឋានមួយកន្លែងដែលមានទំនប់បង្ហៀរទឹក និងទឹកស្ទឹងដែលហូរកាត់ជ្រលង​ថ្មដា បង្កើតទៅជាទេសភាពបែបធម្មជាតិយ៉ាងល្អប្រណិត ដែលទីតាំងនោះមានឈ្មោះថាទំនប់បង្ហៀរស្ទឹងក្រញូង​។

តំបន់រមណីយដ្ឋានដែលលាក់ខ្លួននៅក្នុងជ្រលងបុព្វតាជាយូរមកហើយនេះ គឺស្ថិតក្នុងភូមិតាសាញជើង ឃុំតាសាញ ស្រុកសំឡូត ខេត្តបាត់ដំបង ដែលបច្ចុប្បន្ននៅទីនោះព្រះសង្ឃដែលគង់នៅវត្តស្ទឹងក្រញូង បានកសាងនូវទំនប់បង្ហៀរនេះឡើង បានក្លាយទៅជារមណីយដ្ឋានដ៏ស្រស់ត្រកាល នៅពេលដែលមានទឹកហូរកាត់ម្ដងៗ ហើយនៅក្បែរព្រៃភ្នំនោះដែរក៏មានការបង្កើតជាខ្ចុះ និងអាហារដ្ឋានដោយមានលក់ចំណីអាហារភេសជ្ជៈគ្រប់ប្រភេទជាតម្រូវការរបស់ភ្ញៀវទេសចរណ៍ដែលទៅកំសាន្តនៅទីនោះ។

លោក មុត សំណាង ជាប្រជាពលរដ្ឋរស់នៅខេត្តបាត់ដំបង ដែលបាននាំក្រុមគ្រួសារទៅកម្សាន្ត​បាន​រៀបរាប់ថា នេះជាលើកទីមួយហើយ ដែលលោកបាននាំក្រុមគ្រួសារទៅកម្សាន្ត​តំបន់ទេសចរ​ណ៍បែបធម្មជាតិនេះ ដែលលោក​មើលឃើញ​ថា​គឺពិតជាស្រស់ស្អាតមែន ដោយសារតែមានតំបន់រមណីយដ្ឋាន អាហារដ្ឋាន ទំនប់បង្ហៀរ សម្រស់ព្រៃភ្នំ និងទឹកហូរខ្មួលខ្មាញ់កាត់ដុំសិលា ជាការទាក់ទាញក្រសែភ្នែកឲ្យមើលទៅកាន់តែស្រស់ស្អាតឡើង។

លោកបានបន្ថែមថា ចម្ងាយប៉ុណ្ណឹងមិនឆ្ងាយប៉ុន្មានទេ ដូច្នេះគួរតែពលរដ្ឋទៅកម្សាន្ត​ឱ្យបានច្រើនកុះករ ពិសេសនៅរៀងរាល់ថ្ងៃសៅរ៍ អាទិត្យ ចុងសប្តាហ៍ និងថ្ងៃបុណ្យទានជាដើម ដើម្បីឲ្យអារម្មណ៍បានស្រស់ស្រាយនិងបន្ធូរភាពតានតឹងនៅក្នុងចិត្ត ដែលទីតាំងនេះគឺជារមណីយដ្ឋានធម្មជាតិមួយនៅក្នុងរមណីយដ្ឋានដ៏ច្រើនសន្ធឹកសន្ធាប់ក្នុងខេត្តបាត់ដំបង៕

អត្ថបទ៖ សោ និយមរ័ត្ន