ក្រោមគម្រោងផ្តល់ផលប៉ះពាល់រហ័ស ឥណ្ឌានឹងជួយធ្វើឱ្យប្រសើរឡើងហេដ្ឋារចនាសម្ព័ន្ធសាលារៀននៅកម្ពុជា

ស្ថានទូតឥណ្ឌាប្រចាំព្រះរាជាណាចក្រកម្ពុជា​ ដែល​ជាអ្នកតំណាង​ក្រសួងការបរទេសឥណ្ឌា និងក្រសួងអប់រំ យុវជន និងកីឡា កម្ពុជា បានចុះហត្ថលេខាលើអនុស្សរណៈនៃការយោគយល់គ្នា ក្រោមគម្រោងផ្តល់​ផលប៉ះពាល់រហ័សចំនួនពីរ ដែលគម្រោងនេះភាគីឥណ្ឌា នឹងជួយគាំទ្រផ្តល់ទឹកស្អាត និងធ្វើឱ្យប្រសើរឡើងនូវហេដ្ឋារចនាសម្ព័ន្ធតាមសាលារៀន។

ពិធីចុះអនុស្សរណៈនេះ ធ្វើឡើងកាលពីថ្ងៃទី ១ ខែតុលា ឆ្នាំ ២០២៥ ចុះហត្ថលេខាដោយ លោក Vanlalvawna Bawitlung ឯកអគ្គរដ្ឋទូតឥណ្ឌាប្រចាំព្រះរាជាណាចក្រកម្ពុជា និង លោកស្រី គឹម សេដ្ឋានី រដ្ឋលេខាធិការ​ប្រចាំការនៃ​ក្រសួង​ការអប់រំ ក្រោមអធិបតីភាពលោកឧបនាយករដ្ឋមន្រ្តី ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីប្រកាសព័ត៌មានស្ថានទូតឥណ្ឌាប្រចាំកម្ពុជា បានឱ្យដឹងថា តាមរយៈកិច្ចសហការនេះ គម្រោងទី១ គឺជាគម្រោងផ្តល់​ប្រព័ន្ធទឹកក្នុង​សាលារៀនដែលអាចទប់ទល់នឹងការ​ប្រែ​ប្រួល​អាកាសធាតុ ក្នុងខេត្តពោធិ៍សាត់ នឹងដំឡើងប្រព័ន្ធទឹកប្រើថាមពលពន្លឺព្រះអាទិត្យនៅក្នុងសាលាបឋមសិក្សាចំនួនប្រាំ ដោយធានាបាននូវសុវត្ថិភាព និងអាចទុកចិត្តបានក្នុងការប្រើប្រាស់ទឹកស្អាត ដែលជាផ្នែកមួយនៃការ​លើកកម្ពស់ការអនុវត្តអនាម័យ និងធន់នឹងអាកាសធាតុ។

ចំណែកគម្រោងទី២ គឺជា​គម្រោងអភិវឌ្ឍន៍សាលារៀនគំរូស្តង់ដារក្នុងខេត្តកំពង់ចាម នឹងធ្វើឱ្យប្រសើរឡើងនូវហេដ្ឋារចនាសម្ព័ន្ធសាលារៀន អនាម័យ និងពង្រឹងសមត្ថភាពរបស់នាយកសាលា និងគ្រូបង្រៀន ឱ្យប្រែក្លាយសាលារៀនទៅជាបរិយាកាសសិក្សាគំរូ។

សូមជម្រាបថា ចាប់តាំងពីឆ្នាំ ២០១៥ រដ្ឋាភិបាលឥណ្ឌាបានផ្តល់គម្រោងផ្តល់ផលរហ័សចំនួន៦៩ ទូទាំងប្រទេសកម្ពុជាក្នុងវិស័យជាច្រើន​ ក្នុងនោះមានដូចជា វិស័យ​រអប់រំ បច្ចេកវិទ្យាព័ត៌មាន កសិកម្ម សុខភាព អនាម័យ ការផ្តល់សិទ្ធិ​អំណាចដល់ស្ត្រី និងបរិស្ថាន។ ក្នុងចំនោមនោះ គម្រោងចំនួន ០៨ ត្រូវបានអនុវត្តន៍ក្រោមកិច្ចសហការជាមួយក្រសួងអប់រំ យុវជន និងកីឡា ដោយផ្តល់ផល​ប្រយោជន៍​ផ្ទាល់​ដល់​សិស្សានុសិស្ស និងគ្រូបង្រៀនកម្ពុជា។

គំនិតផ្តួចផ្តើមទាំងនេះ បញ្ជាក់នូវការប្តេជ្ញាចិត្តយ៉ាងមុតមាំរបស់ឥណ្ឌាចំពោះអាទិភាពនៃការ​អភិវឌ្ឍន៍​របស់កម្ពុជា និងបញ្ជាក់ពីទំនាក់ទំនងមិត្តភាពដែលចាក់ឫសយ៉ាងជ្រៅរវាងប្រជា​ជាតិទាំងពីរ៕