លោក ទៀ សីហា ស្នើថ្នាក់ដឹកនាំខេត្តសៀមរាប រៀបចំសោភ័ណភាពក្រុងបន្ថែមទៀត ដើម្បីទាក់ទាញភ្ញៀវទេសចរ

ឧបនាយករដ្ឋមន្ត្រី ទៀ សីហា រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តសៀមរាប បានស្នើដល់ថ្នាក់ដឹកនាំខេត្តសៀមរាប ឱ្យគិតគូរបន្ថែមទៀតចំពោះការរៀបចំសោភ័ណភាពក្រុង ដើម្បីទាក់ទាញភ្ញៀវទេសចេរមកទស្សនាខេត្តសៀមរាប ក្នុងរដូវកាលទេសភាសបៃតង(Green Sesion)។

ការស្នើនេះ ធ្វើឡើងក្នុងឱកាសលោកអញ្ជើញជួបសំណេះសំណាលជាមួយថ្នាក់ដឹកនាំ មន្ត្រីរាជការ មន្ត្រីជាប់កិច្ចសន្យា មន្ត្រីហាត់ការ បុគ្គលិក និងបងប្អូនក្រុមការងារសម្អាតបរិស្ថានរបស់សាលាខេត្តសៀមរាប ដើម្បីជាការនឹករលឹកកាលដែល ឯកឧត្តមធ្លាប់ដឹកនាំនាពេលកន្លងមក កាលពីថ្ងៃទី៤ ខែកក្កដា ឆ្នាំ២០២៥។

បន្ថែមពីនេះ លោកឧបនាយរដ្ឋមន្ត្រី ក៏បានស្នើឱ្យខេត្ត ត្រូវបន្តគិតគូរលើការងាររៀបចំ ថែទាំ សម្អាតសួនច្បារនៃគម្រោង ៣៨ខ្សែ ភ្លើងបំភ្លឺតាមដងផ្លូវជាតិបន្ថែមទៀត ដើម្បីសុវត្ថិភាពសាធារណៈ និងបងប្អូនប្រជាពលរដ្ឋក្នុងខេត្តសៀមរាប ជាពិសេសភ្ញៀវទេសចរ។

ក្នុងឱកាសនោះដែរ លោក ទៀ សីហា ក៏បានថ្លែងអំណរគុណចំពោះថ្នាក់ដឹកនាំ និងមន្ត្រីរាជការទាំងអស់របស់រដ្ឋបាលខេត្តសៀមរាប ដែលតែងតែសហការគ្នាយ៉ាងស្អិតរមួត ដែលធ្វើឱ្យកិច្ចការតូច ធំរបស់រដ្ឋបាលខេត្តបានជោគជ័យ​៕

អត្ថបទ៖ គឿន វេត