ទីប្រឹក្សាក្រសួងវប្បធម៌ លោក ប៉ុក សារ៉ាន់ ថ្លែងអំណរគុណឯកឧត្ដម ឌី វិជ្ជា និងលោកជំទាវ ដែលឧបត្ថម្ភថវិកាដើម្បីព្យាបាលជំងឺភ្នែកឱ្យសះស្បើយ

ទីប្រឹក្សាអមក្រសួងវប្បធម៌ និងវិចិត្រសិល្បៈ លោក ប៉ុក សារ៉ាន់ ថ្លែងអំណរគុណឯកឧត្ដម ឌី វិជ្ជា ប្រធានសហភាពសហព័ន្ធយុវជនកម្ពុជាខេត្តស្វាយរៀង ព្រមទាំងលោកជំទាវ ហ៊ុន ម៉ាណា ដែលបានជួយឧបត្ថម្ភថវិកាមួយចំនួន សម្រាប់ព្យាបាលភ្នែកនៅវៀតណាម។ តាមរយៈការឧបត្ថម្ភពីសំណាក់ឯកឧត្ដម ឌី វិជ្ជា ព្រមទាំងលោកជំទាវ ហ៊ុន ម៉ាណា ភ្នែករបស់លោក ប៉ុក សារ៉ាន់ បានជាសះស្បើយ និងមានភាពប្រសើរឡើងវិញ។

ទីប្រឹក្សាអមក្រសួងវប្បធម៌ លោក​​ ប៉ុន សារ៉ាន់ បង្ហោះរូបភាព ឯកឧត្ដម ឌី វិជ្ជា ព្រមទាំងលោកជំទាវ ហ៊ុន ម៉ាណា ជាមួយនឹងសំណេរដូច្នេះ៖« ខ្ញុំបាទ ប៉ុក សារ៉ាន់ គ្រូសិល្បៈចាស់វស្សា សូមថ្លែងវាចា គោរពដឹងគុណ ចំពោះ ឯ.ឧ ប្រធាន ស ស យ ក ខេត្តស្វាយរៀង និងលោកជំទាវ ឧត្តមភរិយាដ៏មានគុណ ទាំងពីរ ដែលលោកមានមេត្តាធម៌ចំពោះរូបខ្ញុំបាទ ដោយ បានឧបត្ថម្ភ នូវថវិការ មួយចំនួនធំដល់រូបខ្ញុំបាទ សម្រាប់ ប្រើប្រាស់ក្នុងការទៅព្យាបាលរោគភ្នែកនៅមន្ទីរពេទ្យមួយ ក្នុងប្រទេស វៀតណាម។ ឥឡូវក្រោយពីបានព្យាបាល រួចហើយ ភ្នែកខ្ញុំបាទបានជាសះស្បើយ និងមានភាព ប្រសើរឡើងវិញហើយ»។

ក្រោយពីបានជាសះស្បើយពីរោគភ្នែក លោក ប៉ុក សារ៉ាន់ បួងសួងដល់វត្ថុសក្តិសិទ្ធក្នុងលោកសូមជួយតាមថែរក្សាឯកឧត្ដម ឌី វិជ្ជា និងលោកជំទាវ ហ៊ុន ម៉ាណា ព្រមទាំងក្រុមគ្រួសារ ឱ្យបានជួបប្រកបតែសេចក្តីសុខ សុភមង្គលគ្រប់ប្រការ។

ជាការកត់សម្គាល់នេះ មិនមែនជាលើកទីមួយឡើយឯកឧត្ដម ឌី វិជ្ជា ព្រមទាំងលោកជំទាវ ហ៊ុន ម៉ាណា​ ឧបត្ថម្ភថវិកាជូនជនរួមជាតិដែលជួយប្រទះទុក្ខលំបាក និងមានជំងឺព្យាធិ។ កន្លងទៅ ឯកឧត្ដម និងលោកជំទាវ ធ្លាប់ឧបត្ថម្ភដល់កីឡាករប្រដាល់ ដែលរងរបួសព្រោះការប្រកួត សិស្សានុសិស្ស ដែលខ្វះខាតថវិកាសម្រាប់រៀនសូត្រ ក៏៏ដូចជាការឧបត្ថម្ភគ្រឿងឧបភោគបរិភោគជាច្រើនផ្សេងៗទៀត៕