អភិបាលរងខេត្តស្វាយរៀង ចុះពិនិត្យបច្ចុប្បន្នភាពផ្ទះអតីតយុទ្ធជន ដែលបានពលីដើម្បីជាតិ

នៅព្រឹកថ្ងៃទី៦ ខែមករា ឆ្នាំ២០២៥ លោក ម៉ែន អេង អភិបាលរងខេត្ត តំណាងលោក ប៉េង ពោធិ៍សា អភិបាលខេត្តស្វាយរៀង បានចុះត្រួតពិនិត្យបច្ចុប្បន្នភាពផ្ទះអតីតយុទ្ធជន គ្រួសារអតីតយុទ្ធជន ពលី ពិការ មរណ: និងនិវត្តជន នៅស្រុកកំពង់រោទិ៍ និងស្រុកចន្ទ្រា ដែលមានការចូលរួមពី លោក កែវ ច័ន្ទលី ប្រធានមន្ទីរព័ត៌មានខេត្ត លោកអភិបាលរងស្រុក និងកងកម្លាំងការពារព្រំដែន។

ហេដ្ឋារចនាសម្ព័ន្ធរូបវន្ត សំខាន់ៗ នៅតំបន់ផ្ទះអតីតយុទ្ធជន គ្រួសារអតីតយុទ្ធជន ពលី ពិការ មរណ: និងនិវត្តជន ដែលស្ថិតតាមបណ្តោយខ្សែរបន្ទាត់ព្រំដែនកម្ពុជា-វៀតណាម ត្រូវបានស្ថាបនារួចរាល់ជាច្រើនដូចជា ផ្លូវ ភ្លើង ទឹក ដែលផ្តល់ភាពងាយស្រួលក្នុងការអោយបងប្អូនអតីតយុទ្ធជន ងាយស្រួលក្នុងការរស់នៅ និងប្រកបមុខរបរចិញ្ចឹមជីវិត។

សូមបញ្ជាក់ផងដែរថា ចំពោះផ្ទះអតីតយុទ្ធជន គ្រួសារអតីតយុទ្ធជន ពលី ពិការ មរណ: និងនិវត្តជន រៀបចំធ្វើឡើង គឺជាការឆ្លើយតបរបស់រាជរដ្ឋាភិបាល នូវគុណបំណាច់ របស់បងប្អូនអតីតយុទ្ធជនយុទ្ធនារីដែលបានបូជាអាយុជីវិតកម្លាំងកាយចិត្តក្នុងបុព្វហេតុការពារប្រទេសជាតិរកសន្តិភាពជូនប្រទេសជាតិនិងពលរដ្ឋរហូតដល់មានអ្នកខ្លះស្លាប់បាត់បង់ជីវិតចោលគ្រួសារ ប្រពន្ធ កូន ចៅ ឱ្យនៅកំព្រាឯកោរហូតមកដល់ពេល។

យោងតាមរដ្ឋបាលស្រុកទាំង២ បានអោយដឹងថា តំបន់ផ្ទះអតីតយុទ្ធជន គ្រួសារអតីតយុទ្ធជន ពលី ពិការ មរណ: និងនិវត្តជន នៅថ្ងៃអនាគតតំបន់នេះ នឹងប្រែក្លាយជាច្រកទ្វេភាគី ដែលងាយស្រួលដល់ប្រជាពលរដ្ឋរស់នៅទីនោះ ក្នុងការដោះដូរកសិផល និងទំនិញផ្សេងៗ៕

ដោយ៖ ភក្ដី