មន្ត្រី២នាក់បាត់បង់ជីវិតក្នុងឧបទ្ទវហេតុផ្ទុះមីនអំឡុងបោសសម្អាតនៅខេត្តឧត្តរមានជ័យ

បុគ្គលិកបោសសម្អាតមីនរបស់មជ្ឈមណ្ឌលសកម្មភាពកំចាត់មីនកម្ពុជា ២នាក់បានស្លាប់បាត់បង់ជីវិតក្នុងហេតុការផ្ទុះមីនអំឡុងពេលប្រតិបត្តិការបោសសម្អាតមីន ព្រឹកថ្ងៃទី១៦ ខែមករា ឆ្នាំ២០២៤នេះ នៅខេត្តឧត្តរមានជ័យ។

ក្នុងសារលិខិតរំលែកទុក្ខជូនចំពោះក្រុមគ្រួសារសពមន្ត្រីទាំងពីរ អនុប្រធានទី១នៃអាជ្ញាធរមីនកម្ពុជា ទេសរដ្ឋមន្ត្រី លី ធុជ បានចាត់ទុកការពលីរបស់លោក ពៅ នេពីន និងលោក អឿន ចាន់ដារ៉ា គឺជាការបាត់បង់វីវជនដោះមីនដ៏អង់អាចក្លាហានដែលតែងតែលះបង់ ដើម្បីសុខសុវត្ថិភាពរបស់ប្រជាជនមូលដ្ឋាន។

លោក​បាន​លើកឡើងថាក្នុងលិខិតនោះថា៖ «ខ្ញុំពិតជាមានសេចក្ដីក្ដុកក្ដួលរំជួលចិត្ត និងសោកស្ដាយឥតឧបមាដោយបានទទួលដំណឹងអំពីពលីកម្មរបស់លោក អឿន ចាន់ដារ៉ា និងលោក ពៅ នេពីន»។

ឧបទ្ទវហេតុដ៏សោកស្ដាយនេះកើតឡើងនៅម៉ោង៧និង៤៥នាទីព្រឹក ថ្ងៃទី១៦ ខែមករានេះ ក្នុងពេលដែលជនរងគ្រោះទាំងពីរកំពុងបំពេញប្រតិបត្តិការ ចាក់ កាយ ក្នុងចម្ការមីននៅភូមិត្រពាំងប្រីយ៍ ឃុំបាក់អន្លង ស្រុកត្រពាំងប្រាសាទ ខេត្តឧត្តរមានជ័យ៕

អត្ថបទដោយ ហ៊ុន សិរីវឌ្ឍន៍