ព័ត៌មានជាតិ

សភាទីម័រថាមិនអាចរកពាក្យអ្វីមកព័ណ៌នាពីអារម្មណ៍ដែលពួកគេទទួលបានពីកម្ពុជាទេ

បានផុស

១២ ខែ មុន

នៅ

ថ្ងៃព្រហស្បតិ៍ ៨ ឧសភា ២០២៥

ដោយ

សមាជិកសភាទីម័រឡេស្ដេពីគណបក្សមានអាសនៈទាំង៥បានឡើងថ្លែងសន្ទរកថាស្វាគមន៍សម្ដេចតេជោ ហ៊ុន សែន និងថាការជួយពីកម្ពុជាចំពោះទីម័រកន្លងទៅធ្វើឱ្យពួកគេមានភាពកក់ក្ដី រំភើប និងដឹងគុណជានិច្ច។ ពួកគេថាអារម្មណ៍របស់ពួកគេចំពោះកម្ពុជាគឺមិនអាចពិព័ណ៌នាដោយពាក្យបាននោះទេ។

ថ្លែងក្នុងសម័យប្រជុំសភា ទីម័រឡេស្ដេ ថ្ងៃទី៨ ខែឧសភា ឆ្នាំ២០២៥នេះ សមជិកសភាពីគណបក្សទាំង៥បានលើកឡើងក្នុងន័យរួមថាដំណើរទស្សនកិច្ចរបស់សម្ដេចតេជោ ទៅទីម័រឡេស្ដេ នៅពេលនេះគឺជាប្រវត្តិសាស្ត្រសម្រាប់ប្រទេសរបស់ពួកគេ និងសង្ឃឺមថាកម្ពុជា-ទីម័រនឹងពូនជ្រុំទំនាក់ទំនងបន្ថែមទៀតទាំងនីតិបញ្ញាត្តិ និងប្រតិបត្តិ។

អ្នកនាំពាក្យព្រឹទ្ធសភាលោក ជា ធីរិទ្ធ បានឱ្យអ្នកសារព័ត៌មានដឹងថា៖ «ពួកគេបង្ហាញនូវក្ដីរីករាយនិងស្វាគមន៍ម្ដងហើយម្ដងទៀត ដែលពួកគេមិនដឹងថារកពាក្យអ្វីមកពិព័ណ៌នាចំពោះក្ដីរំភើបក៏ដូចជាការដឹងគុណចំពោះការចូលរួមចំណែកជួយរបស់កម្ពុជាជាពិសេសតួអង្គរបស់សម្ដេចតេជោតែម្ដង»។

ថ្លែងក្នុងវិមានសភាទីម័រឡេស្ដេ សម្ដេចតេជោ ហ៊ុន សែន បានលើកឡើងពីប្រវត្តិនៃទំនាក់ទំនងជាមួយប្រទេសទីម័រ និងបទពិសោធន៍របស់កម្ពុជាពេលចូលជាសមាជិកអាស៊ាន ព្រមទាំងគោលដៅ៤សំខាន់ដែលកម្ពុជាព្រមចូលអាស៊ានដោយសារការមិនជ្រែតជ្រែកកិច្ចការផ្ទៃក្នុង កុងសង់ស៊ីស និងការអភិវឌ្ឍន៍សេដ្ឋកិច្ច និងច្រកទ្វារនៅកាឡានុវត្តន៍ភាពការទូត។

ចុងក្រោយសម្ដេចបានរំលេចពីតួនាទីរបស់អាស៊ានដែលមានសក្ដានុពលរបស់អាស៊ានក្នុងស្ថានភាពពិភពលោកបច្ចុប្បន្ន។

សម្ដេចតេជោ ហ៊ុន សែន កំពុងបំពេញទស្សនកិច្ចរយៈពេល៣ថ្ងៃនៅប្រទេសទីម័រឡេស្ដពីថ្ងៃទី៧ ដល់ថ្ងៃទី៩ ខែឧសភា ឆ្នាំ២០២៥ ប្រធានាធិបតីទីម័រឡេស្ដេលោក ចូហ្សេ រ៉ាមូស ហូតា បានលើកឡើងថា វាគឺជាកិត្តយស និងមោទនភាពបំផុតសម្រាប់ប្រជាជនលោកដែលបានទទួលស្វាគមន៍ឥស្សរជនដែលមានឥទ្ធិពលបំផុតនៅក្នុងតំបន់អាស៊ីអាគ្នេយ៍។

គួរឱ្យដឹងផងដែរថាទំនាក់ទំនងកម្ពុជានិងប្រទេសទីម័រឡេស្ដេបានបង្កើតឡើងនៅឆ្នាំ២០០២ បន្ទាប់ពីប្រទេសនេះបានប្រកាសឯករាជ្យ។ ចាប់តាំងពីបង្កើតទំនាក់ទំនងកម្ពុជាតែងគាំទ្រជានិច្ចដល់ប្រទេសនេះជាពិសេសលើឆាកអន្តរជាតិ ហើយកម្ពុជាក៏ជាប្រទេសជំរុញខ្លាំងបំផុតមួយឱ្យទីម័រឡេស្ដេក្លាយជាសមាជិកអាស៊ានទៀតផង៕

អត្ថបទដោយ ហ៊ុន សិរីវឌ្ឍន៍