ព័ត៌មានជាតិ

សម្តេចធិបតី៖ ឃើញក្របខណ្ឌគោលនយោបាយស្រក់ទឹកមាត់ ដល់ឃើញលទ្ធផលអនុវត្តស្រក់ទឹកភ្នែក

បានផុស

១ year មុន

នៅ

ថ្ងៃចន្ទ ២៨ មេសា ២០២៥

ដោយ

ក្នុងពិធី “សំណេះសំណាលជាមួយថ្នាក់ដឹកនាំអង្គការវិជ្ជាជីវៈ ក្នុងឱកាសខួបអនុស្សាវរីយ៍លើកទី ១៣៩ ទិវាពលកម្មអន្តរជាតិ ១ ឧសភា កាលពីម្សិលមិញនេះ សម្តេចធិបតី ហ៊ុន ម៉ាណែត បានក្រើនរំលឹកឲ្យបង្កើតយន្តការតាមដានការដាក់ចេញគោលនយោបាយរបស់រដ្ឋាភិបាល រួមទាំងការអនុវត្តវិធានការអន្តរាគមន៍ឱ្យចំគោលដៅនិងប្រកបដោយប្រសិទ្ធភាព។

សម្តេចធិបតីបានគូសបញ្ជាក់ថា ការដាក់ចេញគោលនយោបាយមិនច្បាស់លាស់ រួមទាំងខ្វះខាតការតាមដានពេលខ្លះបង្កើតជាបញ្ហាដោយសារការនាំសារខុស ធ្វើឲ្យមានការភាន់ច្រឡំលើការដាក់ចេញគោលនយោបាយរបស់រដ្ឋាភិបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

«គោលនយោបាយយើងដាក់ចេញ ប៉ុន្តែនីតិវិធីអនុវត្តគ្មានប្រសិទ្ធភាព។ យើងប្រកាសនៅតែខាងលើ ប៉ុន្តែខាងក្រោមអត់ទទួលបានព័ត៌មានច្បាស់លាស់ ទីបំផុតក្អែកមួយជាក្អែក ១០ អនុវត្តគ្មានប្រសិទ្ធភាព»។

ដោយលើកឡើងប្រយោគ «ឃើញក្របខណ្ឌគោលនយោបាយស្រក់ទឹកមាត់ ដល់ឃើញលទ្ធផលអនុវត្តស្រក់ទឹកភ្នែក» សម្តេចបានថ្លែងកត់សម្គាល់ថា ការដាក់ចេញគោលនយោបាយរបស់រដ្ឋាភិបាលគឺដើម្បីបម្រើប្រយោជន៍ដល់ប្រជាពលរដ្ឋ ប៉ុន្តែបើការអនុវត្តគ្មានភាពច្បាស់លាស់ នាំឲ្យមានបញ្ហាទៅវិញ។

សម្តេចបានលើកឡើងពីការចុះបញ្ជីសេដ្ឋកិច្ចក្រៅប្រព័ន្ធ ដែលរដ្ឋាភិបាលមិនដាក់ជាកាតព្វកិច្ច ដើម្បីបង្ការនិងការពារជនឆ្លៀតឱកាសទាញយកផលប្រយោជន៍ពីគោលនយោបាយគាំពារដល់អង្គភាពសេដ្ឋកិច្ចក្រៅប្រព័ន្ធ។

មួយទៀតឃើញការអនុវត្តវីសានៅក្រៅប្រទេស ក៏មានការភាន់ច្រឡំដោយសារមានការគិតថ្លៃសេវាលើស រហូតដល់មានការចោទប្រកាន់លើរដ្ឋាភិបាល ដែលការពិតកើតឡើងពីសេវារត់ការពីខាងក្រៅ។ ដើម្បីច្បាស់និងមានតម្លាភាព ត្រូវបញ្ជាក់ឲ្យច្បាស់។ មួយណាជាតម្លៃផ្លូវការ មួយណាជាតម្លៃរត់សេវាខាងក្រៅ។

ការបញ្ចូនសារនេះសំខាន់ណាស់ ពីថ្នាក់លើដល់ថ្នាក់ក្រោម និងតាមមូលដ្ឋានខេត្តក្រុងត្រូវសហការគ្នាដើម្បីផ្សព្វផ្សាយព័ត៌មានឲ្យបានច្បាស់លាស់ ដើម្បីបញ្ចៀសការបញ្ជូនសារខុសនាំឲ្យកើតការយល់ច្រឡំ។ សម្តេចធិបតីបានបញ្ជាក់បន្ថែម។

សម្តេចធិបតីបន្តទៀតថា ការដាក់ចេញគោលនយោបាយរបស់រដ្ឋាភិបាល ជួនកាលក៏មានចំណុចខ្វះខាតដែលត្រូវកែសម្រួល ដែលនេះទាមទារការតាមដានជាប់ជាប្រចាំដើម្បីរកវិធីដោះស្រាយ។

ក្រៅពីណែនាំឲ្យគ្រប់ស្ថាប័នត្រូវដាក់ចេញយន្តការតាមដានជាប់ជាប្រចាំ នាយករដ្ឋមន្តីកម្ពុជាក៏ឲ្យសម្រួលកាត់បន្ថយភាពនីតិវិធីស្មុគស្មាញឲ្យបានច្រើន ដើម្បីបង្កើនប្រសិទ្ធភាពការអនុវត្តការងារ៕

Related Topics:សម្ដេចធិបតី ហ៊ុន ម៉ាណែត