ព័ត៌មានជាតិ

ថៃផ្តល់ជំនួយ១០ម៉ឺនដុល្លារ ដើម្បីដោះស្រាយបញ្ហាពលករ ដែលធ្វើចត្តាឡីស័ក នៅតាមព្រំដែន

បានផុស

៥ years មុន

នៅ

ថ្ងៃសុក្រ ១៩ មីនា ២០២១

ដោយ

so pon

រដ្ឋាភិបាល នៃព្រះរាជាណាចក្រថៃ បានផ្តល់ជំនួយសប្បុរសធម៌ចំនួន១០ម៉ឺនដុល្លារអាមេរិក ដើម្បីចូលរួមចំណែកដោះស្រាយតម្រូវការចាំបាច់នានា ជូនបងប្អូនពលករខ្មែរ ដែលកំពុងធ្វើចត្តាឡីស័ក នៅមជ្ឈមណ្ឌលចត្តាឡីស័ក នៅតាមបណ្ដោយព្រំដែនកម្ពុជា-ថៃ ហើយពិធីប្រគល់ និងទទួលជំនួយ បានធ្វើឡើងកាលពីព្រឹកថ្ងៃទី១៩ ខែមីនា នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមក្រសួងការបរទេសបានឲ្យដឹងថា នៅថ្ងៃនេះ នាទីស្តីការក្រសួងការបរទេស និងសហប្រតិបត្តិការអន្តរជាតិ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ និងលោក ប៉ាន់យ៉ារ៉ាក់ ភូលថាប់ (Panyarak POOLTHUP) ឯកអគ្គរាជទូតថៃប្រចាំព្រះរាជាណាចក្រកម្ពុជា បានអញ្ជើញជាអធិបតីក្នុងពិធីប្រគល់-ទទួលមូលប្បទានបត្រជាទឹកប្រាក់ចំនួន១០០.០០០ ដុល្លារអាមេរិក ដែលជាជំនួយសប្បុរសធម៌ពីរាជរដ្ឋាភិបាលថៃ ជូនរាជរដ្ឋាភិបាលកម្ពុជា។ ជំនួយនេះ ធ្វើឡើងក្នុងគោលបំណងចូលរួមចំណែកដោះស្រាយតម្រូវការចាំបាច់នានាជូនបងប្អូនពលករខ្មែរ ដែលកំពុងធ្វើចត្តាឡីស័កនៅមជ្ឈមណ្ឌលចត្តាឡីស័កកូវីដ-១៩ នៅតាមបណ្ដោយព្រំដែនកម្ពុជា-ថៃ។

រាជរដ្ឋាភិបាល និងប្រជាជនកម្ពុជា បានថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាល និងប្រជាជនថៃ ដែលបានផ្ដល់ជំនួយជាបន្តបន្ទាប់ ដើម្បីចូលរួមចំណែកដល់កិច្ចខិតខំប្រឹងប្រែងក្នុងការប្រយុទ្ធប្រឆាំងនឹងជំងឺកូវីដ-១៩នៅកម្ពុជា ព្រមទាំងបង្កលក្ខណៈងាយស្រួលដល់ពលករកម្ពុជាដែលបានទៅធ្វើការ និងស្នាក់នៅប្រទេសថៃ។
បើតាមក្រសួងការបរទេស ការផ្តល់ជំនួយសប្បុរសធម៌នេះ មិនត្រឹមតែបានឆ្លុះបញ្ចាំងពីកាយវិការមនុស្សធម៌ដ៏ល្អប្រសើរប៉ុណ្ណោះទេ ប៉ុន្តែថែមទាំងបានបង្ហាញយ៉ាងច្បាស់អំពីទំនាក់ទំនងមិត្តភាពជាប្រពៃណី សាមគ្គីភាពដ៏រឹងមាំ និងភាពជាអ្នកជិតខាងដ៏ល្អ រវាងប្រទេសទាំងពីរផងដែរ៕

អត្ថបទ៖ កោះកែវ

សូមចុចអាន៖ សម្តេចតេជោ ហ៊ុន សែន៖ ផែនការចាក់វ៉ាក់សាំងរបស់កម្ពុជា ធ្វើឡើងដោយគ្មានការរើសអើងនិន្នាការនយោបាយ