ព័ត៌មានជាតិ

លោក ហេង សួរ ៖ ការចូលរួមពីពលរដ្ឋគ្រប់ស្រទាប់វណ្ណៈក្នុងការគាំទ្រដល់ កងកម្លាំងប្រដាប់អាវុធនៅជួរមុខ រឹតតែធ្វើឲ្យកម្លាំងការពារជាតិកម្ពុជាកាន់តែរឹងមាំ

បានផុស

១ ម៉ោង មុន

នៅ

ថ្ងៃអង្គារ ១០ មិថុនា ២០២៥

ដោយ

លោក ហេង សួរ បញ្ជាក់ថា ការចូលរួមពីប្រជាពលរដ្ឋគ្រប់ស្រទាប់វណ្ណៈ ក្នុងការគាំទ្រដល់កងកម្លាំងប្រដាប់អាវុធនៅជួរមុខនេះ គឺ រឹតតែធ្វើឲ្យកម្លាំងការពារជាតិកម្ពុជាកាន់តែរឹងមាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបញ្ជាក់នេះ ក្នុងឱកាស លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានដឹកនាំគណៈប្រតិភូជាថ្នាក់ដឹកនាំក្រសួង និងថ្នាក់ដឹកនាំសហជីព អញ្ជើញចុះសំណេះសំណាល សួរសុខទុក្ខ និងប្រគល់អំណោយជាគ្រឿងឧបភោគបរិភោគជូនដល់នាយទាហាន នាយទាហានរង និងពលទាហាន នៃកងពលតូចថ្មើរជើងលេខ ៤២ ដែលកំពុងឈរជើងនៅសមរភូមិមុខទិសប្រាសាទតាមាន់ ក្នុងខេត្តឧត្តរមានជ័យ កាលពីព្រឹកថ្ងៃទី ១០ ខែមិថុនា ឆ្នាំ ២០២៥ នេះ។

នាឱកាសនោះ លោក ហេង សួរ បានសម្ដែងនូវការកោតសរសើរយ៉ាងជ្រាលជ្រៅបំផុតចំពោះវីរភាព ស្មារតីរួបរួមសាមគ្គី និងការលះបង់របស់នាយទាហាន នាយទាហានរង និងពលទាហាន នៃកងពលតូចថ្មើរជើងលេខ ៤២ ដែលខិតខំការពារអធិបតេយ្យជាតិ បូរណភាពដែនដីកម្ពុជាយ៉ាងស្វាហាប់ម៉ឺងម៉ាត់ គួរជាទីគោរពដឹងគុណពីសំណាក់ថ្នាក់ដឹកនាំ មន្ត្រីរាជការ កម្មករ-និយោជិត ក៏ដូចជាប្រជាពលរដ្ឋគ្រប់ស្រទាប់វណ្ណៈនៅសមរភូមិក្រោយ។

លោករដ្ឋមន្ត្រីបានបញ្ជាក់ថា «ការចូលរួមពីប្រជាពលរដ្ឋគ្រប់ស្រទាប់វណ្ណៈ ទាំងព្រះសង្ឃ បព្វជិតសាសនាផ្សេងៗ ទាំងមន្ត្រីរាជការស៊ីវិល ទាំងកម្មករ-និយោជិត ទាំងវិស័យឯកជន អាជីវករ ក្នុងការគាំទ្រដល់កងកម្លាំងប្រដាប់អាវុធនៅជួរមុខនេះ គឺ រឹតតែធ្វើឲ្យកម្លាំងការពារជាតិយើងកាន់តែរឹងមាំ»។

លោករដ្ឋមន្ត្រីបន្តទៀតថា ការសួរសុខទុក្ខនាយទាហាន នាយទាហានរង និងពលទាហាន ដោយផ្ទាល់នេះ គឺជាសក្ខីភាពបញ្ជាក់ជូនកងទ័ពនៅសមរភូមិមុខថា នៅសមរភូមិក្រោយ ក៏មានថ្នាក់ដឹកនាំក្រសួង ស្ថាប័ន សហជីព កម្មករ-និយោជិត នៅចាំជួយជាកម្លាំងរួបរួមសាមគ្គីក្នុងការចូលរួមការពារអធិបតេយ្យជាតិ ជាកម្លាំងដ៏សំខាន់មួយក្នុងការគាំទ្រកងកម្លាំងប្រដាប់អាវុធនៅសមរភូមិមុខ។ កងកម្លាំងប្រដាប់អាវុធនៅសមរភូមិមុខ មិននៅឯកោទេ ពោលគឺមានតែទទួលបានការគោរពដឹងគុណ ផ្សារភ្ជាប់នូវមនោសញ្ចេតនាដ៏ជ្រាលជ្រៅណាស់ ពីព្រោះយើងទាំងអស់គ្នាក៏ជាកូនចៅរបស់កងកម្លាំងប្រដាប់អាវុធផងដែរ។

ជាមួយនេះ លោក ហេង សួរ ក៏បានបង្ហាញការប្ដេជ្ញាចិត្តគាំទ្រគ្រប់បែបយ៉ាងជូនកងកម្លាំងប្រដាប់អាវុធនៅជួរមុខ ដើម្បីផ្គត់ផ្គង់តម្រូវការចាំបាច់ផ្សេងៗ របស់កងទ័ព សំដៅធានាឲ្យបាននូវជ័យជម្នះក្នុងការការពារជាតិ ការពារអធិបតេយ្យ និងបូរណភាពដែនដីរបស់ជាតិកម្ពុជា។

គួរជម្រាបថា គ្រឿងឧបភោគបរិភោគដែលត្រូវបានប្រគល់ជូន នាយទាហាន នាយទាហានរង និងពលទាហាន នៃកងពលតូចថ្មើរជើងលេខ ៤២ រួមមាន ៖ មីកញ្ចប់ ទឹកត្រី ទឹកស៊ីអ៊ីវ ត្រីងៀត សាច់គោងៀត ទឹកបរិសុទ្ធ ថ្នាំសង្កូវ តង់កៅស៊ូ កំសៀវ ម៉ាស៊ីនភ្លើង ព្រីខ្សែភ្លើង និងប្រេងម៉ាស៊ូត៕

អត្ថបទ ៖ ពិសី