សម្ដេចតេជោរំលឹកក្រសួងដែនដីត្រូវផ្តល់ដីសង្គមកិច្ចឱ្យអតីតយុទ្ធជន និងនិវត្តជនដែលអត់ពិតប្រាកដ

ថ្លែងនៅព្រឹកថ្ងៃទី២៩ ខែកញ្ញា ឆ្នាំ២០២៥នេះ ក្នុងឱកាសដឹកនាំមហាសន្និបាតវិសាមញ្ញតំណាងសមាគមអតីតយុទ្ធជនកម្ពុជាទូទាំងប្រទេស នៅទីស្ដីការក្រសួងមហាផ្ទៃ សម្តេចតេជោ ហ៊ុន សែន បានបញ្ជាក់ថា ការផ្ដល់ដីសម្បទានសង្គមកិច្ចត្រូវតែផ្ដល់ឱ្យដល់អតីតយុទ្ធជន និងនិវត្តជនដែលអត់មានដីធ្លីពិតប្រាកដ។

ប្រមុខរដ្ឋស្ដីទី និងជាប្រធានសមាគមអតីតយុទ្ធជន និងនិវត្តជនកម្ពុជា សម្ដេចតេជោ ហ៊ុន សែន បានណែនាំដល់ក្រសួងរៀបចំដែនដី នគរូបនីយកម្ម និងសំណង់ និងគណៈកម្មាធិការសម្បទានដីសង្គមកិច្ចថ្នាក់ជាតិ ត្រូវតែបន្តវាយតម្លៃលើលទ្ធភាពក្នុងការផ្ដល់ដីសង្គមកិច្ចជូនអតីតកងកម្លាំងប្រដា​ប់អាវុធ អតីតយុទ្ធជន និងនិវត្តជន ដែលក្រីក្រពិតប្រាកដ។

សម្ដេចតេជោ បានរំលឹកពីការសម្រេចចិត្តក្នុងអាណត្តិរដ្ឋាភិបាលរបស់សម្ដេច ដែលបានបញ្ឈប់ការផ្ដល់ដីសម្បទានសេដ្ឋកិច្ចទៅឱ្យក្រុមហ៊ុនឯកជន ចាប់តាំងពីឆ្នាំ២០១២មក ហើយដីដែលបានដកហូតពីក្រុមហ៊ុនឯកជន គឺត្រូវបានរដ្ឋរក្សាទុកសម្រាប់ផ្ដល់ជាដីសម្បទានសង្គមកិច្ច ក្នុងនោះមួយភាគត្រូវបានផ្ដល់សម្រាប់អតីតយុទ្ធជន។ ក្នុងន័យនេះ សម្ដេចតេជោ ប្រមុខរដ្ឋស្ដីទី បានជំរុញឱ្យក្រសួងរៀបចំដែនដី ត្រូវបន្តគ្រប់គ្រងដីធ្លីនេះឱ្យបានហ្មត់ចត់ ដើម្បីទុកផ្ដល់ដល់អតីតយុទ្ធជន និងនិវត្តជនដែលខ្វះដីពិតប្រាកដ។

បន្ថែមពីការផ្ដល់ដី សម្ដេចតេជោ ហ៊ុន សែន ក៏បានចង្អុលបង្ហាញដល់សមាគមអតីតយុទ្ធជន និងនិវត្តជនកម្ពុជា ត្រូវបន្តគម្រោងសាងសង់ផ្ទះដល់អតីតយុទ្ធជន និងនិវត្តជន ផងដែរ។ ពីមហាសន្និបាតវិសាមញ្ញតំណាងសមាគមអតីតយុទ្ធជនកម្ពុជានៅថ្ងៃនេះ សម្ដេចតេជោ ក៏បានប្រកាសជួយសាងសង់ផ្ទះសម្រាប់អតីយុទ្ធជនបន្ថែមទៀត ដោយក្នុង១ឆ្នាំ សម្ដេចនឹងសាងសង់ផ្ទះចំនួន១០០ខ្នង ហើយរយៈពេល៥ឆ្នាំ ចាប់ពីឆ្នាំ២០២៥ ដល់ឆ្នាំ២០៣០។

ការសាងសង់ផ្ទះ និងការផ្ដល់ដីសម្បទានសង្គមកិច្ចដល់អតីតយុទ្ធជន និងអតីតមន្ត្រីរាជការស៊ីវិល គឺជាផ្នែកមួយនៃការដោះស្រាយគោលនយោបាយដ៏ចាំបាច់របស់រាជរដ្ឋាភិបាល តាំងពីអាណត្តិរដ្ឋាភិបាល ដឹកនាំដោយសម្ដេចតេជោ ហ៊ុន សែន និងបន្តដោយរដ្ឋាភិបាលដឹកនាំដោយសម្ដេចធិបតី ហ៊ុន ម៉ាណែតពេលនេះ ធ្វើយ៉ាងណាជួយលើកកម្ពស់ជីវភាពរស់នៅរបស់​អតីតយុទ្ធជន អតីតមន្ត្រីរាជការ ដែលបានបម្រើជាតិមាតុភូមិស្ទើរពេញមួយជីវិតរបស់ពូកគាត់៕

ដោយ៖ ធឿន វ៉ាន់សុង