ព័ត៌មានជាតិ

ទូតបារាំង សន្យានឹងស្វែងរកដៃគូដ៏មានសក្ដានុពលជួយគាំទ្រវិស័យសុខាភិបាល នៅកម្ពុជា

បានផុស

១ year មុន

នៅ

ថ្ងៃព្រហស្បតិ៍ ២៤ មេសា ២០២៥

ដោយ

លោក Jacques PELLET ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋបារាំងប្រចាំព្រះរាជាណាចក្រកម្ពុជា បានសន្យាថា នឹងជួយស្វែងរកដៃគូនានា ដ៏មានសក្ដានុពល ជាពិសេសស្ថាប័ននានា នៃប្រទេសបារាំង ដើម្បីជួយគាំទ្រការបង្កើតផែនការយុទ្ធសាស្ត្រ ៥ ឆ្នាំ របស់មជ្ឈមណ្ឌលស្រាវជ្រាវសុខភាពសកល នៅសាកលវិទ្យាល័យវិទ្យាសាស្ត្រសុខាភិបាល។

នាឱកាសអញ្ជើញទស្សនកិច្ចនៅសាកលវិទ្យាល័យវិទ្យាសាស្ត្រសុខាភិបាល និងស្វែងយល់អំពីមជ្ឈមណ្ឌលស្រាវជ្រាវសុខភាពសកល នៅសាកលវិទ្យាល័យវិទ្យាសាស្ត្រសុខាភិបាល កាលពីថ្ងៃទី ២៣ មេសា លោក Jacques PELLET បានកោតសរសើរ និងគាំទ្រ គំនិតផ្ដួចផ្ដើម ដំណើរការ មជ្ឈមណ្ឌលស្រាវជ្រាវសុខភាពសកល នៅសាកលវិទ្យាល័យវិទ្យាសាស្ត្រសុខាភិបាល ដែលជាគម្រោងមួយដ៏មានសក្តានុពលសម្រាប់ប្រទេសកម្ពុជា និងសម្រាប់តំបន់។

លោកឯកអគ្គរដ្ឋទូត បានបង្ហាញពីការគាំទ្រ និងសន្យាស្វែងរកដៃគូនានា ដ៏មានសក្តានុពល ជាពិសេសស្ថាប័ននានា នៃប្រទេសបារាំង ដើម្បីជួយគាំទ្រការបង្កើតផែនការយុទ្ធសាស្ត្រ ៥ ឆ្នាំ របស់មជ្ឈមណ្ឌលស្រាវជ្រាវសុខភាពសកល នៅសាកលវិទ្យាល័យវិទ្យាសាស្ត្រសុខាភិបាល។

លោកសាស្ត្រាចារ្យ សាផុន វឌ្ឍនៈ ទីប្រឹក្សាក្រសួងសុខាភិបាល និងជាសកលវិទ្យាធិការ នៃសាកលវិទ្យាល័យវិទ្យាសាស្ត្រសុខាភិបាល បានថ្លែងអំណរគុណដល់ លោកឯកអគ្គរដ្ឋទូត និងស្ថានទូតបារាំងប្រចាំកម្ពុជា ដែលបានគាំទ្រសាកលវិទ្យាល័យវិទ្យាសាស្ត្រសុខាភិបាល តាំងពីដើមមក រហូតមកដល់ពេលបច្ចុប្បន្ននេះ។

លោកសាស្ត្រាចារ្យ បានជម្រាបអំពីគំនិតផ្ដួចផ្ដើមក្នុងការរៀបចំដំណើរការមជ្ឈមណ្ឌលស្រាវជ្រាវសុខភាពសកល នៅសាកលវិទ្យាល័យវិទ្យាសាស្ត្រសុខាភិបាល ដែលមានគោលបំណងជាសេនាធិការរបស់ក្រសួងសុខាភិបាល ក្នុងការសំយោគនូវឯកសារវិទ្យាសាស្ត្រ គោលនយោបាយ យុទ្ធសាស្ត្រ មគ្គុទ្ទេសក៍ណែនាំនានា ដែលបាននិងកំពុងប្រើប្រាស់នៅលើពិភពលោកដែលទាក់ទងនឹងបញ្ហាសុខភាពសកល ក៏ដូចជាការបង្កើតហេដ្ឋារចនាសម្ព័ន្ធ និងធនធាន ដ៏មានសក្ដានុពលសម្រាប់ការសម្របសម្រួលសហការស្រាវជ្រាវជាមួយដៃគូជាតិ និងអន្តរជាតិនានា៕

អត្ថបទ ៖ សំអឿន