ការទទួលបានវ៉ាក់សាំងចាក់ការពារកូវីដ១៩ ជាការគិតគូរយកចិត្តទុកដាក់ខ្ពស់បំផុតរបស់សម្តេចតេជោ ហ៊ុន សែន

លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាអនុប្រធាន ស.អ.ក បានថ្លែងថា អ្នកទាំងអស់គ្នាមិនថារស់នៅទីនេះ ឬទីតំបន់ណាឡើយ គឺនៅទូទាំងប្រទេសកម្ពុជាតែម្ដង ដែលទទួលបានវ៉ាក់សាំងចាក់នាពេលនេះ គឺសំណាងណាស់ ដោយសារការគិតគូរយកចិត្តទុក្ខដាក់ខ្ពស់បំផុតរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

លោករដ្ឋមន្ត្រីថ្លែងបែបនេះនាព្រឹកថ្ងៃទី៩ ខែមេសា ឆ្នាំ២០២១ ខណៈអញ្ជើញបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនដល់គ្រួសារអតីតយុទ្ធជន ស្រុកពញាក្រែក ខេត្តត្បូងឃ្មុំ ដែលប្រព្រឹត្តិទៅក្នុងមន្ទីរពេទ្យបង្អែកស្រុកពញាក្រែក ។

លោករដ្ឋមន្ត្រី វង សូត បានថ្លែងថា ការទទួលបានវ៉ាក់សាំងសម្រាក់ចាក់នាពេលនេះ គឺជាការគិតគូរ និងយកចិត្តទុក​ដាក់ខ្ពស់អំពីសុខុមាលភាពរបស់ប្រជាពលរដ្ឋកម្ពុជា ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា តាមរយៈការស្នើសុំ និងការបញ្ជាទិញពីបណ្តាប្រទេសជាមិត្ត ដើម្បីជួយ​សង្គ្រោះដល់ប្រជាពលរដ្ឋ ក្នុងពេលដែលជំងឺកូវីដ១៩ បាននឹងកំពុងរាត្បាតយ៉ាងខ្លាំង ស្របតាមអានុសាសន៍របស់សម្តេច ដែលបានបញ្ជាឲ្យក្រសួងសុខាភិបាលបញ្ជ្រាបការចាក់វ៉ាក់សាំងនេះ ឲ្យបាន១លានដូស ក្នុងរយៈពេល ១ខែ ។

លោករដ្ឋមន្ត្រីក៏បានសំណូមពរឲ្យអស់លោក លោកស្រីជាមន្ត្រីរាជការក៏ដូចប្រជាពលរដ្ឋទាំងអស់គ្នាបន្ទាប់ពីបានទទួលវ៉ាក់សាំងរួចហើយ ត្រូវបង្កើនការយកចិត្តទុកដាក់បន្ថែមទៀត ក្នុងការអនុវត្តឱ្យបានខ្ជាប់ខ្ជួន នូវវិធានការក្រសួងសុខា​ភិបាល និង វិធានការណ៍ដ៏មុតស្រួច ៣ការពារ ៣កុំ របស់ប្រមុខរាជរដ្ឋាភិបាល ដើម្បីចូលរួមក្នុងការទប់ស្កាត់ការឆ្លងរីករាលដាលនៃជម្ងឺកូវីដ១៩ឲ្យមានប្រសិទ្ធិភាពខ្ពស់ ៕

អត្ថបទ ៖ វិមាន