ព័ត៌មានជាតិ

កម្លាំងសណ្ដាប់ធ្នាប់ខណ្ឌ ៧ មករា បន្តចុះរៀបចំសណ្ដាប់ធ្នាប់ក្នុងមូលដ្ឋាន រក្សាចិញ្ចើមផ្លូវ

បានផុស

១ year មុន

នៅ

ថ្ងៃពុធ ១១ ធ្នូ ២០២៤

ដោយ

កម្លាំងគណៈបញ្ជាការឯកភាពខណ្ឌ ៧ មករា បន្តយកចិត្តទុកដាក់ពីបញ្ហាបរិស្ថានអនាម័យ សណ្ដាប់ធ្នាប់សាធារណៈ ជាពិសេសបញ្ហាកកស្ទះចរាចរណ៍ ដែលប្រជាពលរដ្ឋ និងអាជីវករ មួយចំនួនធំ បានយកចិញ្ចើមផ្លូវសាធារណៈធ្វើជាកន្លែងចំណត ធ្វើឲ្យបាត់បង់សណ្ដាប់ធ្នាប់ និងសោភ័ណភាពដងផ្លូវផងដែរ។ ដូច្នេះ កម្លាំងសណ្ដាប់ធ្នាប់ខណ្ឌ បានចុះរៀបចំអប់រំណែនាំដល់ម្ចាស់អាជីវកម្មមួយចំនួន ឲ្យចូលរួមសហការជាមួយអាជ្ញាធរ ដើម្បីរំដោះចិញ្ចើមផ្លូវ រក្សាចិញ្ចើមផ្លូវ សម្រាប់អ្នកថ្មើរជើង និងកាត់បន្ថយការកកស្ទះចរាចរណ៍ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងការចុះរៀបចំនេះដែរបានធ្វើឡើងកាលពីព្រឹកថ្ងៃទី ១១ ខែធ្នូ ឆ្នាំ ២០២៤ ដោយមានការណែនាំផ្ទាល់ពីសំណាក់ លោក ថេង សុថុល អភិបាល នៃគណៈអភិបាលខណ្ឌ ៧ មករា បានចាត់ឲ្យកម្លាំងសណ្ដាប់ធ្នាប់ខណ្ឌបន្តចុះ ផ្លូវលេខ ១៤៣ ផ្លូវលេខ ១៥៦ ផ្លូវលេខ ២១៥ ផ្លូវលេខ ២១១ ជាប់ជាប្រចាំ ដើម្បីរៀបចំ អប់រំណែនាំ ដល់ម្ចាស់អាជីវកម្មមួយចំនួន ឲ្យចូលរួមសហការជាមួយអាជ្ញាធរ ដើម្បីរំដោះចិញ្ចើមផ្លូវ រក្សាចិញ្ចើមផ្លូវ សម្រាប់អ្នកថ្មើរជើង និងកាត់បន្ថយការកកស្ទះចរាចរណ៍ផងដែរ។ ជាពិសេសទីតាំងភោជនីយដ្ឋាន ទីតាំងគ្រឹះស្ថានអប់រំ ណែនាំដល់អាណាព្យាបាល សិស្សដែលប្រើប្រាស់រថយន្ត យក និងមកទទួលកូនចេញពីសាលា ចូលរួមរក្សាសណ្ដាប់ធ្នាប់ ចិញ្ចើមផ្លូវ ចតរថយន្តឲ្យបានត្រឹមត្រូវ ជៀសវាងបង្កការកកស្ទះចរាចរណ៍ដល់ប្រជាពលរដ្ឋអ្នកធ្វើដំណើរ។

ក្នុងប្រតិបត្តិការចុះអប់រំណែនាំ ប្រជាពលរដ្ឋ អាជីវករ ម្ចាស់ទីតាំងភោជនីយដ្ឋាន ទីតាំងគ្រឹះស្ថានអប់រំ បានចូលរួមសហការជាមួយកម្លាំងអាជ្ញាធរខណ្ឌបានយ៉ាងល្អ ដើម្បីរំដោះចិញ្ចើមផ្លូវ កាត់បន្ថយការកកស្ទះចរាចរណ៍តាមដងផ្លូវក្នុងមូលដ្ឋាន។

សូមបញ្ជាក់ផងដែរថា ការរៀបចំសណ្ដាប់ធ្នាប់ រក្សាបរិស្ថានអនាម័យនេះ កន្លងទៅ លោក ឃួង ស្រេង អភិបាលរាជធានីភ្នំពេញ តែងតែណែនាំដល់អាជ្ញាធរមូលដ្ឋានទាំង ១៤ ខណ្ឌ យកចិត្តទុកដាក់ជាប់ជាប្រចាំ ដើម្បីរក្សាសណ្ដាប់ធ្នាប់សាធារណៈ និងកាត់បន្ថយការកកស្ទះ ឲ្យបានល្អប្រសើរ និងមានសោភ័ណភាពល្អ សមជាទីក្រុងស៊ីវិល័យ៕

អត្ថបទ ៖ សុភា