ព័ត៌មានជាតិ

រដ្ឋបាលខណ្ឌឫស្សីកែវ ជួសជុលផ្លូវសំបុកមាន់នៅសង្កាត់ច្រាំងចំរេះទី ២ សម្រួលការធ្វើដំណើរប្រជាពលរដ្ឋ

បានផុស

១១ ខែ មុន

នៅ

ថ្ងៃសៅរ៍ ១២ កក្កដា ២០២៥

ដោយ

កាលពីរសៀលថ្ងៃទី ១១ ខែកក្កដា ឆ្នាំ ២០២៥ រដ្ឋបាលខណ្ឌឫស្សីកែវ បានចុះត្រួតពិនិត្យការជួសជុលផ្លូវសំបុកមាន់ ស្ថិតក្នុងសង្កាត់ច្រាំងចំរេះទី ២ ដែលមានសារៈសំខាន់ក្នុងការបង្កើនភាពងាយស្រួលដល់ការធ្វើដំណើររបស់ប្រជាពលរដ្ឋ និងកាត់បន្ថយគ្រោះថ្នាក់ចរាចរណ៍ដោយកត្តាផ្លូវថ្នល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចុះពិនិត្យនេះដឹកនាំដោយ លោក ប៊ុត បូវណ្ណារ័ត្ន អភិបាលរងខណ្ឌឫស្សីកែវ លោក ឡេង ចាន់វិសិដ្ឋ ប្រធានការិយាល័យផែនការ និងហិរញ្ញវត្ថុ និងជំនាញពាក់ព័ន្ធ។ ខណៈពេលចុះពិនិត្យវឌ្ឍនភាពការងារជួសជុលផ្លូវសំបុកមាន់នេះ លោកអភិបាលរងខណ្ឌ ក៏បានបញ្ជាក់ និងរំលឹកដល់ក្រុមការងារ អ្នកសាងសង់ និងអ្នកទទួលការងារ ជៀសវាងការធ្វើការងារដោយប្រហែស ត្រូវយកចិត្តទុកដាក់ខ្ពស់ និងអនុវត្តឲ្យបានត្រឹមត្រូវ តាមស្តង់ដារបច្ចេកទេស និងគុណភាព ដើម្បីជៀសវាងបញ្ហាដែលអាចកើតឡើងក្រោយពេលបញ្ចប់គម្រោង។

លោកអភិបាលរង ក៏បានបន្ថែមថា គម្រោងជួសជុលផ្លូវនេះ គឺជាផ្នែកមួយ នៃការអភិវឌ្ឍហេដ្ឋារចនាសម្ព័ន្ធរស់នៅក្នុងតំបន់ សំខាន់លើបញ្ហាផ្លូវខូច ដើម្បីបង្កលក្ខណៈងាយស្រួលក្នុងការធ្វើដំណើរទៅមករបស់ប្រជាពលរដ្ឋ។

បន្ថែមពីនេះ អាជ្ញាធរខណ្ឌឫស្សីកែវ នឹងបន្តតាមដាន និងជួសជុល ផ្លូវដែលរងការខូចខាតជាបន្តបន្ទាប់ទៀត ដើម្បីជួយជំរុញការអភិវឌ្ឍក្នុងតំបន់ឲ្យមានភាពរីកចម្រើន និងប្រកបដោយសុវត្ថិភាព៕

អត្ថបទ ៖ សំណាង