ព័ត៌មានជាតិ

គុយបាជឿជាក់លើភាពស្មោះត្រង់កម្ពុជាចំពោះបទឈប់បាញ់ជាមួយថៃ

បានផុស

៤ ខែ មុន

នៅ

ថ្ងៃពុធ ៣០ កក្កដា ២០២៥

ដោយ

ប្រធានសភាគុយបាលោក Esteban Lazo Hernández បានអបអរសាទរចំពោះបទឈប់បាញ់រវាងកម្ពុជានិងថៃ ខណៈលោកថាប្រទេសលោកនឹង«គាំទ្រកម្ពុជាជានិច្ច»នៅលើឆាកអន្តរជាតិ។ នេះបើតាមខ្លឹមសារជំនួបជាមួយប្រធានសភាកម្ពុជាកាលពីថ្ងៃទី២៩ ខែកក្កដា ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងជំនួបជាមួយសម្ដេចសភាធិបតីនៅទីក្រុងហ្សឺណែវ ប្រទេសស្វីស លោក Esteban Lazo Hernández បានបញ្ជាក់ថា សាធារណរដ្ឋគុយបានឹងបន្តសង្កេតការណ៍ដោយយកចិត្តទុកដាក់លើករណីនេះហើយប្តេជ្ញាបន្តគំាទ្រកម្ពុជាជានិច្ចនៅលើឆាកអន្តរជាតិ។

ប្រធានសភាកម្ពុជា សម្ដេចសភាធិបតី ឃួន សុដារី មានប្រសាសន៍ថា ភាពស្មោះត្រង់របស់កម្ពុជា បានផ្ដល់ភាពជឿជាក់ដល់ទំនាក់ទំនងជាមួយគុយបាដែលឆ្នាំនេះបានឈានដល់៦៥ឆ្នាំហើយ។

សម្ដេចបន្ថែមថា៖ «ចំណងមិត្តភាព ដោយឈរលើស្មារតីមិត្តភាពស្មោះត្រង់ និងការជឿជាក់គ្នាទៅវិញទៅមក បានផ្តល់ផលប្រយោជន៍ ជាច្រើនដល់ប្រទេសទំាងពីរ និងសកលលោកផងដែរ»។

ក្រោយមានបទឈប់បាញ់កាលពីយប់ថ្ងៃទី២៨ ខែកក្កដា ឆ្នាំ២០២៥ ប្រទេសថៃបានបន្តចោទប្រកាន់មកកម្ពុជាជាបន្តបន្ទាប់ថាកម្ពុជាបានល្មើសនូវកិច្ចព្រមព្រៀង រហូតដល់ក្រសួងការបរទេសកម្ពុជាចេញមុខច្រានចោលនិងបានផ្ញើលិខិតបញ្ជាក់ពីការប្ដេជ្ញាចង់បានសន្ដិភាពរបស់កម្ពុជាទៅកាន់ប្រធានាធិបតីអាមេរិក ចិន ប្រធានអាស៊ាន អគ្គលេខាធិការអង្គការសហប្រជាជាតិ ក្រុមប្រឹក្សាសន្ដិសុខ និងតំណាងអចិន្ត្រៃយ៍ប្រទេសទាំងអស់នៅUNផងដែរ៕