ព័ត៌មានជាតិ

បណ្តាញផ្លូវជាតិជាច្រើនខ្សែ សាងសង់ខ្វាត់ខ្វែងតភ្ជាប់គ្នាយ៉ាងប្រទាក់ក្រឡាក្នុងខេត្តព្រះវិហារជាប់ព្រំដែនថៃ

បានផុស

១ year មុន

នៅ

ថ្ងៃចន្ទ ២៣ មិថុនា ២០២៥

ដោយ

ទោះបីមានភូមិសាស្រ្តនៅឆ្ងាយដាច់ស្រយាលចម្ងាយជាង ៣០០ គីឡូម៉ែត្រពីរាជធានីភ្នំពេញ ខេត្តព្រះវិហារដែលមានព្រំដែនជាប់ប្រទេសថៃ និងឡាវ មានការអភិវឌ្ឍហេដ្ឋារចនាសម្ព័ន្ធផ្លូវថ្នល់យ៉ាងប្រទាក់ក្រឡាតភ្ជាប់ពីប្រជុំជនទៅតំបន់ជនបទ។

ផ្លូវជាតិលេខ ៦ និងលេខ ៦២ ជាខ្សែផ្លូវជាតិដ៏សំខាន់ តភ្ជាប់មកទៅទីរួមខេត្តព្រះវិហារ។ ក្រៅពីផ្លូវជាតិលេខ ៦ និង លេខ ៦២ ជាបណ្តាញផ្លូវជាតិដ៏សំខាន់តភ្ជាប់ចរាចរណ៍មកខេត្តព្រះវិហារ មានបណ្តាញផ្លូវជាច្រើនខ្សែទៀត ត្រូវបានសាងសង់តភ្ជាប់ពីតំបន់មួយទៅតំបន់មួយក្នុងនោះមាន៖

-ផ្លូវជាតិលេខ ៩ មានប្រវែង ៦៩.៨២ គីឡូម៉ែត្រ ជាប្រភេទផ្លូវក្រាលកៅស៊ូ
–ផ្លូវជាតិលេខ ៦២ ប្រវែង ២០១.៥៥ គីឡូម៉ែត្រជាប្រភេទផ្លូវក្រាលកៅស៊ូ
–ផ្លូវជាតិលេខ ៦៤ ប្រវែង ៥២.១៥ គីឡូម៉ែត្រ ជាប្រភេទផ្លូវក្រាលកៅស៊ូ
–ផ្លូវជាតិលេខ ៩២ ប្រវែង ១០២ គីឡូម៉ែត្រ ជាប្រភេទផ្លូវក្រាលកៅស៊ូ និងមួយកំណាត់ជាផ្លូវក្រួសក្រហម –ផ្លូវជាតិលេខ ៩៤ ប្រវែង ៦១ គីឡូម៉ែត្រ ជាប្រភេទផ្លូវក្រាលកៅស៊ូ និងមួយកំណាត់ជាផ្លូវក្រួសក្រហម –ផ្លូវជាតិលេខ ៩៥ ប្រវែង ៧៩.៥០ ជាប្រភេទផ្លូវក្រាលកៅស៊ូ និងមួយកំណាត់ជាផ្លូវក្រួសក្រហម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោមក្របខ័ណ្ឌកម្មវិធីអភិវឌ្ឍន៍ហេដ្ឋារចនាសម្ព័ន្ធជនបទកម្ពុជា (RID4CAM) ផ្លូវក្រាលកៅស៊ូមួយខ្សែមានប្រវែង ៣៧,៦ គីឡូម៉ែត្រ ក៏កំពុងសាងសង់ចេញពីផ្លូវជាតិលេខ ៦៤ ត្រង់ចំណុចខាងលិចសាលាស្រុកគូលែន ភូមិគូលែនត្បូង ឃុំគូលែនត្បូង ទៅដល់ភូមិស្តៅ ឃុំស្តៅ ស្រុកសង្គមថ្មី។

ផ្លូវនេះសាងសង់ឆ្លងកាត់ឃុំចំនួន ៦ រួមមាន ឃុំគូលែនត្បូង ភ្នំត្បែងពីរ ភ្នំត្បែងមួយ រអាង និងឃុំស្ដៅ ដែលគ្រោងនឹងបញ្ចប់ការសាងសង់អំឡុងខែមិថុនា ឆ្នាំ២០២៥ខាងមុខ។

ដោយឡែក ក្រោមគម្រោងគាំទ្រនិរន្តរភាពហេដ្ឋារចនាសម្ព័ន្ធជនបទ ដើម្បីទីផ្សារកសិករនិងពាណិជ្ជូបនីយកម្មកសិកម្ម (SAAMBAT) ផ្លូវក្រាលកៅស៊ូចំនួន ៣ ខ្សែទៀត កំពុងស្ថាបនានៅក្នុងខេត្តព្រះវិហារ ដែលវឌ្ឍនភាពមកដល់ពេលនេះសម្រេចបានប្រមាណ ៩៥%។

លោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ កាលពីថ្ងៃទី១០ ខែមិថុនា ឆ្នាំ២០២៥ បានដឹកនាំមន្ដ្រីបច្ចេកទេសចុះទៅពិនិត្យវឌ្ឍនដំណើរការសាងសង់ផ្លូវទាំង ៣ ខ្សែនៅក្នុងខេត្តព្រះវិហារ ដែលកំពុងសាងសង់ឈានទៅបញ្ចប់ក្នុងពេលដ៏ខ្លីខាងមុខ។

ខ្សែទី១៖ (អូរតាលោក-ដូង) មានប្រវែង ១៣,៩៨គ.ម. ទទឹង ៨ ម៉ែត្រ ក្នុងនោះក្រាលផ្លូវកៅស៊ូពីរជាន់ (DBST) ប្រវែង ១៣,៦៤ គ.ម និងក្រាលបេតុង ០,៣៤ គ.ម តភ្ជាប់ពីភូមិអូរតាលោក ឃុំរមទម ទៅកាន់ភូមិដូង ឃុំរីករាយ ស្រុករវៀង។

ខ្សែទី២៖ (តាំងត្រក-ថ្កែង) ប្រវែង ៥,០២ គ.ម. ទទឹង ៨ម៉ែត្រ ក្នុងនោះក្រាលកៅស៊ូពីរជាន់ (DBST) ប្រវែង ៤,៥២គ.ម និងក្រាលបេតុង ០,៥គ.ម តភ្ជាប់ពីភូមិតំងត្រក ឃុំរបៀប ទៅដល់ភូមិថ្កែង ឃុំរហ័ស ស្រុករវៀង។

ខ្សែទី៣៖ (ថ្នល់កែង-ស្រែធំ) ប្រវែង ៣,៧៦គ.ម.. ទទឹង ៨ម៉ែត្រ ក្នុងនោះផ្លូវក្រាលកៅស៊ូពីរជាន់ (DBST) ប្រវែង ៣,៥៦គ.ម និងក្រាលបេតុង ០,២០គ.ម តភ្ជាប់ពីភូមិថ្នល់កែង ទៅដល់ភូមិស្រែធំ ឃុំរុងរឿង ស្រុករវៀង៊

ផ្លូវទាំង ៣ ខ្សែនេះ បានចាប់ផ្ដើមសាងសង់កាលពីខែមីនា ឆ្នាំ២០២៤ ស្ថិតក្នុងគម្រោងគាំទ្រនិរន្តរភាពហេដ្ឋារចនាសម្ព័ន្ធជនបទដើម្បីទីផ្សារកសិករ និងពាណិជ្ជូបនីយកម្មកសិកម្ម (SAAMBAT) គាំទ្រថវិកាដោយរាជរដ្ឋាភិបាលកម្ពុជា មូលនិធិអន្តរជាតិសម្រាប់អភិវឌ្ឍន៍កសិកម្ម ធនាគារវិនិយោគអឺរ៉ុប និងមូលនិធិវិនិយោគអាស៊ី នៃសហភាពអឺរ៉ុប៕