ព័ត៌មានជាតិ

រថយន្តក្រុងឥតគិតថ្លៃរបស់រាជរដ្ឋាភិបាល បានដឹកជញ្ជូនពលរដ្ឋត្រឡប់មក រាជធានីភ្នំពេញវិញ

បានផុស

២ ថ្ងៃ មុន

នៅ

ថ្ងៃព្រហស្បតិ៍ ១៧ មេសា ២០២៥

ដោយ

បន្ទាប់ពីពិធីបុណ្យចូលឆ្នាំថ្មី ប្រពៃណីជាតិខ្មែរ ត្រូវបានបញ្ចប់ ប្រជាពលរដ្ឋ ចាប់ផ្ដើមចាកចេញពីស្រុកកំណើត វិលចូលមកកាន់រាជធានីភ្នំពេញវិញ ជាបន្តបន្ទាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងនាថ្ងៃទី ១៧ ខែមេសា ឆ្នាំ ២០២៥ នេះ ដែលជាថ្ងៃបញ្ចប់ នៃការផ្តល់រថយន្តក្រុងសាធារណៈជិះឥតគិតថ្លៃរបស់រាជរដ្ឋាភិបាល គេសង្កេតឃើញពលរដ្ឋ សិស្ស-និស្សិត កម្មករ-និយោជិត បានទទួលយកសេវាដឹកជញ្ជូន ដោយជិះធ្វើដំណើរចាកចេញពីស្រុកកំណើតនៅតាមបណ្តាខេត្តនានា ចូលមករាជធានីភ្នំពេញវិញ ដើម្បីបន្តប្រកបរបរបំពេញកិច្ចការងារជាធម្មតាឡើងវិញ។

ជាមួយនេះដែរ ប្រជាពលរដ្ឋ បានសម្តែងក្តីពេញចិត្ត និងរីករាយជាខ្លាំងដែលបានជិះរថយន្តក្រុងឥតគិតថ្លៃ ទាំងការធ្វើដំណើរទៅមក។ ពួកគាត់បានថ្លែងអំណរអរគុណដល់រាជរដ្ឋាភិបាលជាខ្លាំង ដែលតែងតែគិតគូរពីសុខទុក្ខរបស់ពលរដ្ឋគ្រប់ៗ គ្នា ពិសេសការផ្តល់រថយន្តក្រុងជិះឥតគិតថ្លៃរៀងរាល់បុណ្យជាតិធំៗ ដោយជួយសម្រួលខ្ពស់លើការចំណាយថ្លៃធ្វើដំណើរ។

ប្រជាពលរដ្ឋបានបញ្ជាក់ថា នេះមិនមែនជាលើកទី ០១ ទេ ដែល សម្ដេចតេជោ ហ៊ុន សែន បន្តរហូតមកដល់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានយកចិត្តទុកដាក់ចំពោះប្រជាពលរដ្ឋ។ នេះសបញ្ជាក់ឲ្យឃើញថា មកពីកត្តាសុខសន្តិភាពរបស់ប្រទេសកម្ពុជា អាចឲ្យប្រជាពលរដ្ឋដើរហើរបានគ្រប់ទីកន្លែង តាមរមណីយដ្ឋានទេសចរណ៍ -ល-។

គួររំលឹកថា រថយន្តក្រុងសាធារណៈរបស់រាជរដ្ឋាភិបាល តាមរយៈសាលារាជធានីភ្នំពេញ ចំនួន ៥៩៧ គ្រឿង បានដាក់ឲ្យបម្រើដឹកជញ្ជូនឥតគិតថ្លៃជូនពលរដ្ឋ តាំងពីថ្ងៃទី ១២ មកម្ល៉េះ រហូតដល់ថ្ងៃទី ១៧ ខែមេសា ឆ្នាំ ២០២៥ នេះ គឺជាថ្ងៃបញ្ចប់ហើយ ពោលមានរយៈពេល ០៦ ថ្ងៃ។

ក្នុងចំណោមរថយន្តក្រុងសាធារណៈទាំង ៥៩៧ គ្រឿងខាងលើ មាន ១០០ គ្រឿង សម្រាប់ប្រើប្រាស់ដឹកជញ្ជូនពលរដ្ឋក្នុងរាជធានីភ្នំពេញ និង ៤៩៧ គ្រឿងទៀត សម្រាប់ប្រើប្រាស់ក្នុងការដឹកជញ្ជូនពលរដ្ឋចេញទៅតាមបណ្ដាខេត្តទាំង ២៤ នៅទូទាំងប្រទេស និងត្រឡប់ពីតាមបណ្ដាខេត្តចូលមករាជធានីភ្នំពេញវិញផងដែរ៕

អត្ថបទ ៖ សុភា