ព័ត៌មានជាតិ

រដ្ឋបាលក្រុងបាវិត ទទួលអំណោយគ្រឿងឧបភោគបរិភោគ សម្ភារៈប្រើប្រាស់ និងថវិកាមួយចំនួន ពីឯកឧត្តម លី ធុជ ប្រធានក្រុមការងាររាជរដ្ឋាភិបាលចុះមូលដ្ឋានក្រុងបាវិត

បានផុស

៥ years មុន

នៅ

ថ្ងៃអង្គារ ៦ មេសា ២០២១

ដោយ

ស្វាយរៀង ៖ នៅថ្ងៃទី៦ ខែមេសា ឆ្នាំ២០២១ ឯកឧត្តម លី ធុជ ទេសរដ្ឋមន្ត្រី ទទួលបន្ទុកបេសកកម្មពិសេស និងជាប្រធានក្រុមការងាររាជរដ្ឋាភិបាលចុះមូលដ្ឋានក្រុងបាវិត ខេត្តស្វាយរៀង បាននាំយកគ្រឿងឧបភោគបរិភោគ សម្ភារៈប្រើប្រាស់ និងថវិកាមួយចំនួន បាន ប្រគល់ ជូន រដ្ឋបាល ក្រុងបាវិត ដើម្បីចូលរួមក្នុងយុទ្ធនាការប្រយុទ្ធប្រឆាំងនឹងការរីករាលដាលជំងឺកូវីដ-១៩ នៅក្រុងបាវិត និងចុះសួរសុខទុក្ខ លើកទឹកចិត្តដល់មន្ត្រីរដ្ឋបាលក្រុងបាវិត សង្កាត់ទាំង៥ ក្រុមគ្រូពេទ្យ និងកងកម្លាំងប្រដាប់អាវុធ ដែលកំពុងបំពេញការងារយ៉ាងសកម្មក្នុងយុទ្ធនាការប្រយុទ្ធប្រឆាំងនឹងការរាលដាលជំងឺកូវីដ-១៩ នៅក្រុងបាវិត ខេត្តស្វាយរៀង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកឧត្តម លី ធុជ បានថ្លែងអំណរគុណ និងកោតសរសើរ ចំពោះថ្នាក់ដឹកនាំខេត្តស្វាយរៀង រដ្ឋបាលក្រុងបាវិត កងកម្លាំងប្រដាប់អាវុធទាំងបីប្រភេទ និងអាជ្ញាធរមូលដ្ឋាន ដែលបានខិតខំប្រឹងប្រែងចូលរួមយ៉ាងសកម្មក្នុងការទប់ស្កាត់ការរីករាលដាលជំងឺកូវីដ-១៩ ជាពិសេសក្រុមគ្រូពេទ្យ ដែលបានយកចិត្តទុកដាក់ ពុះពារយ៉ាងសស្រាក់សស្រាំគ្រប់បែបយ៉ាង ដើម្បីពិនិត្យ និងព្យាបាលជម្ងឺរបស់បងប្អូនប្រជាពលរដ្ឋ ក្នុងការងារគ្រប់គ្រងធ្វើចត្តាឡីស័ក និងព្យាបាលអ្នកឆ្លងជំងឺកូវីដ កំពុងរីករាលដាលយ៉ាងខ្លាំង នៅក្រុងបាវិតប៉ុន្មានថ្ងៃចុងក្រោយនេះ។

ឯកឧត្តមទេសរដ្ឋមន្ត្រី បាន សម្តែងនូវការព្រួយបារម្ភយ៉ាងខ្លាំងចំពោះរបាយការណ៍ និងលទ្ធផលនៃការធ្វើតេស្តវិជ្ជមានកូវីដយ៉ាងច្រើននៅក្រុងបាវិត និង សូម អំពាវនាវឲ្យអ្នករកស៊ីទទួលទាន ប្រជាពលរដ្ឋ និងកម្មករ-កម្មការនី ទាំងអស់នៅក្រុងបាវិត ត្រូវបន្តប្រុងប្រយ័ត្នខ្ពស់ និងអនុវត្តន៍តាមសេចក្តីណែនាំផ្សេងៗរបស់ក្រសួងសុខាភិបាលចំពោះការឆ្លងជំងឺកូវីដ-១៩ ជាពិសេសត្រូវអនុវត្តន៍ឲ្យបានខ្ជាប់ខ្ជួននូវវិធានការរបស់សម្តេចតេជោនាយករដ្ឋមន្ត្រី “៣កុំ ៣ការពារ” និងត្រូវចាក់វ៉ាក់សាំងបង្ការជំងឺកូវីដ-១៩ ឲ្យបានគ្រប់ៗគ្នានៅតាមមូលដ្ឋានរបស់ខ្លួនតាមផែនការរបស់រដ្ឋបាលខេត្ត។

ក្នុងឱកាសនោះផងដែរ ឯកឧត្តម លី ធុជ ក៏បាននាំយកមកនូវគ្រឿង ឧបភោគ បរិភោគ និងសម្ភារប្រើប្រាស់ មកប្រគល់ជូនរដ្ឋបាលក្រុងបាវិត រួមមាន៖ អង្ករ ២តោន, មីម៉ាម៉ា ៤៥កេសធំ , ត្រីខ ៤៥កេសធំ, ទឹកបរិសុទ្ធ ១០០កេស, អាលកុល ២៥០លីត្រ, ទឹកផ្លែឈើ ២០កេស, អាវពេទ្យ(PPE) ១៥០, របាំងមុខ២៥០, ម៉ាស់ធម្មតា ៦០០០, ម៉ាស់ពេទ្យ(N95) ៥០០, ស្រោមជើងពេទ្យ ១០០គូរ, អាវការពារបាញ់ថ្នាំសម្លាប់មេរោគ ៥, និងថវិកាមួយចំនួនទៀត។

ចំពោះគ្រឿង ឧបភោគ បរិភោគ និងសម្ភារប្រើប្រាស់ និងបែងចែកជូន៖ ទី១/មណ្ឌលចត្តាឡីស័កក្រុងបាវិត, ទី២/អធិការក្រុងបាវិត, ទី៣/កងរាជអាវុធហត្ថក្រុង, ទី៤/ផ្នែកសឹករងក្រុង, ទី៥/មន្ទីរពេទ្យបង្អែកជីភូ, ទី៦/មណ្ឌលសុខភាពបាវិត សម្រាប់ប្រើប្រាស់ក្នុងយុទ្ធនាការប្រយុទ្ធប្រឆាំងនឹងការរីករាលដាលជំងឺកូវីដ-១៩ នៅក្រុងបាវិត។

ឆ្លៀតក្នុងឱកាសនោះ ឯកឧត្តមទេសរដ្ឋមន្ត្រី លី ធុជ និងក្រុមការងារ បានចុះពិនិត្យអគារដែលរដ្ឋបាលខេត្តស្វាយរៀង បានរៀបចំឡើងសម្រាប់ធ្វើចត្តាឡីស័ក និងព្យាបាល ជំងឺកូវីដ-១៩ នៅអគារម៉ុកបាយ ព្រមទាំងបានចុះពិនិត្យសកម្មភាពចាក់វ៉ាក់សាំងរបស់ក្រុមគ្រូពេទ្យនៅមណ្ឌលសុខភាពបាវិត ផងដែរ៕

រូបភាពនិងអត្ថបទ ដោយ ៖ ភក្ដី