ព័ត៌មានអន្ដរជាតិ

អភិបាលស្រុកមួយរបស់ឡាវហាមបុគ្គលិករដ្ឋទាំងអស់ទទួលទានគ្រឿងស្រវឹងក្នុងម៉ោងធ្វើការ

បានផុស

៣ សប្តាហ៍ មុន

នៅ

ថ្ងៃចន្ទ ១២ ឧសភា ២០២៥

ដោយ

ប្រជាជនឡាវបានបង្ហាញការភ្ញាក់ផ្អើលយ៉ាងខ្លាំងតាមរយៈប្រព័ន្ធផ្សព្វផ្សាយបណ្តាញសង្គមក្នុងស្រុក បន្ទាប់ពីអភិបាលស្រុក សៀងខ (Xiangkho) ខេត្តហ៊ួផាន់ (Houphann) បានចេញសេចក្តីប្រកាសហាមបុគ្គលិករដ្ឋទាំងអស់មិនឱ្យទទួលទានគ្រឿងស្រវឹងក្នុងម៉ោងធ្វើការ លើកលែងតែក្នុងករណីមានពិធីទទួលភ្ញៀវគណៈប្រតិភូជាន់ខ្ពស់របស់រដ្ឋបាលស្រុកប៉ុណ្ណោះ។

ទិដ្ឋភាពជីវភាពប្រជាជនឡាវនៅស្រុកសៀងខ (Xiangkho) ខេត្តហ៊ួផាន់ (Houphann) ស្ថិតនៅតំបន់ភ្នំ ជាប់ព្រមដែនវៀតណាម។ បណ្តាញសង្គម

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីជូនដំណឹងដែលបង្កការភ្ញាក់ផ្អើលនេះ បានព្រមានពីការដាក់ទោស ដោយលើកឡើងថា៖‍«ប្រសិនបើបុគ្គលិករដ្ឋណាម្នាក់នៅតែល្មើសបំពាននឹងត្រូវទទួលទោស»។

សារព័ត៌មានថៃ MGR Online បានរាយការណ៍ដោយដកស្រង់ពីសារព័ត៌មានក្នុងស្រុករបស់ប្រទេសឡាវថា កាលពីថ្ងៃទី៩ខែឧសភា ឆ្នាំ២០២៥ រដ្ឋបាលស្រុកសៀងខ (Xiangkho) ខេត្តហ៊ួផាន់ (Houphann) ប្រទេសឡាវ ជាប់ប្រទេសវៀតណាម បានចេញសេចក្តីប្រកាសមួយស្តីការហាមបុគ្គលិករដ្ឋទាំងអស់មិនឱ្យទទួលទានគ្រឿងស្រវឹងគ្រប់ប្រភេទក្នុងម៉ោងធ្វើការ។

សេចក្តីប្រកាសនេះត្រូវបានធ្វើឡើងដោយផ្អែកតាមច្បាប់ស្តីពីការគ្រប់គ្រងមូលដ្ឋាននិងសេចក្តីសម្រេចរបស់អង្គប្រជុំគណៈកម្មាធិការគណបក្សប្រជាជនបដិវត្តន៍ឡាវរបស់រដ្ឋបាលស្រុកចុះថ្ងៃទី២៩ ខែមេសា ឆ្នាំ២០២៥ និងចុះហត្ថលេខាដោយអភិបាលស្រុក។ ខ្លឹមសារមួយចំនួននៃសេចក្តីប្រកាសនេះរួមមាន៖

១. បុគ្គលិករដ្ឋទាំងអស់ដូចជា គ្រូបង្រៀន កងកម្លាំងប្រដាប់អាវុធគ្រប់ប្រភេទ កងកម្លាំងនគរបាល និងបុគ្គលិកសហគ្រាសរដ្ឋទាំងអស់មិនត្រូវទទួលទានគ្រឿងស្រវឹងគ្រប់ប្រភេទ ក្នុងថ្ងៃឬក្នុងម៉ោងធ្វើការ ពីថ្ងៃច័ន្ទដល់ថ្ងៃសុក្រចាប់ពីវេលាម៉ោង៦ព្រឹក ដល់ម៉ោង៤ល្ងាច។

២. អនុញ្ញាតឱ្យទទួលទានគ្រឿងស្រវឹងបានលុះត្រាតែមានពិធីទទួលភ្ញៀវគណៈប្រតិភូជាន់ខ្ពស់របស់រដ្ឋបាលស្រុកទាំងក្នុងស្រុកនិងបរទេស និងក្នុងថ្ងៃសំខាន់របស់បក្ស និងថ្ងៃបុណ្យជាតិប៉ុណ្ណោះ ប៉ុន្តែត្រូវសុំការឯកភាពពីការិយាល័យនយោបាយស្រុកជាមុន។

៣. ប្រសិនបើបុគ្គលិករដ្ឋណាម្នាក់នៅតែល្មើសបំពាននឹងត្រូវទទួលទោស។

៤. សម្រាប់បុគ្គលិករដ្ឋទាំងអស់ដូចជា គ្រូបង្រៀន សមាជិកបក្ស យោធា នគរបាល និងបុគ្គលិកសហគ្រាសរដ្ឋត្រូវតែអនុវត្តតាមសេចក្តីប្រកាសនេះយ៉ាងតឹងរ៉ឹង។

៥. ឱ្យគ្រប់ប្រធានអង្គភាពស្ថាប័នទាំងអស់ចំណុះស្រុក អង្គភាពការពារជាតិ ការពារសន្តិសុខ មេបញ្ជាការវរការពារព្រំដែន នាយកសាលា នាយកសហគ្រាសរដ្ឋត្រូវអ្នកតាមដានចំពោះបុគ្គលិកក្រោមឱវាទរបស់ខ្លួនក្នុងអង្គភាពស្ថាប័ននីមួយៗយ៉ាងជិតស្និទ្ធ។

៦. សេចក្តីប្រកាសនេះត្រូវបានអនុវត្តន៍សម្រាប់តែក្នុងតំបន់ភូមិសាស្ត្រដែលគ្រប់គ្រងរបស់ស្រុកសៀងខ ខេត្តហ៊ួផាន់ ប៉ុណ្ណោះ និងចូលជាធរមានចាប់ពីថ្ងៃចុះហត្ថលេខារបស់អភិបាលស្រុកនេះតទៅ។

ប្រភពបានបន្តថា បន្ទាប់ពីការចេញផ្សាយសេចក្តីប្រកាសនេះ ត្រូវបានមជ្ឈដ្ឋានប្រជាជននិងបណ្តាញសង្គមឡាវជាច្រើនបានបង្ហាញការសាទរនិងបង្ហាញការរិះគន់ជាច្រើននៅលើបណ្តាញសង្គមអនឡាញឡាវ និងបានចោទជាសំណួរថា តើកាលពីពេលកន្លងទៅមានន័យថា បុគ្គលិករដ្ឋក្នុងស្រុកមួយនេះទទួលទានតែគ្រឿងស្រវឹងក្នុងម៉ោងរដ្ឋបាលមែនទេ?

សូមបញ្ជាក់ថា ភូមិសាស្ត្រស្រុកសៀងខ (Xiangkho) មានទីតាំងស្ថិតនៅតាមជើងភ្នំខ្ពស់នៅភាគខាងជើងនៃខេត្តហ៊ួផាន់ (Houphann)របស់ប្រទេសឡាវ ដែលមានព្រំប្រទល់ដែនជាប់នឹងខេត្ត Son La របស់ប្រទេសវៀតណាម៕

ដោយភ្នាក់ងារ

Related Topics:ឡាវ