នាយករដ្ឋមន្រ្តីថ្លែងពីបទពិសោធន៍គ្រោះថ្នាក់ដោយសារកំហុសបកប្រែ

នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានលើកឡើងថាបន្ទាប់ពីកាន់អំណាចធ្វើឱ្យសម្ដេចកាន់តែប្រយ័ត្នក្នុងការនិយាយជាសាធារណៈជាងមុន ហើយកាន់តែប្រុងប្រយ័ត្នថែមទៀតពេលជួបភ្ញៀវបរទេស។ សម្ដេចបានលើកឡើងពីបទពិសោធន៍មួយចំនួនទាក់ទងនឹងការបកប្រែដែលស្ទើតែប៉ះពាល់ដល់ការងារ។

ថ្លែងក្នុងពិធីចែកសញ្ញាបត្រដល់និស្សិតសាកលវិទ្យាល័យមួយនៅសៀមរាបព្រឹកថ្ងៃទី២៥ ខែកុម្ភៈ ឆ្នាំ២០២៥នេះ សម្ដេចធិបតី ហ៊ុន ម៉ាណែត បានរម្លឹកពីបទពិសោធន៍មួយចំនួនដែលកើតឡើងពេលសម្ដេចជួបពិភាក្សាការងារជាមួយមន្ត្រីបរទេស ហើយការបកប្រែខុស ឬបាត់ត្រឹមមួយពាក្យបានធ្វើឱ្យន័យពាក្យរបស់សម្ដេចប្រែជាបទបញ្ជាផ្សេងវិញ។

សម្ដេចធិបតីឱ្យដឹងថាពេលមួយដែលសម្ដេចបានជួបជាមួយភ្ញៀវមកពីប្រទេសបារាំងដែលសម្ដេចបាននិយាយពីសង្គ្រាមអ៊ុយក្រែនដែលមិនចង់ឱ្យមានស្ថានភាពនេះកើតឡើងក្នុងតំបន់អាស៊ី តែដោយសារបញ្ហាកំហុសនៃការបកប្រែបានបកទៅជា សម្ដេចចង់ឱ្យអាស៊ីមានស្ថានភាពដូចសង្ក្រាមអ៊ុយក្រែន ដែលធ្វើឱ្យភ្ញៀវបរទេសស្រឡាំងកាំង។ តែសម្ដេចថាបញ្ហានេះត្រូវសម្រួលវិញដោយសម្ដេចបាននិយាយជាភាសាបារាំងបញ្ជាក់ឱ្យច្បាស់ទៅភាគីភ្ញៀវវិញ។  

សម្ដេចថា៖ «គេថាអ្នកធំកុំគិតការងារតូច។ អត់ទេ! កាន់តែធំកាន់តែគិតការងារកាន់តែល្អិតលើការងារសំខាន់។ សន្ទរកថាខ្ញុំជាមេជើងគោកសរសេរខុសតួលេខខ្ញុំអានសរសេរអត់បញ្ហាពេលសម្ពោធវត្តអី តែនាយករដ្ឋមន្ត្រីខ្ញុំនិយាយគឺជាបទបញ្ជា មិនចាំបាច់ខ្ញុំទេសូម្បីតែជំនួយការខ្ញុំសរសេរខុសមួយពាក្យហ្នឹងក៏ពិបាកដែរ»។

សម្ដេចធិបតីក៏បានលើកឡើងពីការប្រើប្រាស់ភាសាការទូតផងដែរ ដែលត្រូវមានការប្រុងប្រយ័ត្នខ្លាំងព្រោះថាភាសាការទូតមានន័យខុសគ្នា ដូចជាប្រសិនជាភាគីបរទេសដែលជួបសម្ដេចស្នើសុំអ្វីមួយតើសម្ដេចត្រូវប្រើប្រាស់ពាក្យ ពិចារណា ស្វាគមន៍ ឬគាំទ្រ។ ដែលមួយពាក្យៗគឺសុទ្ធតែមានន័យបង្កប់របស់វា។

សម្ដេចថា៖ «ពាក្យកាទូតនេះគ្រោះថ្នាក់! យើងបកជាអង់គ្លេសគឺពិបាកតែម្ដង។ ឧទាហរណ៍គេអញ្ជើញយើងទៅធ្វើអីមួយ។ យើងឆ្លើយថាខ្ញុំហ្នឹងពិចារណា ភាសាកាទូតមានន័យថា No ហើយ តែបើអង់គ្លេសគេថានឹងពិចារណា តែបើការទូតគឺ NO។ រវាងពាក្យ Welcome និងពាក្យ Support ខុសគ្នាដាច់! ហើយខុសតែមួយពាក្យគឺខុសន័យតែម្ដង។ Welcome បានន័យថាខ្ញុំមិនគាំទ្រ តែខ្ញុំមិនបដិសេធ ខ្ញុំគ្រាន់តែស្វាគមន៍តែមិនពាក់ព័ន្ធទេ តែបើខ្ញុំ Support គឺខ្ញុំគាំទ្រ»។

សម្ដេចធិបតី ហ៊ុន ម៉ាណែត បានក្លាយជានាយករដ្ឋមន្ត្រីនៅថ្ងៃទី២២ ខែសីហា ឆ្នាំ២០២៣ បន្ទាប់ពីត្រូវសភាបោះឆ្នោតផ្ដល់សេចក្ដីទុកចិត្ត និងចូលស្បថចំពោះព្រះភ័ក្រព្រះមហាក្សត្រ។ បន្ទាប់ពីកាន់អំណាចកំពូលនៃស្ថាប័ននីតិប្រតិបត្តិសម្ដេចបានតំណាងឱ្យប្រជាជនកម្ពុជាក្នុងជំនួបជាមួយប្រមុខរដ្ឋ ប្រមុខរាជរដ្ឋាភិបាល និងភ្ញៀវបរទេសជាច្រើនទាំងក្នុងប្រទេស និងក្រៅប្រទេស ហើយប្រសាសន៍របស់សម្ដេចមួយពាក្យៗត្រូវបានកត់ត្រា និងតាមដានពីមនុស្សគ្រប់មជ្ឈដ្ឋាន៕

អត្ថបទដោយ ហ៊ុន សិរីវឌ្ឍន៍