ផ្លូវក្រាលកៅស៊ូ ៣ ខ្សែ នៅ​ខេត្តព្រះវិហារ​​សម្រេច​​សាងសង់​បាន​ជាង ៩៥% បម្រើប្រយោជន៍ពលរដ្ឋ​ជាង ៦ ០០០ គ្រួសារ​

ស្ថិត​ក្រោម​គម្រោងគាំទ្រនិរន្តរភាពហេដ្ឋារចនាសម្ព័ន្ធជនបទ ដើម្បីទីផ្សារកសិករ និងពាណិជ្ជូបនីយកម្មកសិកម្ម (SAAMBAT) ផ្លូវ​ក្រាលកៅស៊ូ​ចំនួន ៣ ខ្សែ​នៅ​ក្នុង​ខេត្តព្រះវិហារ មានវឌ្ឍនភាព​ការ​សាងសង់​សម្រេច​បានប្រមាណ ៩៥% ហើយគ្រោងបញ្ចប់នៅពេលខាងមុខនេះ។

លោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ កាលពីថ្ងៃទី១០ ខែមិថុនា ឆ្នាំ២០២៥ បានដឹកនាំមន្ដ្រីបច្ចេកទេស​ចុះ​ទៅពិនិត្យវឌ្ឍនដំណើរការ​សាងសង់ផ្លូវ​ទាំង ៣ ខ្សែនៅក្នុងខេត្តព្រះវិហារ ដែល​កំពុង​ឈាន​ទៅ​បញ្ចប់​ការ​សាងសង់​ក្នុង​ពេល​ខាងមុខ។

ខ្សែទី១៖ ខ្សែផ្លូវ (អូរតាលោក-ដូង) ជាការដ្ឋានសាងសង់ផ្លូវសរុបប្រវែង ១៣,៩៨គ.ម. ទទឹង ៨ម៉ែត្រ ក្នុងនោះប្រភេទផ្លូវកៅស៊ូពីរជាន់ (DBST) ប្រវែង ១៣,៦៤គ.ម និងក្រាលបេតុង ០,៣៤គ.ម មានសំណង់សិល្បការ្យមួយចំនួន តភ្ជាប់ពីភូមិអូរតាលោក ឃុំរមទម ទៅកាន់ភូមិដូង ឃុំរីករាយ ស្រុករវៀង ដែលមានអ្នកទទួលផលដោយផ្ទាល់ ចំនួន ២ ១៤២​គ្រួសារ និងប្រយោល ចំនួន ៤ ៧៩០ គ្រួសារ។

ខ្សែទី២៖ ខ្សែផ្លូវ (តាំងត្រក – ថ្កែង) ជាការដ្ឋានសាងសង់ផ្លូវសរុបប្រវែង ៥,០២ គ.ម. ទទឹង ៨ម៉ែត្រ ក្នុងនោះផ្លូវក្រាលកៅស៊ូពីរជាន់ (DBST) ប្រវែង ៤,៥២គ.ម និងក្រាលបេតុង ០,៥គ.ម មានសំណង់សិល្បការ្យមួយចំនួន តភ្ជាប់ពីភូមិតំងត្រក ឃុំរបៀប ទៅដល់ភូមិថ្កែង ឃុំរហ័ស ស្រុករវៀង ដែលមានអ្នកទទួលផលដោយផ្ទាល់ ចំនួន ១ ៩៤៩គ្រួសារ និងប្រយោលចំនួន ១ ៣០៩គ្រួសារ។

ខ្សែទី៣៖ ខ្សែផ្លូវ (ថ្នល់កែង – ស្រែធំ) ជាការដ្ឋានសាងសង់ផ្លូវសរុបប្រវែង ៣,៧៦គ.ម.. ទទឹង ៨ម៉ែត្រ ក្នុងនោះផ្លូវក្រាលកៅស៊ូពីរជាន់ (DBST) ប្រវែង ៣,៥៦គ.ម និងក្រាលបេតុង ០,២០គ.ម មានសំណង់សិល្បការ្យមួយចំនួន តភ្ជាប់ពីភូមិថ្នល់កែង ទៅដល់ភូមិស្រែធំ ឃុំរុងរឿង ស្រុករវៀង ដែលមានអ្នកទទួលផលដោយផ្ទាល់ ចំនួន ១ ០៨១គ្រួសារ និងប្រយោលចំនួន ១ ៣៥១គ្រួសារ។

ផ្លូវទាំង ៣ ខ្សែនេះ បានចាប់ផ្ដើមសាងសង់កាលពីខែមីនា ឆ្នាំ២០២៤ ស្ថិតក្នុងគម្រោងគាំទ្រនិរន្តរភាពហេដ្ឋារចនាសម្ព័ន្ធជនបទដើម្បីទីផ្សារកសិករ និងពាណិជ្ជូបនីយកម្មកសិកម្ម (SAAMBAT) គាំទ្រថវិកាដោយរាជរដ្ឋាភិបាលកម្ពុជា មូលនិធិអន្តរជាតិសម្រាប់អភិវឌ្ឍន៍កសិកម្ម ធនាគារវិនិយោគអឺរ៉ុប និងមូលនិធិវិនិយោគអាស៊ី នៃសហភាពអឺរ៉ុប។

ខ្សែផ្លូវទាំង ៣ ខ្សែនេះ កំពុងបម្រើផលប្រយោជន៍ដល់ប្រជាពលរដ្ឋដោយផ្ទាល់សរុបចំនួន ៦ ៩៦៣ គ្រួសារ និងមានអ្នកទទួល​ផលប្រយោលចំនួន ២៥ ៧៧១គ្រួសារ៕