ព័ត៌មានជាតិ

ជនបរទេសម្នាក់ធ្វើដំណើរដោយថ្មើរជើងពីភ្នំពេញដល់ខេត្តបាត់ដំបងត្រូវសមត្ថកិច្ចឃាត់ខ្លួន

បានផុស

៥ years មុន

នៅ

ថ្ងៃចន្ទ ៥ មេសា ២០២១

ដោយ

បាត់ដំបង ៖ ជនបរទេសម្នាក់ ត្រូវបានកម្លាំងសមត្ថកិច្ចទទួលបន្ទុកផែនការងារអន្តោប្រវេសន៍នៃស្នងការខេត្តបានរៀបចំឯកសារបញ្ជូនទៅកាន់នាយកដ្ឋានជំនាញអន្តោប្រវេសន៍នៃក្រសួងមហាផ្ទៃកាលពីថ្ងៃទី៤ ខែមេសា ឆ្នាំ២០២១ ក្រោយពីជនបរទេសរូបនេះត្រូវបានធ្វើចត្តាឡីស័កគ្រប់ចំនួន១៤ថ្ងៃតាមការណែនាំពីក្រសួងសុខាភិបាល។

សមត្ថកិច្ចឲ្យដឹងថា ជនបរទេសម្នាក់ដែលត្រូវបានបញ្ជូនទៅកាន់នាយកដ្ឋានអន្តោប្រវេសន៍មានឈ្មោះPinhede.Herveភេទប្រុស អាយុ៦៣ឆ្នាំ ជាជនជាតិបារាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចបន្តថា ជនបរទេសម្នាក់ខាងលើ កាលពីថ្ងៃទី១៨ ខែមីនា ឆ្នាំ២០២១ សមត្ថកិច្ចនគរបាលនៃអធិការដ្ឋាននគរបាលស្រុកមោងឫស្សីបានជួបប្រទះជនបរទេសខាងលើកំពុងធ្វើដំណើរដោយថ្មើរជើងក្នុងមូលដ្ឋានហើយនៅពេលសាកសួរជនបរទេសរូបនេះបានប្រាប់ថា រូបខ្លួនជាអ្នកទេសចរណ៍ដើរពីភ្នំពេញមកដល់ខេត្តបាត់ដំបងក្នុងគោលដៅទេសចរណ៍។ ប៉ុន្តែនៅជាប់ខ្លួនជនបរទេសរូបនេះ ក្រោយពីសមត្ថកិច្ចសុំការត្រួតពិនិត្យរកឃើញថា មិនមានលិខិតឆ្លងដែន(ច្បាប់ដើម)នោះទេ គឺមានតែលិខិតថតចម្លងហើយលិខិតនោះបានផុតសុពលភាពប្រើប្រាស់ថែមទៀតទើបសមត្ថកិច្ចឃាត់ខ្លួនតែម្តងដើម្បីសួរនាំបន្ត។

សមត្ថកិច្ចបន្តថា ដោយសារភាពមិនច្បាស់លាស់របស់ជនបរទេសរូបនេះដូចនេះសមត្ថកិច្ចក៏បាននាំខ្លួនទៅអនុវត្តតាមវិធានសុខាភិបាលនៅមណ្ឌលចត្តាឡីស័កក្នុងស្រុកសង្កែ។ ហើយរហូតមកដល់ពេលនេះជនបរទេសរូបនេះបានអនុវត្តការធ្វើចត្តាឡីស័កត្រឹមត្រូវ ហើយលទ្ធផលនៃការពិនិត្យអវិជ្ជមានCOVID.១៩ផងដែរ ដូច្នេះការិយាល័យជំនាញក៏បានបញ្ជូនទៅកាន់នាយកដ្ឋានអន្តោប្រវេសន៍ក្រសួងមហាផ្ទៃតែម្តងដើម្បីអនុវត្តតាមនីតិវិធី៕

ដោយ ៖ សៅ សារិទ្ធ