ត្រៀម​សម្ពោធ​មន្ទីរពិសោធន៍ជាតិ ជួយ​ជំរុញ​ឧស្សាហកម្មកម្ពុជា ធានា​ស្តង់ដា​គុណភាពផលិតផល

នៅសល់តែ ០៣ ថ្ងៃទៀត ប៉ុណ្ណោះ មន្ទីរពិសោធន៍ជាតិ វិទ្យាសាស្ត្រ បច្ចេកវិទ្យា និងនវានុវត្តន៍ នឹងត្រូវសម្ពោធផ្លូវការជាគ្រឹះស្ថានសាធារណៈរដ្ឋបាល។ នេះបើតាមសេចក្តី​ប្រកាស​របស់​ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។

មន្ទីរពិសោធន៍ជាតិ វិទ្យាសាស្ត្រ បច្ចេកវិទ្យា និងនវានុវត្តន៍ នឹងត្រូវសម្ពោធដាក់ឱ្យដំណើរការជាគ្រឹះស្ថានសាធារណៈរដ្ឋបាល នៅថ្ងៃទី១២ ខែធ្នូ ឆ្នាំ២០២៤។

កំណែទម្រង់នេះមានគោលដៅពង្រឹងសមត្ថភាព និងប្រសិទ្ធភាពនៃមន្ទីរពិសោធន៍ជាតិវិទ្យាសាស្ត្រ បច្ចេកវិទ្យា និងនវានុវត្តន៍ ដោយប្រែក្លាយស្ថាប័ននេះ ជាមន្ទីរពិសោធន៍ឈានមុខគេ ក្នុងការគាំទ្រវិស័យឯកជន និងការអភិវឌ្ឍសេដ្ឋកិច្ចកម្ពុជា។ តាមរយៈការធានាភាពអនុលោមតាមស្តង់ដារអន្តរជាតិ ISO/IEC 17025 ដែលទទួលស្គាល់ដោយស្ថាប័នអន្តរជាតិធំៗ ដូចជា NATA នៃប្រទេសអូស្ត្រាលី និង SAC-SINGLAS នៃប្រទេសសិង្ហបុរី កំណែទម្រង់នេះនឹងបង្កើនទំនុកចិត្តរបស់អតិថិជនលើមន្ទីរពិសោធន៍ និងជំរុញកិច្ចសហប្រតិបត្តិការជាមួយដៃគូអន្តរជាតិបន្ថែមទៀត។

ការផ្លាស់ប្តូរ មន្ទីរពិសោធន៍ជាតិ វិទ្យាសាស្ត្រ បច្ចេកវិទ្យា និង នវានុវត្តន៍ ទៅជាគ្រឹះស្ថានសាធារណៈរដ្ឋបាល នឹង​ដើរ​តួនាទី​សំខាន់ក្នុងការជួយដល់ឧស្សាហកម្មកម្ពុជាធានាគុណភាព និង សុវត្ថិភាពផលិតផល និងការជំរុញការបង្កើតថ្មី រួមទាំងសមត្ថភាពនៃការប្រកួតប្រជែងផងដែរ។

ថ្លែងនៅក្នុង​ពិធីបើកវគ្គបណ្តុះបណ្តាលពង្រឹងសមត្ថភាពបុគ្គលិកនៅមន្ទីរពិសោធន៍ជាតិ វិទ្យាសាស្ត្រ បច្ចេកវិទ្យា និងនវានុវត្តន៍កាលពីថ្ងៃ ២០ ខែកញ្ញា​កន្លងទៅនេះ លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍​បាន​គូស​បញ្ជាក់​ថា មន្ទីរពិសោធន៍ជាតិនៃវិទ្យាសាស្ត្រ បច្ចេកវិទ្យា និងនវានុវត្តន៍ មានតួនាទីសំខាន់ក្នុងការគាំទ្រឧស្សាហកម្មក្នុងស្រុក និងជំរុញការនាំចេញរបស់កម្ពុជា។

មន្ទីរពិសោធន៍ជាតិនឹង​ជួយ​ពង្រឹង និងពង្រីកសេវារបស់ខ្លួន កាត់បន្ថយតម្រូវការសម្រាប់ការធ្វើតេស្តផលិតផលនៅក្រៅប្រទេស ដែលនឹងជួយវិស័យឯកជនក្នុងស្រុកឱ្យអនុលោមតាមស្តង់ដារ និងលក្ខខណ្ឌតម្រូវនៃទីផ្សារអន្តរជាតិ និងជំរុញការអភិវឌ្ឍសេដ្ឋកិច្ចរបស់កម្ពុជាជារួម។

ពាក់ព័ន្ធ​ការ​បណ្តុះបណ្តាលពង្រឹងសមត្ថភាពបុគ្គលិក នៅមន្ទីរពិសោធន៍ជាតិវិទ្យាសាស្ត្រ បច្ចេកវិទ្យា និងនវានុវត្តន៍ លោករដ្ឋរដ្ឋមន្រ្តី​បាន​បញ្ជាក់​ថា ដើម្បី​ពង្រឹងជំនាញ និងវិជ្ជាជីវៈរបស់បុគ្គលិកមន្ទីរពិសោធន៍ ខណៈដែលស្ថាប័ននេះនឹង​ប្រែក្លាយជាគ្រឹះស្ថានសាធារណៈរដ្ឋបាល ដោយទទួលបាននូវស្វ័យភាពកាន់ខ្ពស់ក្នុងប្រតិបត្តិការនិងការគ្រប់គ្រង​ហិរញ្ញវត្ថុ​របស់ខ្លួន។

លោក​រដ្ឋមន្ត្រីបានថ្លែង​យ៉ាងដូច្នេះ​ថា៖​ “កំណែទម្រង់នេះទាមទារឱ្យមន្ទីរពិសោធន៍ជាតិធ្វើប្រតិបត្តិការ ប្រកបដោយគណនេយ្យភាព សំដៅលើកកម្ពស់ផលិតភាព ប្រសិទ្ធភាព និងកំណើន”។

លោករដ្ឋមន្រ្តី​បានសង្កត់ធ្ងន់លើភាពចាំបាច់នៃការផ្លាស់ប្តូរផ្នត់គំនិត ព្រមទាំងជំរុញឱ្យមន្ទីរពិសោធន៍អនុវត្តសូចនាករសមិទ្ធកម្មគន្លឹះ និងប្រព័ន្ធលើកទឹកចិត្តដែលផ្អែកលើសមិទ្ធកម្ម។ ការធ្វើដូច្នេះ នឹងជួយមន្ទីរពិសោធន៍ជាតិឱ្យបណ្តុះវប្បធម៌​នៃការទទួលខុសត្រូវ កិច្ចសហការ និងការអភិវឌ្ឍវិជ្ជាជីវៈនៅគ្រប់កម្រិតក្នុងស្ថាប័នដែលធានាថា មន្ទីរពិសោធន៍បំពេញបេសកកម្មរបស់ខ្លួនក្នុងស្មារតីសហគ្រិនភាពខ្ពស់។

បើយោងតាមអនុក្រឹត្យ ចុះថ្ងៃទី២០ ខែមិថុនា ចុះ​ហត្ថលេខាដោយសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា រាជរដ្ឋាភិបាល បានសម្រេចបង្កើតមន្ទីរពិសោធន៍ជាតិវិទ្យាសាស្ត្រ បច្ចេកវិទ្យា និង​នវា​នុវត្តន៍ ជា​​​គ្រឹះស្ថានសាធារណៈរដ្ឋបាល ដែលមាន​ឈ្មោះជាភា​សាអង់គ្លេសគឺ​ SCIENCE, TECHNOLOGY AND INNOVATION NATIONAL LABORATORY។

​ក្នុង​អនុក្រឹត្យ​បានបញ្ជាក់ថា មន្ទីរពិសោធន៍ជាតិវិទ្យាសាស្ត្រ បច្ចេកវិទ្យា និង​នវានុវត្តន៍ មាន​ភារកិច្ច​ជាអាទិ៍​ ធ្វើតេស្ត ឬវិភាគផ្នែករូប គីមីសាស្ត្រ មីក្រូជីវសាស្ត្រ មេកានិក អគ្គិសនី អេឡិចត្រូនិក ដើម្បីកំណត់គុណភាព និងលក្ខណៈវិនិច្ឆ័យរបស់ផលិតផល តាម​ការស្នើសុំ ​និង​ភាពចាំបាច់។

មន្ទីរពិសោធន៍ជាតិវិទ្យាសាស្ត្រ បច្ចេកវិទ្យា និង​នវា​នុវត្តន៍ ក៏មានភារកិច្ចសិក្សាស្រាវជ្រាវ ធ្វើតេស្ត ឬវិភាគផ្សេងៗ ដែលបម្រើឱ្យការ​អភិវឌ្ឍ​វិទ្យាសាស្ត្រ បច្ចេកវិទ្យា និងនវានុវត្តន៍ និងត្រូវ​សហប្រតិបត្តិការជាមួយមន្ទីរ​ពិសោធន៍នៃស្ថាប័នជាតិ អន្តរជាតិ វិស័យឯកជន និងដៃគូអភិវឌ្ឍនានា ដើម្បីឆ្លើយតប​នឹងតម្រូវការបន្ទាន់របស់ជាតិ លើវិស័យវិទ្យាសាស្ត្រ បច្ចេកវិទ្យា និងនវានុវត្តន៍៕