សម្ដេច ហ៊ុន សែន ដាក់ការសង្ស័យលើលោក ថាក់ស៊ីន ថា ជាមេក្លោងពីក្រោយការបិទព្រំដែនជាឯកតោភាគី

ជុំវិញការបិទព្រំដែនដោយឯកតោភាគីពីសំណាក់ភាគីថៃ សម្ដេចតេជោ ហ៊ុន សែន ដាក់ការសង្ស័យលើអតីតនាយករដ្ឋមន្ត្រីថៃ លោក ថាក់ស៊ីន ថា ជាមេក្លោងនៅពីក្រោយបញ្ហានេះ។

ការដាក់ការសង្ស័យបែបនេះ គឺបន្ទាប់ពីប៉ុន្មានថ្ងៃមុនមកនេះ លោក ថាក់ស៊ីន បាននិយាយថា នឹងមិនមានសង្រ្គាមរវាងកងទ័ពនៃប្រទេសទាំងពីរទេ តែនេះជាការប្រកួតមុជទឹក អ្នកណាមុជបានយូរជាងគឺអ្នកនោះឈ្នះ។ តាមរយៈការនិយាយដូច្នេះហើយ សម្ដេចតេជោ ហ៊ុន សែន បានសន្និដ្ឋានថា ប្រហែលជាលោក ថាក់ស៊ីន គឺចង់និយាយដល់ការបិទព្រំដែន ដែលថាតើអ្នកណាទ្រាំបានយូរជាង។ «បើដូច្នេះ មេក្លោងនៅពីក្រោយការបិទព្រំដែន គឺលោក ថាក់ ស៊ីន នេះឯង»។ នេះជាការសង្ស័យរបស់សម្ដេចតេជោ។

សារជាសំណេរលើបណ្ដាញសង្គម នារសៀលថ្ងៃអាទិត្យ ទី១៣ ខែកក្កដានេះ ប្រធានព្រឹទ្ធសភានៃកម្ពុជា សម្ដេចតេជោ ហ៊ុន សែន ឆ្លើយតបទៅកាន់លោក ថាក់ស៊ីន វិញដូច្នេះថា «កម្ពុជាកំដរលែងល្បែងនេះ មិនថា ពេលណាត្រូវចប់ ប៉ុន្តែខ្លាចតែអ្នកបបួលលែងល្បែងនេះដួលរលំមុនពេលល្បែងលែងចប់»។

ទាក់ទិននឹងការបិទព្រំដែននេះ សម្ដេចតេជោ ក៏បានរំលឹកការលើកឡើងកន្លងមករបស់នាយករដ្ឋមន្ត្រីថៃ ដែលកំពុងត្រូវបានព្យួរតំណែង គឺលោកស្រី ផែងថងថាន ជាកូនស្រីលោក ថាក់ស៊ីន ផងនោះ បាននិយាយថា ការបិទព្រំដែនជាមួយកម្ពុជា ដើម្បីប្រយុទ្ធជាមួយល្បែងអនឡាញ។ ប៉ុន្តែសម្ដេច ថា ជារឿងអសីលធម៍នយោបាយដ៏ធ្ងន់ធ្ងរក្នុងទំនាក់ទំនងជាមួយប្រទេសជិតខាង ដែលរឿងនេះ តម្រូវឱ្យមានកិច្ចសហប្រត្តិបតិការរវាងបណ្តារដ្ឋក្នុងតំបន់ដើម្បីប្រយុទ្ធប្រឆាំងឧក្រិដ្ឋកម្មឆ្លងដែនគ្រប់ប្រភេទ។

សម្ដេចតេជោ ក៏បានព្រមានទម្លាយរឿង ថាក់ សុីន ដែលមកពឹងឱ្យសម្ដេចជួយ រាប់តាំងពីឆ្នាំ២០០៦ ដល់ឆ្នាំ២០២៥ ដែលថ្ងៃចុងក្រោយ គឺល្ងាចថ្ងៃទី១៥ ខែមិថុនា ឆ្នាំ២០២៥ ថាក់ សុីន បានផ្តាំតាមលោក ឃ្លាំង ហួត មកថា ត្រូវដកលោកអនុជីន ប្រធានគណបក្សភូមិចៃថៃ និងជាឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃចេញ ដើម្បីបក្សភឿថៃគ្រប់គ្រងក្រសួងមហាផ្ទៃ។

សំណេរសម្ដេចបន្តថា «សម្រាប់ខ្ញុំមិនចម្លែកទេក្នុងការដែល ថាក់ សុីន ក្បត់ខ្ញុំ ព្រោះសូម្បីតែជាតិសាសន៍គេ ក៏គេហ៊ានក្បត់ ចុះទម្រាំខ្ញុំជាតិសាសន៍ផ្សេង ថាក់ សុីន អាចក្បត់ខ្ញុំបានយ៉ាងស្រួល តែ ថាក់ សុីន កុំភ្លេចថា អ្វីដែលអ្នកប្រាប់ខ្ញុំ សុំយោបល់ខ្ញុំ មានច្រើនណាស់ រាប់ទាំងដករដ្ឋមន្ត្រីការពារជាតិ ២៤ម៉ោង និងការប្រមាថព្រះមហាក្សត្រថៃ ទាំងព្រះមហាក្សត្រមុន ទាំងព្រះមហាក្សត្របច្ចុប្បន្នផង៕

ដោយ៖ ធឿន វ៉ាន់សុង