នយោបាយ

ឧប. ស៊ុន ចាន់ថុល នាំយកសំលៀកបំពាក់ធ្វើពី«សំពត់ហូលខ្មែរ» ជូនសមាជិកសភាអាមេរិក២រូបដោយផ្ទាល់

បានផុស

៨ ខែ មុន

នៅ

ថ្ងៃសុក្រ ៧ វិច្ឆិកា ២០២៥

ដោយ

អនុប្រធានទី១ក្រុមប្រឹក្សាអភិវឌ្ឍន៍កម្ពុជា ឧបនាយករដ្ឋមន្ត្រី ស៊ុន ចាន់ថុល បាននាំយកសម្លៀកបំពាក់ប្រពៃណីច្នៃអំពី «សំពត់ហូលខ្មែរ» ទៅជូនសមាជិកសភាអាមេរិក២រូបគឺលោកស្រី Beth Van Duyne និង និងលោក Richard McCormick ដោយផ្ទាល់ក្នុងឱកាសលោកអញ្ជើញដឹកនាំប្រតិភូកម្ពុជាទៅស្វែងរកការវិនិយោគនៅសហរដ្ឋអាមេរិកនៅថ្ងៃទី៥ ខែវិច្ឆិកាកន្លងទៅ។ លោកឧបនាយករដ្ឋមន្ត្រីបានបញ្ជាក់ថាការជូនវត្ថុអនុស្សាវរីយ៍នេះ គឺជាក្តីសង្ឃឹមក្នុងការចែករំលែកនូវភាពស្រស់សោភា និងភាពរុងរឿងនៃវប្បធម៌ខ្មែរ ក៏ដូចជាការពូនជ្រំចំណងមិត្តភាពឱ្យកាន់តែរឹងមាំជាមួយអ្នកទាំងពីរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សំលៀកបំពាក់ដែលធ្វើពីសំពត់ហូលខ្មែរនេះត្រូវបានត្បាញដោយដៃយ៉ាងល្អិតល្អន់ចេញពីសរសៃសូត្រសុទ្ធ និងប្រើប្រាស់បច្ចេកទេសជ្រលក់ពណ៌ដោយល័ក្ដធម្មជាតិ ១០០% ដែលតម្រូវឱ្យមានភាពអំណត់ និងជំនាញខ្ពស់។ រាល់ក្បាច់ក្បូរក្រឡាគោមលើសំពត់ហូលនេះ បានបង្កប់នូវព្រលឹងអត្តសញ្ញាណជាតិ និង ភាពច្នៃប្រឌិតរបស់ប្រជាជនកម្ពុជាតាំងពីបុរាណកាលមក។

លោកឧបនាយករដ្ឋមន្ត្រី ស៊ុន ចាន់ថុល បានបញ្ជាក់ថា៖ «វត្ថុអនុស្សាវរីយ៍នេះតំណាងឱ្យសិល្បៈដ៏ចំណាន និងបេតិកភណ្ឌវប្បធម៌ដ៏សម្បូរបែបរបស់ប្រជាជាតិកម្ពុជា»។

លោកស្រី Beth Van Duyne និងលោក Richard McCormick គឺជាសមាជិកសភាតំណាងរាស្ត្រសហរដ្ឋអាម៉េរិកមកពីគណបក្សសាធារណរដ្ឋជាគណបក្សដែលដឹកនាំរដ្ឋាភិបាលក្រោមអាណត្តិរបស់ប្រធានាធិបតី ដូណាល់ ត្រាំ។ កាលពីខែសីហា កន្លងទៅលោកស្រី Beth Van Duyne បានដឹកនាំប្រតិភូសភាសហរដ្ឋអាម៉េរិក(CODEL) មកបំពេញទស្សនកិច្ចនៅកម្ពុជា និងបានចុះទៅឃើញផ្ទាល់នូវស្ថានភាពរបស់ប្រជាពលរដ្ឋកម្ពុជា ដែលត្រូវបានផ្លាស់ទីលំនៅទៅស្នាក់នៅមជ្ឈមណ្ឌលសន្តិសុខ ក្នុងស្រុកគូលែន ខេត្តព្រះវិហារផងដែរ។

ក្នុងជំនួបជាមួយសមាជិកសភាទាំងពីរនៅថ្ងៃនេះលោកឧបនាយករដ្ឋមន្ត្រី ស៊ុន ចាន់ថុល បានផ្លាស់ប្ដូរយោបល់បន្ថែម ក្នុងស្មារតីបន្តពង្រឹងនិងបង្កើនកិច្ចសហប្រតិបត្តិការ ដែលផ្ដល់ផលប្រយោជន៍ទៅវិញទៅមកដល់ប្រជាជន និងវិស័យសេដ្ឋកិច្ច ពាណិជ្ជកម្មនៃកម្ពុជានិងអាមេរិក ព្រមទាំងរម្លឹកពីព្រឹត្តិការណ៍ប្រវត្តិសាស្ត្ររបស់កម្ពុជាដែលសម្រេចបានកិច្ចព្រមព្រៀងសន្តិភាពជាមួយថៃក្រោមការជួយជ្រោមជ្រែងរបស់អាមេរិក និងការចុះកិច្ចព្រមព្រៀងពាណិជ្ជកម្មបដិការ (Reciprocal Trade Agreement) រវាងកម្ពុជា និងសហរដ្ឋអាមេរិកផងដែរ។

បើតាមលោក ស៊ុន ចាន់ថុល ជំនួបនេះបានបញ្ជាក់បន្ថែមពីចំណងមិត្តភាពដ៏ល្អប្រសើររវាងប្រទេសទាំងពីរ ព្រមទាំងបានពង្រឹងស្មារតីសាមគ្គីភាពរវាងសមាជិកសភាអាម៉េរិក និងគណៈប្រតិភូកម្ពុជា៕