ព័ត៌មានជាតិ

កម្ពុជានឹងចាប់អនុវត្តច្បាប់កាតព្វកិច្ចយោធាចាប់ពីឆ្នាំក្រោយទៅ

បានផុស

១០ ខែ មុន

នៅ

ថ្ងៃចន្ទ ១៤ កក្កដា ២០២៥

ដោយ

នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានប្រកាសថាចាប់ពីឆ្នាំ២០២៦តទៅកម្ពុជានឹងចាប់អនុវត្តច្បាប់កាតព្វកិច្ចយោធាដែលនឹងជួយដល់ការបង្កើនបរិមាណ និងប្រសិទ្ធភាពកងទ័ពនៅកម្ពុជា។ ជាមួយគ្នានេះសម្ដេចក៏ណែនាំឱ្យធ្វើវិសោធនកម្មច្បាប់ឱ្យបន្ថែមរយៈពេលបំពេញកាតព្វកិច្ចដល់២ឆ្នាំផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីអបអរខួបទី៣២ទិវាកងរាជអាវុធហត្ថព្រឹកថ្ងៃទី១៤ ខែកក្កដា ឆ្នាំ២០២៥នេះ នៅមណ្ឌលហ្វឹកហ្វឺនភ្នំជុំសែនរីករាយ ស្រុកសាមគ្គីមានជ័យ ខេត្តកំពង់ឆ្នាំង សម្ដេចធិបតី ហ៊ុន ម៉ាណែត បានថ្លែងថានេះគឺជាផ្នែកមួយនៃការកសាងកម្លាំងទ័ពនៅកម្ពុជា ដែលនឹងជួយឱ្យមានយោធិនគ្រប់គ្រាន់សម្រាប់បំពេញការងារ និងជួយកសាងកម្លាំងធនធានដែលមានវិន័យចូលក្នុងសង្គមផងដែរ។

សម្ដេចថា៖ «២ឆ្នាំនេះបើសិនជាគាត់មិនចូលគាត់អាចនៅវ៉ៃតបកាប់ចាក់ជាបងធំ តែដោយគាត់បានបណ្ដុះបណ្ដាលមានកាតព្វកិច្ចធ្លាប់បានអប់រំវិន័យសណ្ដាប់ធ្នាប់ឱកាសដែលគាត់ក្លាយជាបុគ្គលល្អក្នុងសង្គមកាន់តែប្រសើរ។ ហើយច្រើនឆ្នាំយើងនឹងកសាងធនធានមនុស្សដែលមានការលត់ដំក្នុងកងយុទ្ធពលខេមរភូមិន្ទកាន់តែច្រើន ហើយបើសិនជាមានសភាពការចាំបាច់យើងមានទ័ពដែលអាចចុចឈ្មោះហៅមកបានដោយគាត់មានការហ្វឹកហ្វឺនខ្លះរួចស្រេច»។

យោងតាមច្បាប់ស្ដីពីកាតព្វកិច្ចយោធាឆ្នាំ២០០៦ ពលរដ្ឋខ្មែរទាំងពីរភេទដែលមានអាយុចាប់ពី១៨ដល់៣០ឆ្នាំត្រូវបំពេញកាតាព្វកិច្ចយោធា (ស្ត្រីភេទត្រូវផ្អែកតាមការស្ម័គ្រចិត្ត) ក្រោយចប់ភារកិច្ចហើយត្រូវអនុញ្ញាតទៅកាន់ជីវភាពស៊ីវិលវិញ ប៉ុន្ដែត្រូវឋិតក្នុងក្របខណ្ឌយោធិនបម្រុង ដែលត្រូវបានទទួលការអញ្ជើញគ្រប់ពេលវេលាមកបំពេញភារកិច្ចតាមការចាំបាច់របស់ប្រទេសជាតិ ក្នុងកងទ័ពតាមគ្រប់រូបភាពតាមកាលៈទេសៈតម្រូវ៕

អត្ថបទដោយ ហ៊ុន សិរីវឌ្ឍន៍