អាជ្ញាធរបញ្ជូនឱ្យវៀតណាមនូវជនជាតិរបស់ខ្លួន៧នាក់ដែលធ្វើការខុសច្បាប់នៅកម្ពុជា

អាជ្ញាធរកម្ពុជាបានបន្តបញ្ជូនឱ្យវៀតណាមវិញនូវជនជាតិរបស់ខ្លួនចំនួន៧នាក់ទៀត មានស្រីចំនួន២នាក់ ដែលបានលួចឆ្លងដែន និងធ្វើការដោយខុសច្បាប់នៅក្នុងប្រទេសកម្ពុជា។

តាមអគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ ជនជាតិវៀតណាមទាំងនេះ ត្រូវបានអនុវត្តនីតិវិធីបណ្ដេញចេញតាមច្រកទ្វារព្រំដែនអន្តរជាតិព្រែកចាក ខេត្តកំពត កាលពីថ្ងៃទី១២ ខែកញ្ញា ឆ្នាំ២០២៥។

ការអនុវត្តនីតិវិធីបណ្ដេញចេញនេះ អគ្គនាយកដ្ឋានអន្តោប្រវេសន៍ បញ្ជាក់ថា គឺដោយសារករណីលួចស្នាក់នៅធ្វើការងារខុសច្បាប់ គ្មានលិខិតឆ្លងដែន និងករណីលួចស្នាក់នៅធ្វើការងារខុសច្បាប់ ពាក់ព័ន្ធនឹងអំពើឆបោកអនឡាញ (online scam)។

ជនជាតិវៀតណាមទាំង៧នាក់នេះ គឺនាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ ទទួលបានពីស្នងការដ្ឋាននគរបាលខេត្តព្រះសីហនុ ដែលក្នុងនោះករណីលួចស្នាក់នៅធ្វើការងារខុសច្បាប់ គ្មានលិខិតឆ្លងដែន ចំនួន៤នាក់ និងករណីលួចស្នាក់នៅធ្វើការងារខុសច្បាប់ (online scam) ចំនួន ៣នាក់ (ស្រី២នាក់)៕