មន្ត្រីជាន់ខ្ពស់បក្សកុម្មុយនីស្តវៀតណាម អបអរដែលកម្ពុជាមានសន្តិភាព និងការអភិវឌ្ឍខ្លាំងគ្រប់វិស័យ ជីវភាពពលរដ្ឋកាន់តែប្រសើរ

មន្ត្រីជាន់ខ្ពស់បក្សកុម្មុយនីស្តវៀតណាម  លោក ឡេ ហាយជុង (Le Haoi Trung)  បានអបអរសាទរចំពោះសមិទ្ធផលធំៗដែលកម្ពុជាសម្រេចបានក្រោមការដឹកនាំរបស់ គណបក្សប្រជាជនកម្ពុជា ដែលមានសម្តេចតេជោជាប្រធាន និងសម្តេចធិបតី ហ៊ុន ម៉ាណែត ជានាយករដ្ឋមន្ត្រី ដែលធ្វើឱ្យប្រទេសកម្ពុជាមានសុខសន្តិភាព និងការអភិវឌ្ឍន៍យ៉ាងខ្លាំងក្លាលើគ្រប់វិស័យ ជីវភាពរស់នៅរបស់ប្រជាជនកាន់តែល្អប្រសើរ ព្រមទាំងកិត្យានុភាពរបស់កម្ពុជាកាន់តែត្រូវបានលើកកម្ពស់លើឆាកអន្តរជាតិ។

លោក ឡេ ហាយជុង សមាជិក គណៈលេខាធិការមជ្ឈិមបក្ស និងជាប្រធានគណៈទាក់ទងបរទេសមជ្ឈិមបក្សកុម្មុយនីស្តវៀតណាម អបអរសាទរកម្ពុជាដូច្នេះ នៅក្នុងជំនួបដែលសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា អនុញ្ញាតឱ្យចូលជួបសម្ដែងការគួរសម នៅវិមាន៧ មករា នាព្រឹកថ្ងៃទី២៤ ខែធ្នូ ឆ្នាំ២០២៤។

ជាកិច្ចចាប់ផ្តើម សម្តេចតេជោ ប្រធានគណបក្សប្រជាជនកម្ពុជា បានសម្តែងនូវការស្វាគមន៍និង ជឿជាក់ថា ដំណើរទស្សនកិច្ចរបស់គណៈប្រតិភូ នឹងចូលរួមចំណែកពូនជ្រុំនូវទំនាក់ទំនងដ៏ល្អ និងលើកកម្ពស់កិច្ចសហប្រតិបត្តិការគ្រប់ជ្រង់ជ្រោយរវាងគណបក្ស និងប្រទេសទាំងពីរឱ្យឡើងមួយកម្រិតទៀត។

លោក ឡេ ហាយជុង បានសម្តែងនូវសេចក្តីសោមនស្សរីករាយជាខ្លាំង និងការអរគុណដែល សម្តេច បានអនុញ្ញាតឱ្យ លោក និងសហការី បានចូលជួបសម្ដែងការគួរសម។ លោកក៏បានពាំនាំជូន សម្តេចតេជោ នូវការផ្ដាំផ្ញើសួរសុខទុក្ខពីសំណាក់លោក To Lam អគ្គលេខាធិការបក្សកុម្មុយនីស្ត វៀតណាម លោក Luong Cuong ប្រធានរដ្ឋ និងលោកនាយករដ្ឋមន្រ្តី Pham Minh Chinh។

ជាកិច្ចឆ្លើយតប សម្ដេចតេជោ បានអរគុណចំពោះលោកដែលបានពាំនាំនូវការផ្ដាំផ្ញើសួរសុខទុក្ខពីសំណាក់លោក To Lam អគ្គលេខាធិការបក្សកុម្មុយនីស្តវៀតណាម លោក Luong Cuong ប្រធានរដ្ឋ និងលោកនាយករដ្ឋមន្រ្តី Pham Minh Chinh។ សម្តេចតេជោ ក៏បានគូសបញ្ជាក់ឱ្យឃើញនូវការប្តេជ្ញាចិត្តរួមគ្នាក្នុងស្មារតី «ពង្រឹងទំនាក់ទំនងជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ ស្ថិរភាពយូរអង្វែង» និងការជឿជាក់ទុកចិត្តគ្នាទៅវិញទៅមកកាន់តែខ្លាំងឡើង។

សម្ដេចតេជោ ក៏បានមានប្រសាសន៍ថា កម្ពុជាបានរក្សាចំណងមិត្តភាពជាប្រពៃណីដ៏ល្អនេះតាំងពីថ្នាក់ដឹកនាំជំនាន់មុន ហើយថ្នាក់ថ្នមថែរក្សាទំនាក់ទំនងនេះឱ្យមានភាពរឹងមាំជារៀងរហូតមក។ សម្ដេចជឿជាក់ថា ក្រោមការដឹកនាំដ៏ត្រឹមត្រូវ និងភ្លឺស្វាងរបស់បក្សកុម្មុយនីស្តវៀតណាម ដែលមានលោក តូ ឡឹម ជាប្រមុខ ប្រទេសវៀតណាម នឹងសម្រេចបាននូវគោលដៅ «ក្លាយទៅជាប្រទេសអភិវឌ្ឍន៍ មានចំណូលខ្ពស់ នៅឆ្នាំ២០៤៥ » ។

ជាទីបញ្ចប់ តាមរយៈលោក ឡេ ហាយជុង សម្តេចតេជោ បានផ្តាំផ្ញើការសួរសុខទុក្ខ និងជូនពរ លោក To Lam អគ្គលេខាធិការបក្សកុម្មុយនីស្តវៀតណាម លោក Luong Cuong ប្រធានរដ្ឋ និងលោកនាយករដ្ឋមន្រ្តី Pham Minh Chinh ក្នុងឱកាសចូលឆ្នាំថ្មី២០២៥ និងចូលឆ្នាំថ្មីវៀតណាម ដែលនឹងចូលមកដល់ក្នុងពេលខាងមុខផងដែរ ៕